1Pues entonces e ángel cay uwirsen inteꞌ xucur xeꞌ galan charan ut xeꞌ jax tuaꞌ e cuxtar xeꞌ machi tuaꞌ acꞌapa. Y e jaꞌ era janchꞌaquen ut uwirnar bꞌan cocha e vidrio. Pues e xucur era locꞌoy tama uturtar Catata Dios y tuaꞌ e Cordero
2y ixin tuyuxin e calle xeꞌ más bꞌajxan tama e chinam era. Y tama inxejr inxejr e xucur era war e sian teꞌ xeꞌ tuaꞌ e cuxtar xeꞌ machi tuaꞌ acꞌapa. Y acꞌawan e teꞌ era tama inteꞌ inteꞌ mes, xeꞌ war che que uyajcꞌu uyutir doce veces tama inteꞌ año. Y uyopor e teꞌ era acꞌampesna tuaꞌ utzꞌacpes tunor e sian chinamobꞌ.
3Y matucꞌa e bꞌax tama e chinam era. Y yajaꞌ turu uturtar Catata Dios y tuaꞌ e Cordero. Y tunor umanobꞌ e Dios cꞌani uyujtzꞌiobꞌ ut jaxir.
4Y tunor umanobꞌ e Dios era cꞌani uwirobꞌ ut e Dios, y aquetpa tzꞌijbꞌabꞌir ucꞌabꞌa e Dios tut ujorobꞌ.
5Y tama e chinam era matucꞌa e acbꞌariar, y tin e turobꞌ yajaꞌ machi ixto tuaꞌ ucꞌampesobꞌ e cꞌajc y nien e qꞌuin porque jax Cawinquirar Dios xeꞌ tuaꞌ axin ujanchꞌacnes tunor e lugar era. Y tin e turobꞌ tama e chinam era cꞌani acꞌotoriobꞌ iraj iraj.
6Entonces ojron e ángel tacaren y che: —Erach tunor e ojroner lo que war oybꞌi era, y tawar tuaꞌ acojco tamar porque tari tuaꞌ e Dios. Pues jax Cawinquirar Dios era xeꞌ cay ubꞌijres ixin tunor e profetobꞌ y jax jaxir xeꞌ uyebꞌta tarien tuaꞌ inwirse umanobꞌ lo que cꞌanix anumuy era, che uyaren e ángel.
7Y che e Jesús: —Waten wacchetaca. Chojbꞌesbꞌir tunor tin e uturbꞌa ubꞌa tamar lo que tari tuaꞌ e Dios xeꞌ chꞌar tzꞌijbꞌabꞌir tama e jun era, che e Jesús.
8Pues nen xeꞌ Juanen cay umbꞌi y cay inwira tunor era. Pero conda cꞌapa umbꞌi y conda cꞌapa inwira tunor era entonces cotuanen tut e ángel xeꞌ cay uwirsen tunor era tuaꞌ unjtzꞌi ut.
9Pero jaxir uyaren: —Ira ache cocha era porque nen manen tuaꞌ e Dios bꞌan cocha net y bꞌan cocha tunor iwermanuobꞌ xeꞌ jax e profetobꞌ y tunor tin e war uturbꞌa ubꞌobꞌ tamar lo que chꞌar tzꞌijbꞌabꞌir tama e jun era. Ujtzꞌin ut e Dios jax taca, che e ángel.
10Entonces ojron e ángel tacaren otronyajr y che: —Ira amuqui e ojroner lo que irsenet umen e Dios xeꞌ chꞌar tzꞌijbꞌabꞌir tama e jun era, porque watarix e día conda cꞌani acꞌapa achempa tunor.
11Pero tin e mabꞌambꞌan uwirnar uchic más e mabꞌambꞌanir, y tin e calapir uwirnar uchic más lo que calapir. Pero tin e war uche lo que imbꞌutz uchic más lo que imbꞌutz tut e Dios, y tin e erach uwirnar uchic más lo que erach tut e Dios, che e ángel.
12Entonces ojron e Jesús y che: —Nen waten wacchetaca. Y cꞌani intares e tuanibꞌir tuaꞌ intoyi uyeror inteꞌ inteꞌ gente bꞌan taca cocha tawar tuaꞌ uchꞌamiobꞌ tamar lo que cay uchiobꞌ tara tor e rum.
