Hechos 23:1-19

¹Dan me se niꞌya̱j uxrá Pabló man taranꞌ nij síí uun chij yoꞌ, ne̱ cataj soꞌ: ―Cuno̱ nij soj caꞌmi̱j, tinu̱j. Nu̱ꞌ cavii nu̱ꞌ caꞌnaꞌ roꞌ, ina̱nj sa̱ꞌ uxrá ꞌyáá ꞌu̱nj rihaan Diose̱, raj a. Taj cacunꞌ tumej maꞌ ―taj Pabló rihaan nij soꞌ a.

²Ga̱a ne̱ xrej ata̱ suun noco̱o doj síí cuꞌna̱j Ananías roꞌ, caꞌneꞌ soꞌ suun rihaan nij síí nicu̱nꞌ rej xꞌnúú Pabló se vaa coxro̱ nij soꞌ tuꞌva Pabló, ga̱a ne̱ da̱nj quiꞌyaj nij soꞌ a.

³Ga̱a ne̱ cataj Pabló rihaan síí cuꞌna̱j Ananías yoꞌ a: ―Vaa güii coxro̱ Diose̱ tuꞌvá so̱ꞌ á. ꞌO̱ se síí nucuiꞌ rá mé so̱ꞌ á. ꞌO̱ se táá so̱ꞌ naquiꞌya̱j cuú so̱ꞌ cheꞌej sese quiꞌyáá ꞌu̱nj cacunꞌ rihaan se tucua̱nj Moisés, rá so̱ꞌ a. Tza̱j ne̱ nihánj me se tana̱nj caꞌnéꞌ so̱ꞌ suun se vaa coxro̱ nii tuꞌvaj, ne̱ se tucua̱nj Moisés taj se vaa ne nó xcúún so̱ꞌ a̱ ꞌó xcoꞌ qui̱ꞌyáá so̱ꞌ da̱nj maꞌ ―taj Pabló rihaan síí cuꞌna̱j Ananías a.

⁴Ga̱a ne̱ nij síí nicu̱nꞌ rej xꞌnúú Pabló roꞌ, cataj nij soꞌ rihaan Pabló a: ―Ne nó xcúún so̱ꞌ caxri̱i̱ yuva̱a̱ so̱ꞌ man síí cuneꞌ Diose̱ gu̱un xrej ata̱ suun noco̱o doj maꞌ ―taj nij soꞌ rihaan Pabló a.

⁵Ga̱a ne̱ cataj Pabló: ―Ne que̱neꞌén ꞌu̱nj se vaa xrej ata̱ suun noco̱o doj me síí tuꞌva da̱nj, man tinu̱j. ꞌO̱ se danj Diose̱ taj se vaa se̱ caꞌmii chiꞌi̱i̱ níꞌ ni̱ꞌyaj níꞌ síí uun chij rihaan nij tuvi̱ꞌ níꞌ a̱ maꞌ ―taj Pabló rihaan nij soꞌ a.

⁶Dan me se xcaj Pabló cuentá se vaa taꞌa̱j nij síí uun chij yoꞌ me síí saduceo ne̱ yoꞌó taꞌa̱j nij soꞌ me síí fariseo, ne̱ cheꞌé dan caguáj soꞌ, cataj soꞌ rihaan cunuda̱nj nij soꞌ a: ―Síí fariseo mej, ne̱ taꞌníí síí fariseo mej, tinu̱j. Ne̱ nihánj me se cutaꞌ nii cacunꞌ xráj cheꞌé se ꞌu̱nj me síí amán rá se vaa cunu̱u iꞌna̱ꞌ uún nij síí caviꞌ vaa güii, tinu̱j ―taj Pabló rihaan cunuda̱nj nij soꞌ a.

⁷Dan me se ga̱a caꞌmii Pabló da̱nj, ne̱ caꞌmaan rá nij síí fariseo do̱ꞌ, nij síí saduceo do̱ꞌ, niꞌya̱j nij soꞌ tuviꞌ nij soꞌ, ne̱ xraꞌ taꞌa̱j nij soꞌ a.

