Yesu Tɔ̃rɛ̀ 23:1-19

¹Kɛ̀ Pɔɔri nwúó mbɛbeémbɛ̀ kɛ́bɛ́i nkɛ dɔ̀: Kuyie nni nwúómu, nɛ̀ m bomɛ̀ tìmɑtì í kɔɔ́nnɛ̀ n yɛ̀mmɛ̀.

²Kɛ̀ ikuɔ́ nìùtì diɛwè Anɑnniyɑɑsii duɔ́ nkɛ̀ bɛ̀ɛ̀ tɔ̀kɛ́nɛ̀ Pɔɔri kɛ̀ bɛ̀ɛ potɛ́ o nùù.

³Kɛ̀ Pɔɔri dɔ̀: Kuyie nyóó potɛ́ fɔ̃́ nwe, ɑ dò nnɛ̀ ditou sĩ̀nnì bɛ̀ bi dì mumɔ̀mmu pɛ́ímù. A kɑri diɛ nkɛ bo m bekɛ́nɛ̀ ikuɔ́ yɛ̃mmɛ̀ kɛ wɛ̃̀tɛ kɛ ì yetɛ́nɛ̀, kɛ duɔ́ nkɛ̀ bɛ̀ m potɛ́.

⁴Bɛ̀ɛ̀ tɔ̀kɛ́nɛ̀ Pɔɔri kɛ̀ bɛ̀ɛ ò nɑ̀kɛ́ kɛ dɔ̀: Ikuɔ́ nìùtì diɛwè nwe ɑ sɑ̃́ɑ̃́mmɑ̀ɑ̀?

⁵Kɛ̀ Pɔɔri dɔ̀: N kɔbɛ n do í yɛ̃́ kɛ do ikuɔ́ nìùtì diɛwè nwe, kɛ yɛ̃́ tì wɑ̃̀rimɛ̀ kɛ tú: A bɑ́ɑ́ sɑ̃́ɑ̃́ nwèè ni ɑ kó kubotí.

⁶Kɛ̀ Pɔɔrii bɑntɛ́ bɛbeémbɛ̀ bomɛ̀ ibotí ìdɛ́ì, Sɑdusĩɛ̃bɛ nɛ̀ Fɑdisĩɛ̃bɛ, kɛ bɛ́i nkɛ dɔ̀: N tú Fɑdisĩɛ̃ nwe kɛ̀ n cicɛ tú Fɑdisĩɛ̃, n tɑ̃́ mɛ̀ɛ̀ kpɛ́í nkɛ dò mukúkɛ́yɑ̃́ntímù bo, dɛɛ̀ te kɛ̀ di m bekùnɛ̀.

⁷Ò bɛ́i mɛmmɛ Fɑdisĩɛ̃bɛ nɛ̀ Sɑdusĩɛ̃bɛ kɛ̀ bɛ̀ɛ ítɛ́ tinɛìtì kɛ́yɑtɛ.

⁸Kɛ̀ Sɑdusĩɛ̃bɛ ntú mukúkɛ́yɑ̃́ntímù í bo, Kuyie ntɔ̃rɛ̀ mɛ nyí bo, yoo muyɑɑ́ ntɛ̃mù mɑmù mɛ nyí bo, kɛ̀ Fɑdisĩɛ̃bɛ biɛ nyɛ̃́ kɛ dò dɛndɛ kó dimɑ̀ɑ̀ bo.

⁹Kɛ̀ kutowekuu dɛukɛ kɛ̀ ikuɔ́ wɑ̃ɑ̃̀bɛ̀ bɛ̀ɛ̀ tu Fɑdisĩɛ̃bɛ kɛ̀ bɛ̀ɛ kónnɛ́ Pɔɔri kɛ dɔ̀: Ti í yɑ̀ onìtì yie ndɔ̀ɔ̀ mɛ̀ɛ̀ yɛi, kɛ̀ dɛ̀ yɛ̀mmɛ Kuyie ntɔ̃nnì mɑrì diì bo nhò bɛ́innɛ̀, yoo muyɑɑ́ ntɛ̃mù mɑmù.

