1Dee enjele dokome lete katasingi endaki andake galasa joo polepole pipae doko namba laitaka pia. Endaki doko Gotepa Sipisipi Yakane dokopanya isoo petenge toko dokonya lee kuiyatala taono kaitini andake dokonya kainanya liyoo pea. Endaki dokonya omotena aetenapi lete katasingi ita dupa katea. Ita tata dokome ee kana mendainya paa kingi ita-kisa dee lapomasa dii mandelyamo doko kana dii lao mandenge-pyaa. Ita yoko dokome yuu pitakanya endakali dupa auu pisalanya katenge-pyaa.
3Goteme mendita mende auu nakayapala nepatoo lao masilyamo doko dee nakatata. Taono dokonya Gotepa Sipisipi Yakane dokopanya isoo petenge toko doko setamopa, Gotenya kendemane dupame baa lao tama pyoo katatami.
4Dupame baanya lengelyaapi kandataminopa baame baanya kenge doko dupanya langalunya pepa pyanya katata.
5Yuu doko dee iminjala nayata. Kamongo Goteme endakali dupa tii pisetamo dokonya lamapi nikipi dupame tii pisina lao dupanya mende yangyala nayata. Dokopa dupame koteaka lao kiŋi joo isoo katatami.
6Dokopa enjele dokome namba langyoo lao pituu, “Pii buku dakenya pyatae silyamo dutupa angi kiningi etete. Potopesa dupanya masingi sakatasingi Kamongo Gote dokome baanya kendemane dupa-kisa yapa pipenge dupa baanya enjele dokome laitaka pyaa pena leana,” lea.
7Dopa leamopa Jisasame lao pituu, “Kandeleno! Namba yapa ipato. Gotenya opale tanga pitamo pii buku dakenya silyamo dupa watao miningi endakali dokome mona yaepao katenana,” lea.
8Namba Joneme pii dutupa kaleme soo oapi dutupa lengeme kandao pio. Dopa petala oapi namba laitaka piamo enjele doko tama pyaanya moko kateamo dosa isa luma lakeo.
9Dopaka doko, baame namba langyoo, “Embame dopa napi. Embapi, embanya masoo miningi kaiminingipi, potopesa dupapi, buku dakenya pii lapae watao miningi endakali dupapi dupa-pipa namba kalai mendai pingina, embame Gote lao tama pipi,” lea.
10Deaka baame lao pituu, “Gotenya pii bukunya silyamo doko embame yalo napipi. Pii lapae dokome pitana lelyamo dokonya gii doko tengesa petelyamo.
11Koo pingi endakali dupame koo pyoaka katena. Mana koo miningi endakali dupame mana koo minawaka katena. Mana tolatae miningi endakali dupame mana tolatae minawaka katena. Etete epe joo katenge endakali dupame etete epe jowaka katenana,” lea.
12Jisasame lao pituu, “Kandeleno! Namba yapa ipato. Endakali mendai mendai lao dupame mana minataminoli pyoo nambame yole maiyanya ipato.
13Tee pingipi etengepi doko namba. Etete wambawapi etawapi doko namba. Oapi dupanya tee pyawapi etawapi doko nambana,” lea.
14Nyakamanya yonge pee londe kaimbu pingi endakali dupa mona yaepao kalyamino. Doko, dupame kapa pao lete katasingi ita dokonya dii lyao napala lome kambu dupanya-kaita taono dokonya kapa pao patami.
15Endakali yana jepae dupapi, nemango miningipi, endakalipi nyele-nyele paengepi, endakali pyao kumasingipi, sambo gote tama pyoo katengepi, sambo mana auu kayao miningi dupa pitakapi, dupa Gotenya taono dokonya kamalya katatami.
16“Namba Jisasame sosa dupa lao masetala nambanya enjele dokome pii dutupa nyakama-kisa lao panasala epena leo. Namba Dapitinya mandipaenya mandipae doko. Yuu yongao bui katenge etete tii pipae doko nambana,” lea.
17Sipitisa dokopa Sipisipi Yakanenya enda dokopa dolapome lao pituu, “Emba ipu,” leambi. Pii doko setamo endakali dokome “Emba ipu,” lapengeaka. Dokopa endaki nanu kayata endakali doko ipupenge. Endaki napuli lao masetamo dokome lete katasingi endaki Goteme mee dingi doko ipao napenge.
18Buku dakenya pitana lapae silyamo pii dupa setamino endakali dupa pitaka kandao, namba Joneme pii kyoto dake lelyo. Endakali mendeme buku dakenya pii waka mende waipa setamo kandao doko, pii kenda pipae buku dakenya pyapae silyamo dupa endakali doko-kisa Goteme setata.
19Endakali mendeme Gotenya pii buku dakenya silyamo dupanya mende nepatamo kandao doko, lete katasingi ita buku dakeme lelyamo dokonya, baanya dii yangi Goteme nyoo nepatala, dee taono etete epe buku dakeme lelyamo dokonya, baa epena lao kayala nayataka.
20Pii dutupa lelyamo dokome lao pituu, “Kiningi etete, namba yapa ipatona,” lelyamo. Kapana, Kamongo Jisasa, emba ipu.
21Kamongo Jisasame Gotenya endakali pitaka kandao mona epe palena.
