Aposolo Jaŋere Binaŋ 23:1-19

¹Paulo e micne bapa hone dendeŋ‐jopahuc dâŋ ʒiŋuc jazawec: “Ŋic âgofâc‐nane, no sâcmutâc dâŋ qaqatarare maŋnanezi mumu hehec moc mi enareha Anuture maio juwefuhuc jupozi jukopac.”

²Iŋuc mume taha bapa sâko Anania eki ŋic Paulore maŋfuŋko domambiŋ jaŋe ʒiŋuc jazawec: “Ŋoŋe masunao qaniŋ.”

³Mume Paulozi ʒiŋuc âzâcnewec: “Maŋge tâŋzi qakicne go Anutuzi guocmu. Go sâcmutâc dâŋte sâcko norao mumutiŋ gie bazo mukiczi wemocte sâcmutâc dâŋ qâsuahuc nuniŋte jazakic?”

⁴Iŋuc mume ŋic doma rambiŋ jaŋe ʒiŋuc âzâcnembiŋ: “Go Anuture taha bapa sâko wemocte musoriŋkekic?”

⁵Mupie Paulozi ʒiŋuc muwec: “Âgo bureŋ, e taha bapa sâko jukac i mi manahuc dâŋepac. Mitio dâŋ kecʒiŋuc qâreŋkekicne: ‘Go micne bapa mi musâqorec‐jopazemec.’ No dâŋ i manaekopac.”

⁶Eme micne guru ŋic tucne sadukaio â tucne farisaio ŋic jumbiŋ, Paulozi i manahuc dâŋ baferâ ʒiŋuc jazawec: “Ŋicbureŋ, no farisaio ŋic â apa ŋosafâc‐nane jaŋe farisaio ŋic jaha jumbiŋ. Hâmockonec fafahare fokac dâŋ i dopeckeekopacte dâŋko râecnuŋgopieŋ.”

⁷Dâŋ iŋuc mume farisaio ŋic â sadukaio ŋic jaŋe qaqatarac epie micne bapa jaŋerao fâfâuc fuawec.

⁸Sadukaio ŋic jaŋe hâmockonec fafahare â aŋelo â sawa qâqâtâc, wiac iŋucne micke‐fâreeŋgopieŋ. Farisaio ŋic jaŋe ine irec fârine mueŋgopieŋ.

⁹Eme irec tutumaŋ‐jeŋicko ojowa sâko bambiŋ. Eku farisaio ŋic jaŋere guruonec miti qaqazu gâcne faharerâ dâŋ fârone kecʒiŋuc mumbiŋ: “Nâŋe ŋic kecʒirec kiŋ manapene aricne ekac; aŋelo me sawa qâqâtâc moczi dâŋ âzâcnewecko weniŋuc moc munaŋmu?”

¹⁰Eme fecko fefec mâretec epie momori soŋaŋ sâko e Paulo qâsuckenʒipiŋte hâwickeme mume momori jaŋe fisirâ Paulo ŋicŋondeŋkonec fâre waharâ ficjeŋicko barambiŋ.

¹¹Eme ŋafe ira Wofuŋzi Paulo fuacnerâ ʒiŋuc âzâcnewec: “Go hâbige roc, ʒira Jerusalem haeo mutaniŋnukomec iŋuc jaha Roma haeo mutaniŋnuzemec.”

¹²Hae fureme Judaŋic gâcne ʒâʒâfic erâ nânâ sowa jujâmbâŋkeku Paulo qarâ nânâ opâ nâniŋte mumundeŋ embiŋ.

¹³Ŋic ʒâʒâfic erâ iŋuc mumbiŋ ʒare‐jeŋic 40 jâuruwec.

¹⁴Ŋic jaŋe hâcne taha bapa micne â soŋaŋ jaŋerao rarâ mufua‐jarerâ ʒiŋuc jazambiŋ: “Nâŋe nânâ sowa jujâmbâŋkeku Paulo qarâ wiac nanaŋte mumundeŋ embeneŋ;

¹⁵irec micne bapa ŋoŋe momori soŋaŋ sâkorao dâŋ ʒiŋuc râepie razejec: ‘Go Paulo nâŋere tutumaŋko soretec wareme dâŋticne mocwâc muhâmonʒepeneŋ.’ Eme dâŋŋeŋic manarâ iŋuc eme nâŋe Paulo hatao qanaŋmu.”

¹⁶Eme Paulo baŋec‐ticnezi ʒikadâŋ i manawec. Manarâ momori ficko rarâ wawa‐ticne âzâcnewec.

¹⁷Âzâcneme Paulozi momori jaŋere micne moc wiracnerâ ʒiŋuc âzâcnewec: “Go motec ʒi momori soŋaŋ sâkorao jowa ratec dâŋ moc âzâcneoc.”

¹⁸Mume ŋic eki motec soŋaŋ sâkorao jowa rarâ ʒiŋuc âzâcnewec: “Kâpâcwâru ŋic Paulo eki wira‐narerâ nazame motec ʒi dâŋ gazaocte jowape warekoperec.”

¹⁹Iŋuc muhuc âzâcneme soŋaŋ sâkozi motec menao rorâ herâricnao bararâ wiocnerâ muwec, “Dâŋ weniŋuc nazacmu?”