1Sar phundraďa o Bakroro e eftato pečať, sas pro ňebos čhit vaj pre jepaš ora.
2Dikhľom efta aňjelen, save ačhen anglo Del a sas lenge dine o efta trubi.
3Avľa jekh aver aňjelos a ačhiľa paš o oltaris. Sas les somnakuno thuvalo čaroro a chudľa but kaďidlos, hoj les te thovel le modľitbenca savore sentne manušengere pro somnakuno oltaris, so hin anglo tronos.
4O thuv le kaďidlostar avelas jekhetane le sentne manušengere modľitbenca andral o vast le aňjeloskero upre anglo Del.
5Paľis iľa o aňjelos o thuvalo čaroro, pherarďa les la jagaha pal o oltaris a čhiďa les pre phuv. Avle o perumoskere hangi, herminelas, sas o bleski a e phuv razisaľolas.
6Ola efta aňjela, saven sas o efta trubi, pes pririchtinde te trubinel.
7Ešebno aňjelos zatrubinďa a o ľegi the e jag mišimen le rateha sas čhido pre phuv. A zlabiľa jekh treťina la phuvatar, jekh treťina le stromendar the savori zeleno čar.
8Dujto aňjelos zatrubinďa a ajso vareso sar baro verchos, so labolas la jagaha, sas čhido andro moros. A jekh treťina le morostar pes čerinďa pro rat
9a muľa jekh treťina le moroskere džvirinendar a jekh treťina le loďendar sas zňičimen.
10Trito aňjelos zatrubinďa a andral o ňebos peľa jekh bari čercheň, so labolas sar e fakľa a peľa pre jekh treťina le paňendar the pro chaňiga.
11Odi čercheň pes vičinel Palina. Jekh treťina le paňendar kirkiľa a but manuša mule le paňendar, bo kirkile.
12Štarto aňjelos zatrubinďa a sas zňičimen treťina le khamestar, treťina le čhonestar the treťina le čercheňendar avke, hoj kaľiľa andre. A jekh treťina le dživesestar na sas svetlos a avke sas the prekal e rat.
13Paľis dikhľom a šunďom jekhe orlos, sar leťinel upre a vičinelas zorale hangoha: “Jaj, vigos, vigos, vigos olenge, save bešen pre phuv, bo posledna trin aňjela mek mušinena te trubinel!”
