ዬሱሲ ኪቴዳዋንቱ ኦሱዋ 8:1-24

¹ሳዖሊ ኢስፂፋኖሴ ሃይቁ ሎዓ ጊ ኣኬዳ። ሄ ጋላሲ ዬሩሳላሜን ዴዒያ ኣማኒያዋንቱ ቦላ ዎልቃማ ዬዴርሱ ዴንዴዳ፤ ዬሱሲ ኪቴዳዋንቱፔ ኣቲን፥ ኣማኒያዋንቱ ኡባቱ ዪሁዳ ጋዲያኒኔ ሳማሪያ ጋዲያን ላሌቴዲኖ።

²ፆሳ ኣሳቱ ኢስፂፋኖሳ ሞጌዲኖ፤ ቃሲ ኣው ዳሮ ዬኬዲኖ።

³ሺን ሳዖሊ ኣማኒያ ኣሳ ꬋዪሳናው ባፄቴ፤ ኡባ ጎሊያ ጌሊ ጌሊዴ፥ ኣቱማ ኣሳኔ ማጫ ኣሳ ጎቺ ጎቺዴ፥ ቃሾ ጎሌ ዬዴ።

⁴ላሌቴዳ ኣማኒያዋንቱ ቃላ ኦዲዴ፥ ኡባሳ ቤዲኖ።

⁵ፒሊጶሲ ሳማሪያ ካታማ ዎꬊዴ፥ ኪሪስቶሳባ ኣሳሲ ኦዴዳ።

⁶ጮራ ኣሳይ ፒሊጶሲ ጌዳዋ ዳሪሲ ኣኬኪዴ ሲሴዳ፤ ኢ ኦꬂያ ማላታካ ቤዔዳ።

⁷ኣዪሲ ጎፔ፥ ኢታ ኣያናቱ ኮሻ ꬎቁ ኦꬂ ሃሳዪዴ፥ ጮራ ኣሳፔ ኬሴዲኖ፤ ቃሲ ጮራ ሲሌዳዋንቱኔ ዎባቱ ፓፄዲኖ።

⁸ሄ ካታማን ኣሳይ ዳሮ ናሼቴዳ።

⁹ሺን ሲሞና ጌቴቲያ ኢቲ ቢታኒ ካሴ፥ ባሬና ዎልቃማ ጊ ካዪዲ፥ ሳማሪያ ኣሳ፥ «ላ ሃዌ ኣይቤ ኦራꬃቤ» ጊሲዴ ሄ ካታማን ዴዔዳ።

¹⁰ጉꬃቴꬃፔ ዶሚዴ፥ ዎጋቴꬃ ጋካናው፥ ኣሳይ ኡባይ፥ «ፆሳ ዎልቃይ ዳሮ ዎልቃማይ ሃዋ» ጊዴ ኣባ ሲሴ።

¹¹ዳሮ ዎዲያፔ ዶሚዴ፥ ካዩዋን ሳማሪያ ኣሳ «ላ ሃዌ ኣይባ ኦራꬃቤ» ጊሴዳ ዲራው፥ ኣሳይ ኣባ ሲሴ።

¹²ሺን ፒሊጶሲ ፆሳ ካዉቴꬃባኔ ዬሱሲ ኪሪስቶሳ ሱንꬃባ ኣቱማዋንቱሲኔ ማጫዋንቱሲ ሚሺራቹዋ ኦዲዴ፥ ኡንቱንቱ ኣባ ኣማኒዴ ፃማቄቴዲኖ።

¹³ቃሲ ሲሞኒካ ባሬ ሁጴው ኣማኒዴ ፃማቄቴዳዋፔ ጉዪያን፥ ፒሊጶሳና ኢቲፔ ዴዒዴ፥ ኦሴቲያ ማላታኔ ፆሳይ ኦꬄዳ ዎልቃማ ማላታ ቤዒዴ ማላሌቴዳ።

¹⁴ዬሱሲ ኪቴዳ ዬሩሳላሜን ዴዒያዋንቱ፥ ሳማሪያ ኣሳይ ፆሳ ቃላ ኣኬዳዋ ሲሴዳ ዎዴ፥ ጴፂሮሳኔ ዮሃኒሳ ኡንቱንቱኮ ዬዴዲኖ።

¹⁵ጴፂሮሲኔ ዮሃኒሲ ዎꬊዴ፥ ኣማኒያዋንቱ ጌሻ ኣያና ኣካና ማላ፥ ኡንቱንቶ ፆሳ ዎሴዲኖ፤

¹⁶ኣዪሲ ጎፔ፥ ሳማሪያ ኣሳቱ ጎዳ ዬሱሳ ሱንꬃን ፂንቃታ ፃላላ ፃማቄቴዳዋፔ ኣቲን፥ ኡንቱንቱፔ ኢቱዋ ቦላኒኔ ጌሻ ኣያናይ ዎꬊቤና።

¹⁷ሄ ዎዴ ጴፂሮሲኔ ዮሃኒሲ ባሬንቱ ኩሺያ ኡንቱንቱ ቦላ ዎꬆዋፔ ጉዪያን ኡንቱንቱ ጌሻ ኣያና ኣኬዲኖ።

¹⁸ዬሱሲ ኪቴዳዋንቱ ባሬንቱ ኩሺያ ኡንቱንቱ ቦላ ዎꬂና፥ ኡንቱንቶ ጌሻ ኣያናይ ኢሜቴዳዋ ሲሞኒ ቤዔዳ ዎዴ፥ ጴፂሮሳሲኔ ዮሃኒሳሲ ሚሻ ኣሂዴ፥

¹⁹«ታኒካ ታ ኩሺያ ዎꬂያ ኡባይ ጌሻ ኣያና ኣካና ማላ፥ ሃ ማታ ታዉካ ኢሜሪኪቴ» ያጌዳ።

²⁰ሺን ጴፂሮሲ ኣው ሃዋዳን ያጌዳ፤ «ኔኒ ፆሳ ኢሞታ ሚሻን ሻማናው ቆፔዳ ዲራው፥ ኔ ሚሻይ ኔናና ጮ ꬋዮ።

²¹ኔ ዎዛናይ ፆሳ ሲንꬃን ሱሬ ጊዴና ዲራው፥ ኔው ሃዋን ጊሹ ባዋ።

²²ያቶዋፔ ጉዪያን ሃ ኔ ዎዛና ኢታ ቆፋ ዲራው፥ ናጋራፔ ሲማ፤ ኦኒ ኤሪ ኔ ዎዛናን ዴዒያ ኢታ ቆፋ ፆሳይ ኣቶ ጋኔንቶኔ ፆሳ ዎሳ።

²³ኣዪሲ ጎፔ፥ ኔኒ ዳሮ ቃናቲያ ኦይቃዴ ናጋራ ቃሹዋን ዴዒያዋ ታኒ ቤዓይ» ያጌዳ።

²⁴ሄዋፔ ጉዬ ሲሞኒ ጴፂሮሳሲኔ ዮሃኒሳሲ ዛሪዴ፥ «ሂንቴንቱ ጌዳዋፔ ኢቲባይኔ ታና ጋኬና ማላ፥ ሂንቴ ታው ፆሳ ዎሲቴ» ያጌዳ።