Apocalipsis 8

1

2

3

4

5

6

7

8

9

10

11

12

13

14

15

16

17

18

19

20

21

22

¹Echiriꞌ ri Qꞌapoj Bꞌexex xulochꞌij ruwuq sello nakꞌal che ri jubꞌotaj wuj, laj juna mey ora lik xtzꞌintzꞌot chilaꞌ chikaj, na jinta chi kꞌo xtatajik.

²Tekꞌuchiriꞌ, xebꞌenuwil ri wuqubꞌ ángeles e takꞌal chwach ri Dios y xyaꞌ kꞌu jun trompeta chikijujunal.

³Xkꞌun chi lo jun chik ángel y xtakꞌiꞌ chwach raltar. Waꞌ rukꞌaꞌam jun rachpom re oro. Y xyaꞌ kꞌu ukꞌiyal incienso che re kuꞌan bꞌi xa jun rukꞌ taq ri ki oraciones konoje rutinamit ri Dios yey waꞌ e qasaꞌn chwi raltar re oro kꞌo chwach ri tzꞌulibꞌal re taqanik.

⁴Lik kabꞌuqbꞌut kꞌu ri sibꞌ xel chupa ri rachpom kꞌo puqꞌabꞌ ri ángel y xopon kꞌa chwach ri Dios junam rukꞌ taq ri ki oraciones rutinamit ri Dios.

⁵Ekꞌu ri ángel xukꞌam ri rachpom y xunojisaj che ri rachqꞌaꞌl kꞌo chwa raltar. Tekꞌuchiriꞌ xupukꞌij lo che ruwachulew. Ewi xtataj uchꞌawibꞌal jabꞌ karaqlajik y kajininik, y xyokꞌ kaꞌn ruxeꞌ kaj; yey xpe jun nimalaj kabꞌraqan.

⁶Ri wuqubꞌ ángeles, ri kukꞌaꞌam ri wuqubꞌ trompetas, xkiyijbꞌaꞌ kibꞌ che uchꞌawisaxik taq waꞌ.

⁷Ri nabꞌe ángel xuchꞌawisaj rutrompeta, y xpe kꞌu saqbꞌach rachbꞌiꞌil aqꞌ rukꞌ kikꞌ chwi ruwachulew. Y ruma waꞌ xkꞌat rurox parte che ruwachulew, xkꞌat rurox parte che ronoje taq ri cheꞌ, ri tikoꞌn y raqꞌes.

⁸Rukaꞌm ángel xuchꞌawisaj rutrompeta, y kꞌo xtzaq chwi ri mar pachaꞌ juna juyubꞌ kajumuw aqꞌ che. Y ruma waꞌ rurox parte che ri mar xuꞌan kikꞌ uwach.

⁹Y xekam kꞌu rurox parte chike rawaj e kꞌo chupa ri mar yey rurox parte chike taq ri barcos e kꞌo chwi ri mar, xsach kiwach.

¹⁰Rurox ángel xuchꞌawisaj rutrompeta, y jun nimalaj chꞌumil kajumuw aqꞌ che xtzaq lo chikaj puwi rurox parte che taq ri raqanaꞌ y taq rakꞌal pa kalax wi lo yaꞌ.

¹¹Rubꞌiꞌ waꞌ wa jun chꞌumil e “Kꞌa”. Ewi rurox parte che taq ri nimayaꞌ lik xuꞌan kꞌa; y ukꞌiyal winaq xekam ruma rukꞌayul ri yaꞌ.

¹²Rukaj ángel xuchꞌawisaj rutrompeta, y lik xꞌan kꞌax che rurox parte che ri qꞌij, che ri ikꞌ y chike ri chꞌumil. Xqꞌobꞌ kꞌu taq ruwonibꞌal waꞌ, jelaꞌ xujeq kamoymot uwach ri saq paqꞌij y xuꞌan más qꞌequꞌm raqꞌabꞌ.

¹³Tekꞌuchiriꞌ xinwil jun águila kaxikꞌikꞌ chikaj y xinto jewaꞌ kasikꞌin che ubꞌiꞌxikil: «¡Toqꞌoꞌ kiwach! ¡Toqꞌoꞌ kiwach! ¡Toqꞌoꞌ kiwach konoje ri ejeqel che ruwachulew ruma ri kakikꞌulumaj echiriꞌ ri oxibꞌ ángeles kakichꞌawisaj ri jujun chik trompetas! ¡Ma ya e kuꞌana waꞌ!» kachaꞌ.