Menge Ininang 23:1-19

¹Yan timengteng si Pablo diyà te kedita te obanen te simbahan aw minikagi sikandin, “Menge kedowa ko, pengkey eden se neinang ko, meneng netegahan ko te ontò metòlid se aneng-aneng ko diyà te Timanem lamig songkani.”

²Si Ananias se ontò pengolo te simbahan. Insogò din se doma otaw menampak ki Pablo amon ipelumun.

³Penga niyan, minikagi si Pablo diyà ki Ananias, “Ipelumun ka te Timanem, so eden nikaw aw ontò ka egtaking diyà te Timanem. Eden nikaw aw siak se limàpang te punù ingkeliwat i Moises, meneng sikona se limàpang te punù ingkeliwat i Moises, so impesampak a nikaw.”

⁴Penga niyan, doen menge doma otaw medapag kandin aw minikagi dan, “Ikà egtompuyus te ontò pengolo te simbahan, sìyan pinemallì te Timanem.”

⁵Yan minikagi si Pablo, “Menge kedowa ko, wedà ko ketegahi te sikandin se ontò pengolo te simbahan. Netegahan ko te doen kagi te Timanem insolat te keilangan eked silahi se otaw lomowan kenitadon.”

⁶Netaga-taga si Pablo te kenà egsebad se kedita te obanen te simbahan, so doen egpelenged te Sadusiyo, aw doen doma otaw egpelenged te Parisiyo. Yan minikagi si Pablo diyà kandan, “Menge kedowa ko, siaken se egpelenged te Parisiyo, aw kemonaan ko heman se egpelenged te Parisiyo. Impedini a amon insaen a niyo te aldaw seini, so egpeliman a te peg-antay te Timanem te otaw lekat te nematay.”

⁷Peg-ikagi din kenyan, migpedindilay se Parisiyo aw Sadusiyo. Yan migpeteniyay dan.

⁸Egtoladà se Parisiyo te entayen te Timanem se otaw lekat te nematay, aw doen menge anghil, aw doen heman pedowan wedad temanan. Meneng egtoladà se Sadusiyo te wedad otaw meantay lekat te nematay, aw wedad anghil, aw wedad heman pedowan wedad temanan.

⁹Yan dakel se samok dan. Penga niyan, doen menge menenoladà te punù ingkeliwat i Moises timindeg lenged te Parisiyo. Minikagi dan, “Aneng-aneng day, wedad salà din. Doen besi anghil minikagi diyà kandin.”

¹⁰Ontò dan migsamok, aw nelemitan se kapitan aw mengimatay dan ki Pablo. Yan insogò din se menge sondalo amon engayen dan si Pablo aw ibingen dan sikandin doton te kotà.

¹¹Tengà te delem, migpekità se Pengolo diyà ki Pablo aw minikagi, “Ikà egkelemitan. Mig-indan ka den tepad kanak dini te Jerusalem. Meg-indan ka pa heman doton te Roma.”

¹²Keeldawan niyan, doen menge Judiyo kenà egpemenal migsebad te pedowan mengimatay ki Pablo. Migpepekangay dan te eked dan kaen singed aw imetayan dan si Pablo.

¹³Lampas te kepatan se otaw minakop kandan.

¹⁴Penga niyan, dimoton dan te menge pengolo aw obanen te simbahan. Minikagi dan, “Migpepekangay kay te eked kay palos kaen singed aw imetayan day si Pablo.

¹⁵Nayan, pemoyoi niyo diyà te kapitan te todà din ibingen si Pablo dini kenyo. Pegpelingo-lingo kaw te doen pa insaen niyo diyà kandin. Meneng benganan day sikandin amon imetayan day te eked pa dateng dini kenyo.”

¹⁶Meneng dimineg se anak i Pablo te ibeg dan megbangan kandin. Yan dimoton te kotà amon meg-indan ki Pablo.

¹⁷Penga niyan, tinawal i Pablo se sebad serhinto aw minikagi, “Ibingi se telaki seini doton te kapitan so doen iindan din.”

¹⁸Yan inibing sikandin te serhinto doton te kapitan aw minikagi, “Nemoyò sìyan otaw kineleboso si Pablo te ibingen ko kamno se telaki seini, so doen iindan din kamno.”

¹⁹Yan inibing te kapitan se telaki doton te keligbinan aw mig-insà, kagi din, “Atò, eden se iindan no kanak?”