Aposolo Jaŋere Binaŋ 8:1-24

¹Eme dameŋ ijaha Jerusalem haeonec opâ ruac kikefuŋ râsi sâko fuŋke‐jarembiŋ. Ejarepie wiserâ râwiŋ qâwiŋ erâ Judaia â Samaria mâreŋko rafârembiŋ. Aposolo jaŋe sawa getâc‐jopapie jumbiŋ.

²Eme ŋic mitine gâcne jaŋe Stefano duckerâ kio mamakuc ecnembiŋ.

³Saulo eki ine opâ ruac ima bacjoparâ ficne ferâ ro fârec ejarehuc kâpâcwâru ficko râec‐jopahuc domawec.

⁴Opâ ruac bâtâtiec‐jopakicne jaŋe ine hae sâc juhuc ŋic miti jaza rambiŋ.

⁵Eku Filipozi Samaria ŋic jaŋere hae qizecko fisirâ Kristore biŋedâŋ jazawec.

⁶Jazame ŋic guru sâko jaŋe dâŋticnere ejareme mana aŋac embiŋ. Ehuc mâsi fuŋne fuŋne bame honembiŋ.

⁷E demoŋ bocjaha jâpe‐jareme ŋicmaŋkonec wefurâ owackehuc wisembiŋ. Erâ wâc ʒeke puriŋ â kike demba bocjaha sahac ɋiɋic bacjopawec.

⁸Eme irec hae ira ʒeri kâcɋene fuawec.

⁹Eme hae ijaha qaŋgec bapa moc juwec, ʒâŋene Simoŋ. E jahacnere no ŋic fekicne muhuc qaŋgec gie bame Samaria ŋicguru jaŋe honepie bipinehec ewec.

¹⁰Ehuc fekicne wahakicne jaŋe ere manapie fefene eme ʒiŋuc mujumbieŋ: “Ŋic kecʒizi Anuture tâpiri, Sokawec Sâko mucnekicne, irec hozine hâcne.”

¹¹Eme qaŋgec‐ticnezi maŋ bâsifuc ejarewecte dameŋ ʒora erao qohotahuc jumbiŋ.

¹²Juhapie Filipozi Anuture uucmaŋte Biŋebiaŋ â Jesu Kristore dâŋ binaŋ jazame mana ʒakierâ ŋic â ŋokac mâmâc Miti Opâ ruambiŋ.

¹³Iŋuc epie Simoŋ e iŋuc jaha miti mana ʒakierâ opâ ruarâ Filipore maŋfuŋko juwec, ehuc mâsi fuŋne fuŋne bame hone warec mâretec ehuc juwec.

¹⁴Eme Samaria ŋicguru jaŋe Anuture dâŋ ro maŋ epie irec biŋe Jerusalem haeo aposolo jaŋerao rame manambiŋ. Ehuc Petoro â Johane sorec‐jofapie rapic.

¹⁵Ra fisirâ jaŋe Tiri Mârohec eniŋte Wofuŋ numucnepic.

¹⁶Juwicnao Tiri Mârozi jaŋerao mi wahawec, jaŋe mâc Jesure ʒâŋeo ʒuhuckehuc Miti Opâ sawa ruambiŋ.

¹⁷Eme aposolo jahe mejekic qizec‐jeŋicko râepire jaŋe Tiri Mârohec embiŋ.

¹⁸Aposolo jahe ŋic jaŋere qizec faio mejekic râepire Tiri Mârohec epie Simoŋzi honerâ jaherao moneŋ amecke fisirâ

¹⁹ʒiŋuc jasawec: “Ŋohe tâpiri i no iŋuc jaha narepire ŋic mocte qizecko menane râepe Tiri Mârohec ezejec.”

²⁰Mume Petorozi ʒiŋuc âzâcnewec: “Go Anuture jauŋ moneŋzi furine bazo mukomecte moneŋgezi gohec mâmâc sisipiricko razac me!

²¹Anutuzi maŋsiocge honekacte tâpiri ʒizi moc mi hehuŋgaŋguhame mâc jâmbâŋ jucmu.

²²Go bâbâsifucge qikiŋnehuc maŋge bârisierâ Wofuŋ numucnetec maŋgao andac sâko bâtâmire‐garezejec.

²³Go sâqocne hâtânezi hariŋguekac hâcne.”

²⁴Eme Simoŋzi ʒiŋuc muwec: “Ŋohe ŋahac nore erâ Wofuŋ numucnepire akicnuha wiac mukopirec i mi fua‐narezejec.”