¹⁰Kɛ̀ dikpɑ̀nnìi dɛukɛ, kòo ɑ̃ɑ̃pɔ̀nkótì ńyĩɛ̃̀kù bɛ̀ bo kuɔmɛ̀ Pɔɔri, kɛ́duɔ́ nkɛ̀ bɛhɑ̃ɑ̃pɔ̀mbɛ̀ɛ cútóo kóò tùótɛ́ ditĩ̀nnì miɛkɛ kɛ́tɑnnɛ́ tɛhɑ̃ɑ̃pɔ̀ncĩ́ɛ̃̀tɛ̀.

¹¹Dɛ kó kɛyènkɛ̀ kɛ̀ ti Yiɛ̀ nkɔtɛní kɛ́nɑ́kɛ́ Pɔɔri kɛ dɔ̀: A kɔ̃̀ntì bɑ́ɑ́ yɑ̃rikɛ, ɑ nɑ̀kɛ́ mɛ̀ɛ̀ botí nkpɛ́í Sedisɑdɛmmu kɔbɛ ɑ yóó mɛ nnɑ́kɛ́ Odommu kɔbɛ n kpɛ́í.

¹²Kɛ̀ dɛ̀ɛ wentɛ́ kɛ̀ Sifubɛɛ wɛ̃nnɛ́ kɛ dɔ̀ bɛ̀ bɑ́ɑ́ di, bɛ̀ mɛ mbɑ́ɑ́ yɑ̃̀ dɛ̀mɑrɛ̀ kɛ í kùɔ Pɔɔri.

¹³Bɛ̀ɛ̀ do wɛ̃nnɛ́ kɛ bo ò kùɔ bɛ̀ do bo mbo sipísìnɑ̀ɑ̀,

¹⁴kɛ́kɔtɛ kɛ́yɑ̀ ikuɔ́ nìùbɛ̀ kó bɛkótíbɛ̀ nɛ̀ bɛkótíbɛ̀ kɛ́ bɛ̀ nɑ̀kɛ́ kɛ dɔ̀: Ti yetɛmu kɛ tú ti bɑ́ɑ́ di dɛ̀mɑrɛ̀ kɛ í kùɔ Pɔɔri.

¹⁵Bekɛnɛ̀ ohɑ̃ɑ̃pɔ̀nkótì kɛ̀ dɛ̀ ndò ndi dɔ́ kɛ́yɑ̀ Pɔɔri kɛ wéntɛ́ o nɑ́ɑǹtì mɛsɑ̀ɑ̀, kɛ̀ bɛ̀ ò kɔ̀rinní, ti bo mbo dɛ mɔ̀nnì kucɛ kóò kùɔ kòo mu nyí tùɔ̀kɛní.

¹⁶Kɛ̀ Pɔɔri tɑ̃ũ̀ birɛɛ keè bɛ̀ dɑ̀kɛmɛ̀ kɛ bo kuɔ Pɔɔri, kɛ́kɔtɛ tɛhɑ̃ɑ̃pɔ̀ncĩ́ɛ̃̀tɛ̀ kɛ́tɑ kóò nɑ̀kɛ́.

¹⁷Kɛ̀ Pɔɔrii yú kuhɑ̃ɑ̃pɔ̀nkù mɑkù kɛ dɔ̀: Niitɛ́ we ndɑpɑ̀ɑ̀ nhOkótì borɛ̀, ò mɔ̀kɛ tìmɑtì nti kɛ dɔ́ kóò nɑ̀kɛ́.

¹⁸Kɛ̀ kuhɑ̃ɑ̃pɔ̀nkùu ò nɛinɛ̀ kɛ̀ bɛ̀ɛ kɔtɛ ohɑ̃ɑ̃pɔ̀nkótì borɛ̀, kɛ̀ kùu ò nɑ̀kɛ́ kɛ dɔ̀: Kukpetínkù Pɔɔri weè yɛ̃ n kɔtɛnní we ndɑpɑ̀ɑ̀ nhɑ borɛ̀ kòò dɑ nɑ́kɛ́ tìmɑtì.

¹⁹Kòo ɑ̃ɑ̃pɔ̀nkótìi dɛtɛ weè dɑpɑ̀ɑ̀ nkɛ̀ bɛ̀ɛ kɛntɛ́ kòò dɔ̀: A yɛ̃ mbɑ?