1Cottimeja jehe ángel mé cjoagohna ná río de jinda que ẍonhi jinche chonda, co jinda mé tti danjo iná vida naroaxin. Jinda mé anto dicondoxin ni nda inchin ná ẍoẍao, co jidac̈hjexin jinda mé de ngain nttaxintaoen Dios conixin de ngain Colecoe.
2Ngosine tti nttiha icha importante de ciudad mé co cayoixin ngandehe río mé te tti nttá que danjo vida. Co nttá mé danjo ntta ttochjoin tteyó nttiha ngá nano ixin danjo ntta ttochjoin cada conittjao. Co qué nttattochjoin mé jian ca para xingamenxin chojni de cainxin nación.
3Nttiha seha chojni ni ẍonhi cosa que Dios joinchecondená. Nttiha sehe nttaxintaoen Dios conixin jehe Colecoe ngain ciudad mé, co ninchehe ẍé Dios co Jesucristo sinchecoanxinhi na jehe.
4Jehe na sicon na ngá con Jesucristo co jehe sicon ngá con na jehe na, co nganito nttattjen na setaxin nombré jehe.
5Nttiha iẍonhi naxin xehe sehe, co cain chojni que sintte nttiha isondeha na ẍohi de lámpara, ni de nchanho, ixin Dios tti chonda cain joachaxin, jehe tti sinchengasañehe na, co jehe na nitsetonha para cainxin tiempo.
6Cottimeja ángel mé ndachjenji na janha: ―Cain palabra jihi ndoa co nchao sehe confianza ngain palabra jihi. Co jehe tti chonda cain joachaxin, que mé Dios mismo que nchenohe cain chojni que nichja joajné, jehe Dios rroanha ángel de jehe para joicjagoe cain ninchehe ẍé tti siconhe toin.
7Co Jesucristo ndac̈ho: ―¡Janha sihi toin! ¡Anto c̈hjoin para ixin cain tti chojni que nchehe caso joajné Dios que jitaxin ngain libro jihi!
8Janha Juan coian co vicon cain cosa jihi. Co después de coian co vicon, joarittoxin nttajochjihna ngaca rotté ángel tti cjoagohna cain jihi para rrojinttasayá.
9Pero jehe ndachjenji na: ―Ncheha yá, ixin janha jeho ná ninchehe ẍé Dios, jañá inchin jaha conixin cain chojni que nichja de ixin Dios conixin cain chojni que nchehe caso tti jitaxin ngain libro jihi. Jaha nchesayehe Dios.
10Cai ndachjenji na ángel mé: ―Jaha, ttemaha joajné Dios que jitaxin ngain libro jihi, ixin ochian joí tiempo que siconhe cain tti jitaxin nttihi.
11Mexinxin tanc̈hjanda que tti chojni jianha sinchehe na sigue nchehe na tti jianha, co tti chojni ttjoaha sinchehe sigue ngain tti ttjoaha; pero tti chojni jian sinchehe na sigue de nchehe na tti jian, co tti chojni que coequininxin para ixin Dios sinchehe na sigue de ditticaon na jian cainxin tiempo ngain Dios.
12Co Jesucristo ndac̈ho: ―Ján, janha sihi toin. Co siquian premio que rrochjaha cada chojni, inchin jehe na joinchehe na.
13Janha tti icha saho varichon de cainxin cosa co janha tti sarihi are cainxin cosa ndatsjexin, jañá inchin tti letra A saho de cain letra co inchin Z tti último de cain letra.
14Anto c̈hjoin para ixin tti chojni que ttjén lonttoe para rrochonda na joachaxin de sine na ttochjoin de ngain tti nttá que danjo vida, co jamé nchao sixinxin na ngain cain puerté ciudad mé.
15Pero tti chojni jianha sittohe na ndoja conixin tti chojni que dantonga icha chojni, co tti chojni que chonda nc̈hicoxehe o xicoxehe, co tti chojni que dantsjehe vidé icha chojni, co tti chojni que nchesayehe ídolo, conixin cain tti chojni que anto rinao ncheyehe icha chojni.
16Co Jesucristo ndac̈ho: ―Janha Jesús orroanha ángel de janha para joinchenohe cain jihi chojni de cain nihngo. Janha tti joixin de ngain razé rey David, co janha tti conotse que anto soji nchengasán are nttoyo.
17Espíritu Santo co c̈hihi Coleco ndac̈ho: ―Ẍacoi. Co cain tti ttinhi jihi ndac̈ho: ―Ẍacoi. Cain ra ẍo senhe ra jinda co ẍo sinao ra sihi ra, ẍacoi ra co sihi ra jinda que danjo iná vida naroaxin, co ẍonhi tomi tsjenga ra hna.
18Janha Juan rrindac̈hjan janhi ngain cainxin chojni que ttinhi co nchehe caso joajné Dios que jitaxin ngain libro jihi: Si c̈honja chojni sinchecoenhe na chojni icha cosa de ixin tiempo que tsí que jeho cosa que jitaxin nttihi, Dios rrochjé na icha tsje castigo de tti cain castigo que jitaxin ngain ẍón jihi.
19Co si c̈honja chojni santsjehe na masqui nchion de ngain joajné Dios que jitaxin ngain ẍón jihi, Dios santsjehe na tti parte que jehe na chonda na ngain tti libro tti tetaxin nombré cain chojni que chonda na iná vida naroaxin, co santsjehe na tti parte que jehe na chonda na ngain tti ciudad santa. Co ẍón jihi nichja de ixin libro mé co ciudad mé.
20Tti ndac̈ho cain cosa jihi, jehe ndac̈ho: ―Ján, janha sihi toin. Amén. ¡Ẍacoi, soixin Jesús!
21Que Jesucristo, tti chonda cainxin joachaxin para ixin ján na, sinttanchaon cainxin ra. Amén.
