Apocalipsis 8

1

2

3

4

5

6

7

8

9

10

11

12

13

14

15

16

17

18

19

20

21

22

¹Cˀia⁴ nca³ tsa³cˀa³sje³tˀa³ je² xi³ ma³ña³to³-ni³ sello, ña³qui³ qui³sˀe³jyo¹ ya⁴ ncˀa³jmi³ va³sen³-la⁴ hora.

²Cˀoa⁴ tsa³ˀve³ je² ña³to³ a²ncje⁴ xi³ ya⁴ tjio¹ nqui³xcon⁴ Ni³na¹, cˀoa⁴ qui³tsˀai²-le⁴ ña³to³ čhjao³.

³Ja³ˀai³ xi³ nqui²jnco³ a²ncje⁴, tsa³ca³sen²jna³ nqui³xcon⁴ je² xta², tjin¹-le⁴ jnco³ čhoa⁴ˀi¹ xi³ taon⁴si³ne². A³li² cˀoa⁴cji³ tse³ xo⁴nco¹sja³ qui³tsˀai²-le⁴, jme¹-ni³ nca³ cˀoa⁴-sˀin² cˀoe⁴²son²-si¹ni³ je² cjoa⁴vˀe²tsˀoa³-le⁴ nca³tsˀi³ cho⁴ta⁴-le⁴ Cristo, ya⁴son²-le⁴ je² xta² xi³ taon⁴si³ne² xi³ ti¹jna³ nqui³xcon⁴ je² ya¹xi²le⁴.

⁴Cˀoa⁴ je² ni⁴ˀnti⁴-le⁴ je² xo⁴nco¹sja³ cao⁴ je² cjoa⁴vˀe²tsˀoa³-le⁴ je² cho⁴ta⁴-le⁴ Cristo qui³tsin³ncˀa³-ni³ ntsja³ je² a²ncje⁴ nqui³xcon⁴ Ni³na¹.

⁵Je² a²ncje⁴ qui³scoe¹ je² čhoa⁴ˀi¹, cˀoa⁴ tsa³cˀe¹qui³tse³ čhoa⁴ˀi¹ cao⁴ lˀi¹-le⁴ je² xta², cˀoa⁴ tsa³cˀe¹tsao³son² je² son³ˀnte³. A³li² cˀoa⁴cji³ chˀaon⁴ ja³ne³, cao⁴ jta⁴, cao⁴ lˀi¹chˀaon⁴, cao⁴ chaon¹.

⁶Cˀoa⁴ je² ña³to³ a²ncje⁴ xi³ tjin¹-le⁴ je² ña³to³ čhjao³, tsa³ca³tio²nta³ nca³ qui³si³cja³ne³.

⁷Je² xi³ ti¹tjon² a²ncje⁴ qui³si³cja³ne³ čhjao³, cˀoa⁴ tsˀa³ jtsi¹lao⁴ cao⁴ lˀi¹ xi³ ti¹tsˀo¹jin³ cao⁴ njin¹. Ya⁴ qui³tjo³jon² son³ˀnte³. Je² xi³ ma³-ni³ jan² ya³ jña¹jcha¹, jnco³ ya²-le⁴ qui³ti², cˀoa⁴ qui³ti² nca³yi³je³ xca⁴xcoen¹.

⁸Je² xi³ ma³jao²-ni³ a²ncje⁴ qui³si³cja³ne³ čhjao³. Jo³-ni³ tsa² jnco³ ni³nto³je³ xi³ ti¹ti² qui³ni²cˀa³tjen⁴jin³ ya⁴jin³ nta¹chi³con³. Je² xi³ ma³-ni³ jan² ya³ nta¹chi³con³, jnco³ ya²-le⁴ jo³ njin¹ qui³sˀe³.

⁹Cˀoa⁴ jnco³ ya² xi³ ma³-ni³ jan² ya³ je² cho⁴ xi³ tjio¹jin³ nta¹chi³con³, xi³ ya⁴ tsa³ca³tio²con³, cˀen³. Jnco³ ya² xi³ ma³-ni³ jan² ya³ barco qui³xo³ya².

¹⁰Je² xi³ ma³jan²-ni³ a²ncje⁴ qui³si³cja³ne³ čhjao³. Jnco³ ni³ño³ qui³sca³-ni³ ncˀa³jmi³ xi³ nˀion¹ je³, xi³ ti¹ti² jo³-ni³ tsa² jnco³ lˀi¹ni³cha³. Qui³sca³jin³ jnco³ ya² xi³ ma³-ni³ jan² ya³ nta¹je⁴, cˀoa⁴ ya⁴ jña³ nca³ tjio¹tjo³ na³nta¹.

¹¹Cˀoa⁴ je² ni³ño³ nˀion¹ sja³ ˀmi² jan³ˀain¹-le⁴. Je² xi³ jnco³ ya² xi³ ma³-ni³ jan² ya³ je² na³nta¹ ña³qui³ coan³sja³-ni¹. A³li² cˀoa⁴cji³ cho⁴ta⁴ cˀen³-ni³ je² na³nta¹, nca³ cˀoa⁴-sˀin² nˀion¹ coan³sja³.

¹²Je² xi³ ma³ño³-ni³ a²ncje⁴ qui³si³cja³ne³ čhjao³. Qui³tsin²ˀaon³ jnco³ ya² xi³ ma³-ni³ jan² ya³ tsˀoi¹, cao⁴ sa¹, cao⁴ ni³ño³. Coan³njion² jnco³ ya² xi³ ma³-ni³ jan² ya³ nca³ je². Li²coi³ coan³ˀi³sen³ jnco³ ya² xi³ ma³-ni³ jan² ya³ ni⁴čhjin³, cˀoa⁴ cao⁴ nca³ ni⁴tjen⁴.

¹³Qui³sco²tsen³, qui³nčhˀoe³-le⁴ jnco³ a²ncje⁴ xi³ qui³tjen⁴ ya⁴ nca³va³sen³-le⁴ ncˀa³jmi³. Nˀion¹ qui³nchja⁴: Ma⁴-xo¹ni³, ma⁴-xo¹ni³, ma⁴-xo¹ni³ je² xi³ tjio¹ ya⁴ son³ˀnte³, xi³ to⁴coi³ cjoa⁴-le⁴ xi³cˀa³ jta⁴-le⁴ je² čhjao³ xi³ je² jan² a²ncje⁴ sˀa⁴ si⁴²cja³ne³.