1Afa of lanai el kam afalig buum ogfunag. Eba nofkikena faig bu fegim afa glas lofug falaugufego. Godnai i afa Sipsip Luwalig nai i pegag sime nai pe blogim.
2Afa kembig mina ikag la enanai yi ena buba olyi ikagi. Afa ming magig ikag afa ming magig ikag enanai yiba nokikena faig li afohie. Afa ena libi eba mungu mungu wasi yi 12 pela haig haig fug leafo. Afa figegba elim mungwali bite naim suilafetifeg.
3Afa God mas amtakwaligimba membena mo enanai yi gohuguba. Afa Godna i afa Sipsip Luwaligna i pegag sime kembig la gohun. Afa sa ehena gafugag el ehem lotu finim,
4afa sa ehena nofbusugim nanguini afa ehena unehlag ehengelni mingig la afohienfini.
5Afa enanai yiba sinaini fwainig eba God Ainiyag ehe ombusugugba feg afa osu i lam i eba esug ahgo. Asa ehengel misog el wahkig gwese afofufe.
6Afa of lanai el kam sihinag og, “Hwa moba eba nufunam nemog feg. Afa God Ainiyag ehe Godna mo fli sihiaule elim anwenag faini. Afa sa heafna of lanai elim ningihiagba asa blog gafugag elim ogfunigbi afa sa mangwal ikagna pugufe.”
7Afa Sisas enaig esog og, “Sa hig, eba ka ikagna blofe! Hwa buk laba mangwal sa sumi yi pugufe, afa ambangel sa ena mom patalfuiagba eba sama sifakali.”
8Afa ka Jon ka higig afa ati ka enaigimba nangug. Afa maia of lanai el kam enam ogfunagba afa koka ehem lotu fena asa ka ehena kigmuhla peg.
9Afa ehe kam enaig sihifenag og, “Mas esi! Ka gafa Godna gafugag el gwenaig feg afa gwenaig neangafa afa gwenaig minginag gafa Godna mo fli sihiaule el gafa afa ambangel ena mo buk la patalkuiag gafa gwenaig esi. Sa ne Godna unehlagim mungohe fingi fe!”
10Afa ehe pese ming mo gwesim sihina og, “Ena sumi nai mo ati meyi puguiagim ofe asa nofeka ena mo buk lanai kumoahla.
11Afa amban sa amtakwaligim eseageg eba sa fwahiba sa ma gwenaig eseakafi. Afa amban nufwef mom eseakafofe eba sa fwahiba sa ma gwenaig eseakafi. Afa amban sa suialag nihem eseagefe eba sa fwahiba sama gwenaig eseakafi. Afa amban afsug fegba eba sa fwahiba sa ma gwenaig fe.”
12Afa Sisas enaig esog og, “Sa hig, eba ka ikagna blonam afa sa ka mungu mungu elim mungwag gwenaig faife.
13Afa kaba kike gof lanai feg afa sumi nai feg. Afa mungwali gawig kike mog feg afa mungwali gawig awaiyegim eba kike mungohe feg.
14“Afa ambangel sa heafgelni lofugim gigiafiagig enaba sama sifakalinim afa sa ma nofkikena gag faig li fug ahaganam afa sa ma kembig mengig megam saiyenam afui.
15Afa ambangel sa Godim mas fatinig, afa sa agisu fig, afa aga taitufig, afa elim kwaskofig, afa mwakwal Godim lotu finig, afa mwakwalig enaig elbi eba kembig la afwambala afohiefofe.
16Kaba Sisas ka kikeafna of lanai elim ningihiagba ehe ati sios elim ena moba faig. Kaba Devitna biteana luwal fegim afa ka ambagna bufiyi ombusugni feg.”
17Godna Sungwabug i afa Sipsip Luwaligna angwafig i enaig sihi ahfe og, “Au sa blo!” Amban sa higig ehe gafa sa ma sihi og, “Au sa blo!” Ambangel sa ne buhefe skofeg sa ne blo nofkikena faig bu ne eba God nem esug faife.
18Kaba Jon wasneig mo osihi amban sa ne ena buk la sumi nai mo go sa ne higim afa amban sa ne algana mo enanai yi pahlafe eba God nem ena kinig sisi pahlanifie.
19Afa amban sa ne sumi nai buk la go afa ne enam flafatiba eba God neana nofkikena faig li fugim flafatinibi asa mas heafna kembig la afu saiye hwa buk la enaig esog.
20Afa el sa ena mo sihinaba enag ilawo sihig og, “Eba nufunam, eba ka ikagna blofe.” Eba esefe. Sisas Ainiyag au sa blo.
21Afa sa ma Sisas Ainiyagna esmunagim kwaganig Godna elim gohoni. Eba nufunam.