⁸ꞌO̱ se nij síí saduceo roꞌ, taj se vaa se̱ caꞌvee cunu̱u iꞌna̱ꞌ uún nij síí caviꞌ maꞌ. Ne̱ se mo̱zó Diose̱ do̱ꞌ, nimán yuvii̱ do̱ꞌ, taj va̱j maꞌ, taj nij síí saduceo yoꞌ a. Tza̱j ne̱ nij síí fariseo roꞌ, taj se vaa ya̱ ya̱ cunu̱u iꞌna̱ꞌ uún nij síí caviꞌ vaa güii, ne̱ vaa se mo̱zó Diose̱, ne̱ vaa nimán yuvii̱, taj nij soꞌ a.

⁹Dan me se caguáj ndoꞌo cunuda̱nj nij síí uun chij yoꞌ, ne̱ canicunꞌ taꞌa̱j nij síí fariseo ata̱ suun naquiꞌyaj cu̱u se tucua̱nj Moisés rihaan yuvii̱, ne̱ caꞌmii canó tuviꞌ nij soꞌ ga̱ nij síí saduceo, cataj nij soꞌ: ―Nuviꞌ cacunꞌ tumé síí nihánj, rá núj maꞌ. ꞌO̱ se caꞌve̱e se a̱j caꞌmii ꞌo̱ nimán rihaan soꞌ caꞌve̱e se a̱j caꞌmii ꞌo̱ se mo̱zó Diose̱ rihaan soꞌ caꞌve̱e na̱nj á ―taj nij soꞌ, caꞌmii nacaj nij soꞌ man Pabló a.

¹⁰Ga̱a ne̱ caꞌmaan uxrá rá cunuda̱nj nij soꞌ, ne̱ cheꞌé dan cuchuꞌviꞌ tanuu uun chij doj se vaa cutu̱nꞌ nij soꞌ man Pabló, ne̱ cheꞌé dan caꞌneꞌ soꞌ suun rihaan nij tanuu se vaa caꞌa̱nj nij tanuu qui̱taꞌaa nij tanuu man Pabló ne̱ quiri̱i̱ nij tanuu man Pabló scaꞌnúj nij síí uun chij rihaan nij yuvii̱ israelitá yoꞌ ne̱ caꞌa̱nj ni̱caj nij tanuu man Pabló rá cuarteé ma̱n nij tanuu a.

¹¹Tiꞌnuu yoꞌó güii me se curuviꞌ maꞌa̱n Jesucristó si̱j ꞌni̱j raꞌa man níꞌ rihaan Pabló, ne̱ cataj soꞌ rihaan Pabló a: ―Ga̱a̱ nucua̱j nimán so̱ꞌ á. ꞌO̱ se ase vaa ꞌo̱ xraan taj xnaꞌanj so̱ꞌ rihaan nij síí ma̱n chumanꞌ Jerusalén nihánj cheꞌé ꞌu̱nj roꞌ, da̱nj ga̱a̱ cata̱j xnaꞌanj so̱ꞌ rihaan nij síí ma̱n chumanꞌ Romá uún cheꞌé ꞌu̱nj ado̱nj ―taj síí ꞌni̱j raꞌa man níꞌ rihaan Pabló a.

¹²Dan me se yoꞌó güii cunuu chre̱ꞌ nij síí israelitá cheꞌé rej quiꞌya̱j nij soꞌ sayuun man Pabló, ne̱ cataj nij soꞌ rihaan Diose̱ a: ―Sese cha̱ núj do̱ꞌ, sese coꞌo̱ núj na do̱ꞌ, ga̱a ataa cavi̱ꞌ Pabló quiꞌya̱j núj, ne̱ caꞌve̱e qui̱ꞌyáá so̱ꞌ sayuun man núj á ―taj nij soꞌ rihaan Diose̱ a.

¹³Ne̱ vi̱j chiha̱a̱ táá doj nij soꞌ me nij síí guun ꞌo̱ rá quiꞌya̱j da̱nj man Pabló a.

