Niokuna sina 22

1

2

3

4

5

6

7

8

9

10

11

12

13

14

15

16

17

18

19

20

21

22

¹Mina usi Sei di naivo vima yaku vegu amena di koru na oteimaro; bi neva dabu dabu garasi rama guta kana ma Sei ma Mamoe mida di ourefeidena amena fata gutuna iyana reyo.

²Taoni di ida tobori iyana reyo, ma ini eta berou berou rofu, bi vegu amena di yabo ini meko bouna bouna 12 nufa are reyo. Ina bi eyo neinei ini rama meko varego. Mina yabo di iye bi gagani gagani vene di moi buni rina rofu.

³Beika baika tau Sei yaku kiraini niyo bi koina nigo. Idu taoni ideri, bi Sei ma Mamoe mida di ourefeidena amena fata mini ma ini moimai rei tavoi rededi vene nivakegedi.

⁴Ini seira vebigedi ma ini naori bi ini roka amego.

⁵Ma urusa bi koina. Ramefa o meda di vabara baku de regedi, adina Sei Varika amiye ini vabara nigo ma toga toga ourefeidegedi.

⁶Kamini na rofu niyo, “Mina ago bi rama ma mokena vari gira aegi rofu. Ma Varika amiye, Sei, kaere ini vima bi ini ago niyadi vene ideri, ina yaku ini naivo naivo vima bi ini moimai rei tavoi rededi vene beika evade evade vata niyainedi, bi mina oteimagi nifeideyo.”

⁷“Neidefo, na doba de degika reida! Mina buka Sei di ago niyo neidego amiye bi ada rego!”

⁸Na, John, na bi kaere mina neidesi veyaka mini. Mina neidesi vegasa Sei di naivo naivo vima mina na oteimaro nivakegi ini yuka adinari seira rofu raudai reyaka,

⁹idu na rofu niyo, “Mina bi ga re! Na bi ya ma yi usika ourena Sei di ago niyadi vene ma amiye, kaere mina buka di ago neidededi venesa naivo amiye kana. Sei maka nivakebi!”

¹⁰Ka na niyo, “Mina bukari Sei di ago niyo bi kake risi moi sui ga ri, adina mina beika baika di vata nina meda bi atafu nigo.

¹¹No redo amiye toga no reyaine, ma mokena no yogo nido amiye toga yogo niyaine, ma mokena rorobo nufa amiye bi toga rama reyaine, ma kikifa redo amiye bi toga kikifa reyaine.”

¹²“Neidefo, evade amiye tau noibanu vegu reyadi dada, ini obini magika bi baegida.

¹³Na bi ouresi ma gabi mamo, ouresi ma turi, adina ma metona bi na.”

¹⁴Ini varuka doba koiteyadi vene bi buni tora gade mago, ye vegu ameibobina yabo di rama irigika, di vava moisi taoni di ida vena di biri dui reyaganedi.

¹⁵Ye auna di moke moke vene, ore vene, koa rededi vene, umuyededi vene, ofa sei nivakededi vene ma ofa vegu uka masi rededi vene tau noibanu bi etofarori amededi.

¹⁶“Na Iesu, na bi nai naivo naivo vima mina vegu ekalesia vene ya rofu niokugi moi feideyaka. Na bi David di dava ma ini tutubena amiye yokoi; na bi Magai kinifo redo kana.”

¹⁷Vima ma mego rema yomakai nidedi, “Bae!” Ma neideyo amiye yomakai niyaine, “Bae!” Ma koru vaiyo amiye bi baeyaine; ma ura redo amiye davana yokoi de nufa vegu ameibobina di koru moiyainedi.

¹⁸Amiye tau gade, kaere mina Sei ini ago di buka di ago neidegedi ina vene rofu ago gira maida: amiye yokoi ini ago rofu tanu rego vonisi, Sei yaku mina bukari, bura reyo gauka no iniye iniye bi ina fafau tanu rego.

¹⁹Ma amiye yokoi mina Sei di ago nina sina, mina bukari moi yakugo vonisi, Sei yaku mina bukari bura reyo vegu ameibobina yabo ma taoni kikifa di rau regedi beika baika ina rofu moi yakugo.

²⁰Mina vegu rofu niokuyo amiye yomakai niyo, “Rama na evade baegida!” Rama. Varika amiye Iesu bae!

²¹Varika amiye Iesu di buni tora gade bi ya tausa ameyaine. Rama.