1Peter ba John karaku wata si bisisiya pipiya kurisi, ba priest mutusi ba God ana yove kana aba potapota asi bada yabata, ba Sadducee biyisi si verakasibau.
2Ba kosi kega si nuwagaire kurisi kairavina kosi wai Iesu ana rabobona ba bomsirina, si bibeyebeyisi. Ba nikona i beyita kata raoboraobosi karakuwata sina bomsiri mena.
3Damanina ba si patumisi ba i rabisi kairavina wai, ku patuma yove si terisi si ma maratom.
4Ba pipiya pesarisi Bada warana si nonori ba si geruwna wai, asi koroto i rakata i gae 5,000 rubana.
5Ba mara i tom wai Jew babadisi ba magumagurisi ba kairuwana kana bibeyebeyena biyisi si nae Jerusalem yai si kesanisi.
6Ba priest kaikapona kana waba Annas wai namai, ba yebo Caiaphas, John ba Alexander ba priest kaikapona ana rakarakana mutusi yabata si kesanisi.
7Ba kosi Peter ba John si botuvisi naosi yai si msiri, ba si toirubaisi, “Kotoi ana maragatai niko wose ko wosei?”
8Damanina ba Kanuma Kaobaisiyena Peter i bonuvi wai i kaobeyisi i wona, “Babada ba magumagura!
9Abisiri yai ko bitoiruba awaika gairena ka wosei digadigana kurina, ba mekabage i yawasa kairavina wai,
10nikona kota kuiri, ba yebo Israel biyisi ereonowasi sita kuiri, kata niko sebare nina naomi yai e bimsiri wai, kona Iesu Keriso Nazareth biyina ana maragatai, ba kana wabai i yawasa, ba kona wai komi ko tuparatui, ba God rabobo ai i bobimsiri meyei.
11Niko Iesu, Bada wonana e bisisiyei, ‘kata yove bowabowa niko akima, si sinikikiyei wai karaku kona akima kaimatanina damana.’
12Ba yawasa wai Iesu ikesina karinai tana panani, kega kesana waba niko dobu tompipininai e mamana ba tana yawasa.”
13Maranai Peter ba John asi bi tepatora si kinani ba si bopanani kata kosi wai pipiya mom ba kega si kiruma wai si sikwana saki. Ba si kuiri kata kosi wai Iesu yabata si mamana.
14Ba saba kega rubarubana awaika siti sisiyei kurisi, kairavina sebarena i yawasa si kinani wai nai John ba Peter yabata si bimsiri.
15Damanina babada si wonisi wai kona gawarina si kasibau taveyei, ba kosi wata si sisiya.
16Ba si toiruba, “Mekabage nikosi sebasebare tana wosisi? Ba pipiya ereonowasi Jerusalem kamonai si kuira roboi kata kosi wai kiyakiyaya si wosei, ba kega rubana tana kwaruma.
17Saba mekabage niko wose tani gesei, kata kega pipiya kamosi yai ina rakata wai, sebasebaresi tana kaomainimanisi sina kuiri kata kega meyana Iesu kana wabai pipiya kurisi sini sisiya.”
18Damanina si yore meyisi si riu ba si kaotuneisi kata kega muri yai Iesu kana wabai siti sisiya kona siti beyebeyena mena.
19Saba Peter ba John si kaobeyisi, “Nikona wai komi wata koi buibuiyena meyimi, kata mekona wai wose totorina God matanai, komi kana bosisirimi kona God kana bosisiri.
20Kona kairavina kega rubarubana awaika ka kinani ba ka nonori wai bi sisiyina kana boterei.”
21Saba babada si kao binaganagarisi ba si boterisi si nae. Ba kega rubana bagibagi padapadana sita berisi, kairavina pipiya ereonowasi awaika kamosi yai i tupuwa si kinani wai God si bokabakabari.
22Ba sebarena kiyakiyaya i tupuwa kurina ba i yawasa wai, kana bodu 40 ba yogina i tupasairei.
23Maranai Peter ba John si boterisi si nae wai mekabage priest kaikaposi ba magumagura si wonisi wai, turaturasi si wara berisi.
24Ba maranai bigeruwana biyisi niko sisiya si nonori wai ereonowasi si kesanisi, ba God kurina gamosi kaikaponai si rupari. “Aeee, Bada ama Taupauma,” si wona, “Kom sapama ba dobu ba enaga ku wose, ba yebo awaika ereonowana kamonai yabata kom ku wose.
25Ba kom Kanuma Kaobaisiyenai kui sisiya am saibisaibirina tamakai David kurina ku wona, ‘Awaika kairavina nikosi dam te biyagisi ba nota momosisi te wosewose?
26Ba dobu kasi tautaupauma te bobunaga abiya kairavina ba babada tebi kesanisi Bada baibaiyawasina kaobaisiyena te gebeyei ba ana Bibigairenina te biabiyei.’
27Nikona wai bisuwona kata Herod ba Pontius Pilate, ba Israel biyisi, ba Rome biyisi, meyaga kaikaponai si panapanana ba bibuni yai sisiya si popoi kata am saibisaibirina kaobaisiyena Iesu am binebinena te biabiyei.
28Ba awaika si wosei wai matapa wata kom am maragata, ba am waina nununai wai nanakasike i tupuwa.
29Ba karaku Bada, asi kao binaganagara ke nonori, ba am saibisaibirisi ki baisikai, kata kani tepatora ba waram kani sisiyei.
30Ba yarom Kaobaisiyena ke kotoi kuni yawasa, kata kiyakiyaya ba matakira ba kituruba am saibisaibirina, Kaobaisiyena Iesu kana waba ke wose.”
31Ba si rupari i kakaba murinai wai, memena sibi dugu wai gawarina i gusu. Ba Kanuma Kaobaisiyena i bonuvisi wai, si dagui God wonana ere tepatorasi si raumamarei.
32Ba bigeruwana biyisi ereonowasi, asi nota ba nuwanuwasi si kesani, ba kega kesana kotoi ana sawara karinai ba i mataisiga, saba asi sawara ereonowana kosi wata kamosi yai sibi kodei.
33Kata God apostle, maragata kaikapona i berisi wai, Bada Iesu ana bomsiri menina sibi mamatarei, ba God ana bigairena i utusewai ereonowasi kurisi.
34Ba asi duvu kamonai wai kega kotoi moyamoyakina, kairavina iyabosi tano ba yove karisi yai wai si gimona ba manesi si yuyauna si botubotu,
35ba apostle si berisi wai pipiya asi waina nununai si bi yabei.
36Ba Joseph wai kona Levi biyina, ana kupura wai Cyprus, saba apostle kana waba si yorei Barnabas. Ba Barnabas basuna wai kaobinuwatora biyina.
37Ana tano i gimonei, ba mane na i yauni i botu wai apostle ku yarosi i terei.
