Acts 8:1-24

¹Me fel’ u wan’ Saul ni kan li’ Stefen kem’. Ka chirofen nem min tabab i gafgownag girdi’en fare galesiya u lan yu Jerusalem nrib gel e kireb ni un tay ngorad. Ma urngin e pi’in ke mich Jesus u wun’rad e ra weargad u lan yu Judea i yan ngu Samaria, ma kemus ni fapi apostel e dar uned ko mil.

²Ma boch e girdi’ ni yad ba yul’yul’ ngak Got e ra k’eyged Stefen ni yad be dololoy’nag.

³Machane me guy Saul rogon ni nge thang mit fare galesiya, ni be yan u reb e naun nga reb ni be girengiy e pi’in ke mich Jesus u wun’rad nga waen, ni pumo’on nge ppin, ngi i yin’rad nga kalbus.

⁴Ma fa picha’ nike mich Jesus u wun’rad nni weregrad e ranod nga gubin yang ni yad be machibnag ngak e girdi’ fare Thin Ni Bfel’ ni yib rok Got.

⁵Me yan Filip ngalan e binaw nu Samaria nge machibnag murung’agen fare Messiah ngak e girdi’ u rom.

⁶Ma fa yu ulung i girdi’ ni aram urngirad e ra uthmed telrad ko n’en ni i weliy Filip ngorad. Yad gubin ni ur motoyilgad ngak ma yad be guy e maang’ang ni be ngongliy.

⁷Pi kan nib kireb ni kar yinggad ngak bo’or e girdi’ e ra tolulgad ngar chuwgad u fithik’ fa pi’inem; ma bo’or e girdi’ ni dariy gelngin yu yang u dowrad nge pi’in nib mugutgut ni ki gol nagrad.

⁸Me yib e felfelan’ ni ba ga’ ngak e girdi’ ko binaw nu Samaria.

⁹Ma bay be’ nib mo’on ni Simon fithingan nma par u lan e re binaw nem, ni bay ba ngiyal’ ni ngat piyu Samaria ngak ni bochan e pig ni i tay. Ma be yog ni ir e ba sorok,

¹⁰ma gubin e girdi’ u lan fare binaw, nib thilthil tolngirad e ra uthmed telrad ko tin i yog. Me lungurad, “I ir fare n’en ni gelngin Got nike lunguy ‘Fare Gelngin nib Th’abi Gel.’”

¹¹Ke n’uw nap’an ni kar ngatgad ngak ko pig ni i tay, ni aram fan ni kar pired ni kar uthmed telrad ko tin be yog.

¹²Machane fa’ani mich u wun’rad e Thin Ni Bfel’ ni yog Filip ngorad ni murung’agen e gagiyeg rok Got nge ngachalen Jesus Kristus, ma aram min tawfe nagrad, ni ppin nge pumo’on.

¹³Mi Simon e ku errogon ni mich Jesus u wan’; ma fa’an nni mu’ i tawfenag me m’ag ir ngak Filip, ma fa’ani guy e pin’en nike ngongliy gelngin Got nge pi maang’ang ni be ngongliy Got u pa’ Filip, me ngat ngay.

¹⁴Fapi apostel ni yad bay u Jerusalem e rrung’aged nike thap e thin rok Got ngak e girdi’ nu Samaria; ma aram miyad l’oeg Peter nge John ngranow ngorad.

¹⁵Fa’anra tawgow ngorad, miyad yibilay fa pi’inem nike mich Jesus u wun’rad ni nge pi’ Got fare Kan Nthothup ngorad.

¹⁶Ya aram e dawori yib fare Kan Nthothup nga daken bagayad; ya kemus ni kan tawfe nagrad nga fithingan fare Somol ni Jesus.

¹⁷Ma aram me tay Peter nge John pa’row nga dakenrad, me yib fare Kan Nthothup ngorad.

¹⁸Me guy Simon nnap’an ni tay fa gal apostel pa’row nga dakenrad me pi’ Got fare Kan Nthothup ngorad. Ma aram me yog Simon ni nge pi’ e salpiy ngak Peter nge John,

¹⁹ni ga’ar, “Kum pi’ew e binir e gelngin ngog, ni fan e nggu tay pa’ag nga daken be’ me yag fare Kan Nthothup ngak.”

²⁰Machane me fulweg Peter ngak ni ga’ar, “Gur nge salpiy rom e ngam marow nga fithik’ e nifiy, ni fan e ga be leamnag nrayag ni ngam chuw’iy e tow’ath rok Got ko salpiy!

²¹Dariy mat’wum nge f’oth rom ko maruwel romow ni bochan e leam rom e de mat’aw u mit Got.

²²Ere mpi’ keruum ko bin be’er e pa’ nib kireb ni kam leamnag, ngam wenig ngak Somol nge n’ag fan rom e binir e pa’ ni kam leamnag.

²³Ya kug guy ni gab sug ko awan’ ma ke kalbus nigem e denen.”

²⁴Me ga’ar Simon ngak Peter nge John, “Wenig ngomew, mu wenig nigew gag ngak Somol, nge dabi yib ngog reb e pin’en ni be’er ni kamognew.”