1Numur a ensel i ese tar a danim na nilaun torom iau, i talapor elar nama galas. I sal pat tagun a kiskis na king anun o God, anunder tomo nama Barman na Sipsip,
2ma i sal epotor una labino kisapi, una tamon ra. In nanai na nilaun, i tur un aru papor ina danim ra. I ser wu a noino ma aru ngas na wino. Una kum kalang rop, i ser wu, a noino ma aru dino una arara kilalo. Ma a kum dono det ser ulangolango a taro tagun a kum gapman rop gusun a kum misait.
3Katu utna melet mo ra a kankan anun o God i kis uni. O God tomo nama Barman na Sipsip kura der una kiskis na king una tamon ra. Ma a kum tultul anun o God det in lotu toromi.
4Det in tama in masarino, ma din tumus tar a risano una kum masarindet.
5Katu mirum melet mo. Ka det in ling melet mo sur a talapor ina lam o a talaporin in matanas, uni a Labino o God ut in pitar a talapor tandet. Ma det in warkurai elar nama kum king, ken rop ma ken rop.
6A ensel i watungi tang lena, “A kum wasiso ri, i lingmulus ma i topasi sur din nurnur uni. A Labino, o God ra i mugu a nion a kum poropet sur det in upuaso anun a kum wasiso, i tulu ru anun a ensel sur in ese tar anun a kum tultul una kum utna ra milau in nanpat.”
7O Iesu i watungi lena, “Tama i, milau mo an nanpat! Osi ra i mur a kum wasiso na poropet tagun a buk ri, i dan.”
8Iau o Jon, a sa longoro tar a kum utna ri, ma a sa tama tari. Ra a sa longoro tari, ma a sa tama tari, a puku pirso nama urur nisan aru kikin a ensel sur an lotu toromi, a ensel ra i ese tar a kum utna ri tang.
9Ikut i watungi tang lena, “Gong! Iau kai, a tultul kut, elar nam ui ma a kum tistisim, a kum poropet ma det rop kai ra det mur a kum wasiso tagun a buk ri. Un lotu torom o God!”
10Ma i watungi tang lena, “Gong u pidik bat a kum wasiso na poropet tagun a buk ri, uni a du bung ra a kum utna ri in nanpat, i sa milau.
11Osi ra a tene sakino din madek ru i sur in pami ut anun a kum sakino, ma osi ra i dur, din madek ru i sur in pami ut anun a kum dur na petutna, ma osi ra anun a petutna i tokodos, din madek ru i sur in pami ut anun a tokodos na petutna, ma osi kai ra anun o God, din madek ru i sur in pami ut anun a petutna ra o God i nemi.”
12O Iesu i watungi lena, “Tama i, milau mukut an nanpat! An nanpat tomo nama ikul, ma an pitari torom a taro rop elar ut nama nundet a kum pinapam taktakai.
13Iau a Alpa ma a Omega, a mugu sakit ma a mur sakit, a turturkibino ma a ururopino.
14“Det ra det gos anundet a kum malu, det dan, ma i tokodos sur det in nangon tagun in nanai na nilaun, ma det in ruk una matansako ina in noworo ina tamon ra.
15Ikut a kum pap, ma a kum tene sangsagor, ma det ra det pam a kum pamuk na petutna, a kum tene um doko a taro, a kum tene lotu torom a kum torotoro na god, ma det ra det nem a torotoro ma det pami, kura det upiso unin noworo.
16“Iau o Iesu, a tulu ru anung a ensel sur in pitar a wasiso talapor ri torom mot a taro na lotu una kum tamon. Iau in wakakorin o Dewid ma a tubunu, ma in borodo ra i talapor doko.”
17A Tokodos na Nion ma a matok na nolin na ino, der watungi lena, “Wan urin!” Ma osi ra in longoro i, i kai in watungi lena, “Wan urin!” Osi ra i muruk, i wakak sur in nan urin, ma osi ra i nemi, in inum tagun a danim na nilaun ra ka din kuli.
18A utumarong det rop, ra det longoro a wasiso na poropet tagun a buk ri: Ra taio in tugus tari nam tu wasiso gisen, o God in tugus tari kai a kum ukadik toromi, ra di sa wasiso talapor taru uni una buk ri.
19Ra taio in rakon ru tu wasiso na poropet tagun a buk ri, o God kai in rakon ru anun a tinibo gusuni tagun in nanai na nilaun, ma tagun a tamon anun o God, ra di sa wasiso talapor taru uni una buk ri.
20O naro ra i wasiso talapor una kum utna ri, i watungi lena, “Lingmulus, milau mo an nanpat.” Amen. Labino o Iesu wan urin.
21A marmaris anun a Labino o Iesu in kis tomo nama taro rop anun o God. Amen.