¹⁴Ga̱a ne̱ nij síí me rá ticavi̱ꞌ man Pabló roꞌ, cuchiꞌ nij soꞌ rihaan nij xrej ata̱ suun noco̱o doj do̱ꞌ, rihaan nij síí uun chij do̱ꞌ, ne̱ cataj nij soꞌ a: ―A̱j cataꞌ tuꞌva núj rihaan Diose̱ se vaa caꞌvej rá núj quiꞌya̱j Diose̱ sayuun man núj sese cha̱ núj me maꞌa̱n rasu̱u̱n ga̱a ataa cavi̱ꞌ Pabló quiꞌya̱j núj a.

¹⁵Cheꞌé dan soj ga̱ yoꞌó nij síí uun chij roꞌ, cata̱j xnaꞌanj soj rihaan tanuu uun chij doj se vaa me rá soj caꞌna̱ꞌ uún Pabló rihaan soj cheꞌé se me rá soj xca̱j sa̱ꞌ soj doj cuentá cheꞌé Pabló, cata̱j soj rihaan tanuu yoꞌ a. Tza̱j ne̱ cuma̱n núj rá chrej, ca̱ráán núj chrej man Pabló, ne̱ se̱ gaa iꞌna̱ꞌ Pabló cuchi̱ꞌ Pabló rihaan soj, quiꞌya̱j núj a̱ man ado̱nj ―taj nij soꞌ rihaan xrej ata̱ suun noco̱o doj do̱ꞌ, rihaan tuviꞌ nij soꞌ síí uun chij do̱ꞌ a.

¹⁶Tza̱j ne̱ cuno xticunꞌ Pabló se vaa caꞌmii nij soꞌ cheꞌé rej ca̱ráán nij soꞌ chrej man Pabló, ne̱ cheꞌé dan caꞌanj soꞌ catúj soꞌ rá cuarteé, ga̱a ne̱ nu̱ꞌ tacuachén soꞌ nana̱ rihaan Pabló a.

¹⁷Ga̱a ne̱ canacúún Pabló caꞌna̱ꞌ yoꞌo̱ nij tanuu uun chij rihaan ꞌo̱ cientó tanuu rihaan soꞌ, ne̱ cataj soꞌ rihaan tanuu yoꞌ a: ―Catu̱u̱ síí tachru̱u̱ nihánj nata̱ꞌ soꞌ rihaan tanuu uun chij doj, qui̱ꞌyáá so̱ꞌ á. ꞌO̱ se vaa nana̱ me rá soꞌ nata̱ꞌ soꞌ rihaan tanuu uun chij doj a ―taj Pabló rihaan tanuu yoꞌ a.

¹⁸Cheꞌé dan nica̱j tanuu yoꞌ man xticunꞌ Pabló, caꞌanj soꞌ rihaan tanuu uun chij rihaan cunuda̱nj nij tanuu, ne̱ cataj soꞌ rihaan tanuu a: ―Síí cuꞌna̱j Pabló síí ꞌni̱j tagaꞌ roꞌ, canacúún soꞌ manj cuchi̱j rihaan soꞌ, ne̱ cachíín niꞌya̱j soꞌ rihanj se vaa caꞌna̱ꞌ síí tachru̱u̱ nihánj rihaan so̱ꞌ qui̱ꞌyáj a. ꞌO̱ se vaa nana̱ me rá síí tachru̱u̱ nihánj nata̱ꞌ soꞌ rihaan so̱ꞌ, taj Pabló a ―taj tanuu yoꞌ rihaan tanuu uun chij doj a.

¹⁹Dan me se coro̱ꞌ tanuu uun chij yoꞌ raꞌa xticunꞌ Pabló, ga̱a ne̱ caꞌanj yaníj ro̱j soꞌ, ga̱a ne̱ xnáꞌanj tanuu yoꞌ man soꞌ, cataj soꞌ: ―Me nana̱ nata̱ꞌ so̱ꞌ rihanj, rá so̱ꞌ ga̱ ―taj soꞌ rihaan síí tachru̱u̱ yoꞌ a.