Kamapim Tok Hait 8

1

2

3

4

5

6

7

8

9

10

11

12

13

14

15

16

17

18

19

20

21

22

¹Eaꞌ sipsip noganai nahapeꞌ tep anama nafeꞌma 7i nowaꞌ buk anama eaꞌ ina ataꞌ owaꞌ anom amamaga mondaꞌam, owaꞌ. Eaꞌ ina anom basef mataga heven mape mafeꞌ mafeꞌma nogota siꞌi awa tuꞌwaninai, owaꞌ.

²Amama mafeꞌma eaꞌ, ati ensel amama 7-peleim laꞌelaꞌef maitu naep Godi mofaꞌ biugel anama 7-pelaina nandandam.

³Eaꞌ anona ensel nafiꞌi naitu felefeleꞌma balata sondolali ma Goda. Nahapila anona plet gol ama nondaꞌ nogoh alogw buꞌwami maꞌami. Esis saseꞌana sanda hiami ma nondaꞌ nogoh amama ma anan nokolasom moloma beten amam nematawa hiesi Godi. Eaꞌ nandaꞌ ofa ma God balata anama sandaꞌ gol sandaꞌanai notawa felefeleꞌma balata kingi.

⁴Eaꞌ nogoh maloma sanda amama alogw maꞌami maloma beten esis amam nematawa Godi, amama mandatama etifigin malata ilifa naep Godi.

⁵Eaꞌ ensel anama nofaꞌ plet anama doꞌok sanda amama malami eaꞌ nofaꞌ nifa balata sondolalima Godanai nowalam plet, eaꞌ nakwahom muwai etap. Anan nakwahom eaꞌ, otaga holala, anom amamaga mataga mandaꞌam, howalagon nafeꞌ sowambon luꞌunai nasol etin nape.

⁶Eaꞌ ensel amama 7-peleim mahapila biugel anama 7-pelaina mandandombola mufapula biugel anama.

⁷Ensel naliꞌi nofapula biugel ananinai eaꞌ ais afitimi siꞌi otamba pohalami maloma nif maloma esimbel lolaꞌam mataga heven eaꞌ nokoloꞌ ais maloma esimbel mowai etap. Amam mawaloga etap hiagoma naloma lawah hiami mataga wenifigin. Eaꞌ nif fando etap waꞌagon eaꞌ biefigin nape. Eaꞌ otalef hiami maluwi amama wapotiꞌ eaꞌ nif fandom hiꞌalam.

⁸Eaꞌ ensel anama nafeꞌma bifi nofapula biugel ananinai, esis sakwaha anom amamaga siꞌi halaf fandonai nandegia nafeꞌ nowala naoh. Eaꞌ sawala naoh mataga wenifigin eaꞌ waꞌam mandamboma mataga esimbel biefigin nape boꞌwagon.

⁹Eaꞌ sawaloga amamaga amama hiami mape naohi ambagof namumi mapaimi sawalogam mataga wenifigin eaꞌ waꞌam magaꞌ biam mape boꞌom. Eaꞌ sawaloga sip hiami mafeꞌ naohi wapotiꞌ sawalogam mataga wenifim eaꞌ waꞌom aom biam mape boꞌom.

¹⁰Eaꞌ ensel anama nafeꞌma wanomi nofapula biugel ananinai, anona ondoꞌw luꞌunai nandegia heven fandona fofol etin siꞌi nembaꞌw fandonai nowai etap. Esis sawaloga walembeh hiami maloma embel hiami motah etapi sawalogam mataga wanom eaꞌ ondoꞌw anama nafeꞌ nowala embel tuꞌwanim motah waꞌili. Waꞌel aom eaꞌ waꞌol biefigin mape boꞌom.

¹¹Ondoꞌw agiliꞌnama anama saꞌi, marasin Anama Numbutinai. Eaꞌ sawaloga walembeh embel hiami sawalogam mataga wanom, eaꞌ waꞌom mataga siꞌi marasin numbutinai. Eaꞌ biefigini mape boꞌom. Eaꞌ epes hiesi saꞌ embel amama awami maofa opalef asasimi sagaꞌ hiꞌalas.

¹²Eaꞌ ensel anama nafeꞌma biamibiam nufapula biugel ananinai, esis sawaloga aon owambunai alipunai naloma ondowa sawalogam mataga wanom. Eaꞌ sahambombaga waꞌom mataga akutim. Eaꞌ nemaf aꞌipanama sowalogana wanom. Etifigin akutigin, biefigin howalgon. Eaꞌ owamb tuꞌwanina naꞌama etin siꞌi alip.

¹³Eaꞌ ati anona komon luꞌunai nufiaꞌ nafeꞌ laꞌafen gani ilif ameꞌana naꞌi mehip naꞌi, “Uwahipis uwahipis endilisi esis amam nematawa sape etapi ma nimanimi luꞌwami wapotiꞌ motagamas. Deiꞌ main, anom ensel wanom maꞌi mufapula biugel amamunai ma nambimb nimanimi amama motagamas!”