Acts 8:1-24

¹Ba Saul wai namai ba ana rabobona i damaninei. Kona maranai bi tupaketowana kaikapona i tupuwa bigeruwana biyisi ereonowasi kurisi, Jerusalem kamonai, ba si kasi bibuburanisi ku Judea ba Samaria kupurisi si nae ba apostle wata si sumarisi.

²Ba Jew biyisi mutusi God te bokuwayei wai kosi Stephen si dogui ba kairavina si tou saburere.

³Saba Saul ana waina bigeruwana biyisi iti goyonisi wai i nenae yove nunusi yai, bibaine ba sebasebare i titaina seserisi ku patuma yovena i tereterisi.

⁴Ba iyabosi wata si kasi bibuburanisi wai memena wata si nae wai Bada wonana si raumamarei.

⁵Ba Philip i gakira ku Samaria kupurina ba Iesu wonana pipiya kurisi namai i bisisiyei.

⁶Maranai koroto kaikapona Philip ana sisiya si nonori ba matakira si kinana i wose wai, awaika i bisisiyei wai si tainabaenega kabitam.

⁷Ba pipiya pesarisi kanuma goyogoyosi kamosi yai si mamana i kaotuneyisi wai ere rasarasasi si kasibau, pipiya sini raoboraobosi, ba sikesikenisi ereonowasi i yawasisi.

⁸Kata kona meyagina kamonai wai nuwagaire i rakata saki.

⁹Ba niko mara veoromina, sebare kana waba Simon, Samaria kamonai i bikairapu wai si biwareyei, ba ikesina i kaobigegaena meyei kata kona pipiya kaikapona.

¹⁰Ba pipiya marimariyisi ba moyamoyakisi ereonowasi kona wata si nonora kabikabitamni. Ba si wona, “Niko sebare wai te wonawona kona ana maragata kaidamonai i gakira wai e wosewosei bage kona god.”

¹¹Ba ana bikairapu tepanai wai, niko mara veoromina pipiya si kibikibi ba si biwareyei.

¹²Saba maranai Philip, God ana basileiya warana gairena ba Iesu Keriso kana wabai i rumamara wai, si geruwei. Kona kairavina sebasebare ba bibaine ereonowasi si babataito.

¹³Ba Simon yabata i geruwana wai i babataito. Ba Philip kiyakiyaya i wosewose i kinakinana wai i biwareyei ba memena wata i nenae wai i kibikibi.

¹⁴Ba maranai apostle Jerusalem kamonai wara si nonori kata, Samaria biyisi Bada si yauni, ba asi yawasa si berena wai, Peter ba John si poraisi sita nae kurisi.

¹⁵Ba maranai si verakasibau wai, kairavisi si rupari kata Kanuma Kaobaisiyena sita yauni,

¹⁶basuna kosi Kanuma Kaobaisiyena wai kega kurisi i riu, saba kosi wai Iesu kana wabai si babataito mom.

¹⁷Peter ba John yarosi si terei ku tepasi wai Kanuma Kaobaisiyena si yauni.

¹⁸Maranai Simon i kinani kata apostle yarosi pipiya ku tepasi si tereterei ba Kanuma Kaobaisiyena i saibisaibira wai mane i beyisi.

¹⁹Ba i wona, “Rubarubana niko maragata kota beriku wai yauku yebo ata borubaisi wai Kanuma Kaobaisiyena sita yuyauni.”

²⁰Saba Peter i kaobeyei, i wona, “Kom ba am mane yabata ko nesaira, kom ku nosi bage God ana puyo wai mane yai sita gimogimoni.

²¹Ba God ana saibira kamonai wai kega kesana kom am gawara kona kam koda e mamana, kairavina nuwanuwam wai kega totorina God ku matana.

²²Nikosi am wose goyogoyosi, ke tombubau taveyana ba ke rupari Bada kurina, kata am nuwasuya goyogoyosi, ke nuwanuwa suyana wai ina notataveyisi.

²³Ba a kinanim wai kom nuwa badobado ba piragagoyo i bonuvim.”

²⁴Damanina Simon i kaobeyisi, i wona, “Ko rupari kairaviku Bada kurina kata, awaika ko wonei wai kega kesana goyona ina tupuwa kuriku.”