13Nen ucajyesnibꞌiren tama tunor lo que ayan, y nen ucꞌapesnibꞌiren tama tunor lo que ayan ubꞌan. Bꞌanen cocha e letra A xeꞌ jax e bꞌajxan letra tama e abecedario y bꞌanen cocha e letra Y xeꞌ jax ucꞌapesnibꞌir tama e abecedario, che e Jesús.
14Tzayenic tunor tin e axin upojchi ubꞌujcobꞌ tama uchꞌichꞌer e Cordero, porque jaxirobꞌ tuaꞌ aquetpobꞌ tawar tuaꞌ uchꞌamiobꞌ uyutir e teꞌ xeꞌ uyajcꞌu e cuxtar xeꞌ machi tuaꞌ acꞌapa, y tuaꞌ aquetpobꞌ tawar tuaꞌ oꞌchoyobꞌ tama e nuxi puerta xeꞌ jax e ocher tama e chinam era.
15Pero ucꞌani tuaꞌ aquetpobꞌ patir tunor tin e uyusre uchiobꞌ e mabꞌambꞌanir xeꞌ más intuj, y tunor tin e abꞌaxon, y tunor tin e uchiobꞌ lo que uyusre uche uwerir, y tunor tin e achamsan, y tunor tin e uyujtzꞌiobꞌ ut e chamen dios, y tunor tin e amajresian. Tunor tin e axin uchiobꞌ cocha era ucꞌani tuaꞌ aquetpobꞌ patir e chinam era.
16Entonces e Jesús che: —Nen inwebꞌta ixin niwangel tuaꞌ uchecsu tunor era toit net xeꞌ Juan y net ucꞌani tuaꞌ isutpa achecsu tunor era tut e sian grupo ajcꞌupesiajobꞌ. Nen tarien tama uchꞌajnarir e rey David xeꞌ turuan tama e onian tiempo y tamar era nen sitzbꞌiren tuaꞌ. Y nen bꞌanen cocha e lucero xeꞌ ejpray ut xeꞌ alocꞌoy conda war asacojpa, che e Jesús.
17Y de allí ojronobꞌ Unawalir e Dios y tin e tuaꞌ anujbꞌi taca e Cordero y chenobꞌ: —Lar. Pues ojronic tunor tin e uyubꞌi e ojroner era y che: —Lar. Tin e ataqui utiꞌ, taricobꞌ jay bꞌan ucꞌani, taricobꞌ tuaꞌ uyuchꞌi e jaꞌ xeꞌ uyajcꞌu e cuxtar xeꞌ machi tuaꞌ acꞌapa, y matucꞌa e tumin tuaꞌ usati tamar.
18Pues tunor tin e axin uyubꞌi lo que chꞌar tzꞌijbꞌabꞌir tama e jun era xeꞌ irsenen umen e Dios, ayan lo que cꞌani inwareox. Jay ayan tin e axin utzꞌaqui más ojroner tamar lo que chꞌar tzꞌijbꞌabꞌir tama e jun era, e Dios tuaꞌ axin uturbꞌa tunor e sian cꞌuxner tama ujor bꞌan cocha chꞌar tzꞌijbꞌabꞌir tama e jun era.
19Y jay ayan tin e axin ulocse inteꞌ ojroner xeꞌ quetpa tzꞌijbꞌabꞌir tama e jun era xeꞌ irsenen umen e Dios, e Dios tuaꞌ ulocse ubꞌan tuaꞌ machi ucꞌuxi uyutir e teꞌ xeꞌ tuaꞌ e cuxtar xeꞌ machi tuaꞌ acꞌapa, y tuaꞌ machi oꞌchoy tama e chinam xeꞌ erach xeꞌ chectesna tama e jun era.
20Pues jaxir xeꞌ war uchecsu tunor era che: —Nen waten rajxa era. Bꞌan ya Cawinquirar Jesús, lar.
21Que Cawinquirar Jesús axin utacriox inteꞌ intiox. Tara acꞌapa tunor niwojroner, che e Juan.
