1Sikaďa mange žužo baro paňi, o paňi le dživipnaskero, so bľišťisaľolas sar o krištalos a avel avri andral le Devleskero the le Bakroreskero tronos
2a džal maškar e uľica le foroskeri. A pal o soduj seri le paňeske sas o stromos le dživipnaskero, so anel dešuduvar beršeste ovocje: Sako čhon del peskero ovocje a o prajti pal o stromos hin pro sasťipen le narodenge.
3Andro foros na ela ňič, so hino prekošlo. Le Devleskero the le Bakroreskero tronos ela andre leste a leskere služobňika leske služinena.
4Dikhena leskero muj a leskero nav ela pre lengere čekata.
5E rat imar na ela, na kampela lenge o svetlos la lampatar aňi le khamestar, bo o Raj, o Del, ela lengero svetlos. A on kraľinena furt pro furt.
6A phenďa mange o aňjelos: “Kala lava hine pačivale the čačipnaskere. O Raj, o Del, savo del le proroken peskere Duchos, bičhaďa peskere aňjelos, hoj peskere služobňikenge te sikavel, so pes mušinela sig te ačhel.”
7O Ježiš phenel: “Dikh, avava sig! Bachtalo hino oda, ko doľikerel o prorocke lava kale zvitkoskere!”
8Me, o Jan, oda dikhľom the šunďom. Sar oda dikhľom the šunďom, peľom paš o pindre le aňjeloske, savo mange oda sikavelas, hoj les te lašarav.
9Ale ov mange phenďa: “Ma ker ada! Bo the me služinav le Devleske avke, sar tu the tire phrala, o proroka the ola, save doľikeren o lava kale zvitkoskere. Anglo Del banďuv!”
10A phenďa mange: “Ma zapečaťin andre a ma garuv o prorocke lava andral kada zvitkos, bo e ora hiňi pašes!
11Ko kerel o nalačhipen, mi kerel o nalačhipen dureder; o melalo mi ačhel dureder melalo; o čačipnaskero mi kerel dureder o čačipen a o sentno mi ačhel dureder sentno.”
12“Dikh!” phenel o Ježiš: “Avava sig a miro počiňiben hin manca, hoj te počinav sakoneske pal leskere skutki.
13Me som e Alfa the Omega, o Ešebno the o Posledno, oda, ko savoro chudel te kerel a the savoro dokerel.
14Bachtale hine ola, save peske rajbinen o gada. Len ela pravos ko stromos le dživipnaskero a šaj džana andro foros prekal o brani.
15Ale avri ačhena o rikone, o čaroďejňika the ola, save keren o lubipen, save murdaren, save služinen le sochenge, the sako, ko rado dikhel o klamišagos the savore klamara.
16Me, o Ježiš, bičhaďom mire aňjelos, hoj tumenge te vakerel avri kala veci pal o khangera. Me som o koreňis andral o pokoleňje le Davidoskero, e jasno tosaraskeri čercheň.”
17O Duchos the e terňi phenen: “Av!” Oda, ko šunel, mi phenel: “Av!” Ko hino smedno, mi avel; ko kamel, mi lel peske o džido paňi hijaba.
18Me dovakerav sakoneske, ko šunel o prorocke lava andral kada zvitkos: Te na dothovel vareso ke kala lava, bo oleske o Del dothovela o dukha, so hin pisimen andre kada zvitkos.
19A te vareko odlela kale prorocke lavendar andral kada zvitkos, oleske o Del odlela leskero kotor pal o stromos le dživipnaskero the le sentne forostar, pal save hin pisimen andre kada zvitkos.
20Oda, ko dosvedčinel kala veci, phenel: “He, avava sig!” Amen! Av, Rajeja Ježiš!
21O lačhipen (milosť) le Rajeskero le Ježišoskero mi el tumenca! Amen.
