Tillɑɑ Tǝmlɛ 8:1-24

¹Sɔɔlɩ lɑŋlɛ kɑ hɛɛnɑ Ɩtiyɛɛnɩ kʋɣʋ. Kʋyɑkʋ ŋkʋ kʋ mɑɣɑmɑɣɑ kɛ pɑ sʋʋ Yosɑlɛm Yesu sɛɛlɑɑ kpekǝle kɛ kʋnyɔŋ tʋɣʋ kɛ teu. Ɩlɛnɑ pɑ tǝnɑ pɑ́ yɑ Yutɑ nɑ Sɑmɑlii tɑɑ, nɑ pǝ yele tillɑɑ tike.

²Ḿpʋ́ɣʋ́ yǝlɑɑ mpɑ pɑ tǝŋǝɣɩ Ɩsɔ mpɑɑʋ kɛ teu tɔ pɑ pimɑ Ɩtiyɛɛnɩ, nɑ pɑ́ wii-ɩ sɔsɔm.

³Amɑ pǝ yelɑ Sɔɔlɩ ɩ́lɛ́ tɔ, Yesu sɛɛlɑɑ kɛ ɩ tɔŋnɑ lʋpʋ sɩ ɩ lɑkɩ sɑkɑsɑkɑ. Tɛɛsɩ tɑɑ kɛ́ ɩ sʋʋkɑɣɑ nɑ ɩ́ kpɑɑkɩ ɑpɑlɑɑ nɑ ɑlɑɑ nɑ ɩ́ tǝkǝɣɩ.

⁴Mpɑ mpɑ pɑ yɑ mpʋ tɔ pɑ cɔɔkɑɣɑ pɑɑ le nɑ pɑ́ heeliɣi Ɩsɔ Tɔm Lɑɑpɑɑlɩ Kʋpɑŋ.

⁵Sɑmɑlii ɩcɑtɛ kɛ Filipʋ nɑ́ polɑɑ nɑ ɩ́ heeliɣi tǝnɑ nyǝ́mɑ kɛ Mesii tɔm.

⁶Piti tǝmɑ nnɑ Filipʋ lɑkɑɣɑ tɔ sɑmɑɑ nɩɩ ɑ tɔm nɑ pɑ́ nɑnɑ pɑ ɩsɛ. Pǝ tɔɔ kɛ́ wɑɑtʋ wei ɩ́ yɔɣɔtǝɣɩ, pɑ tǝnɑ tǝpɑɩ pɑ tʋɣɩ ŋkpɑŋʋɣʋ kɛ teu.

⁷Pǝ tɑɣɑ pʋlʋ, ɑlɔɣɑɑ kiisɑɣɑ nɑ pɑ́ seeki ɑlɔɣɔhilɑɑ pɑɣɑlɛ kiŋ nɑ ɑcɑmɑɑ nɑ kɑɑkɑlɑsɩ pɑɣɑlɛ hikɑ ɑlɑɑfǝyɑ.

⁸Ḿpʋ́ɣʋ́ yǝlɑɑ lɑŋɑ hʋlʋmɑ kɑtɑtǝlɑɣɑ, hɑlǝnɑ pǝ́ lɑ ɩcɑtɛ ntɛɣɛ yuŋ.

⁹Apɑlʋ nɔɣɔlʋ nɑɑ wɛ ɩcɑtɛ ńtɛ́ tǝ tɑɑ kɛ́ hɑtoo lɔŋ, pɑ yɑɑkɩ-ɩ sɩ Simɔŋ. Apɑlʋ ɩnɩ ɩ lɑkɑɣɑ topotopo tǝmɑ kɛ́, nɑ pǝ lɑkɩ Sɑmɑlii nyǝ́mɑ tǝnɑɣɑ piti. Ɩ nyǝnɑɣɑ ɩ tǝɣɩ sɔsɔ kɛ́ pǝ tii fɛɩ.

¹⁰Pǝ kpɑɣɑʋ piyɑ nɑ pǝ́ polo sɔsɑɑ tɔ pɑ tǝnɑ pɑ wutɑɣɑ-ɩ kɛ́. Hɑlǝnɑ yǝlɑɑ tɔŋɑɣɑ sɩ: Ɩsɔ tomɑ nnɑ pɑ yɑɑ tomɑ sɔsɔɔnɑ tɔ ɑ tʋ ntɔ.

¹¹Ɩlɛnɑ pɑ́ wutiɣi Simɔŋ ɩnɩ ɩ wɑɑlɩ. Pǝ tɑɣɑ pʋlʋ, ɩ topotopo tǝmɑ kɑ tɛmnɑ-wɛɣɛ piti lɑpʋ kɛ hɑtoo lɔŋ.

¹²Amɑ Filipʋ kɔmɑ nɑ ɩ́ heeliɣi-wɛɣɛ Ɩsɔ Kɑwulɑɣɑ nɑ Yesu Kilisiti pǝ Lɑɑpɑɑlɩ Kʋpɑŋ tɔ pɑ mʋ Lɑɑpɑɑlɩ Kʋpɑŋ ɩnǝɣɩ teu, hɑlǝnɑ pɑ́ sɔ ɑpɑlɑɑ nɑ ɑlɑɑ kɛ Ɩsɔ lʋm.

¹³Simɔŋ ɩ́lɛ́ ɩ mɑɣɑmɑɣɑ ɩ mʋwɑ nɑ pɑ́ sɔ-ɩ Ɩsɔ lʋm. Ɩlɛnɑ ɩ́ sʋʋ Filipʋ kɛ tǝŋʋɣʋ nɑ ɩ nyǝnɑɣɑ Ɩsɔ kɔkɔlɔnɑɑ sɔsɑɑ nɑ piti tǝmɑ nnɑ ɑ lɑkɑɣɑ tɔ nɑ pǝ wɛ-ɩ piti.

¹⁴Tillɑɑ mpɑ pɑɑ wɛ Yosɑlɛm tɔ pɑ nɩɩwɑ sɩ Sɑmɑlii nyǝ́mɑ mʋ Ɩsɔ Tɔm, ɩlɛnɑ pɑ́ kʋsɩ Piyɛɛ nɑ Yohɑɑnɩ nɑ pɑ́ tili sɩ pɑ́ polo nɑ pɑ́ nɑ́.

¹⁵Piyɛɛ pɑ tɑlɑ tǝnɑ, ɩlɛnɑ pɑ́ sǝlǝmǝnɑ Sɑmɑlii nyǝ́mɑ mpɛɣɛ Ɩsɔ sɩ pɑ́ hiki Feesuɣu Nɑŋŋtʋ.

¹⁶Pǝ tɑɣɑ pʋlʋ, Tɑcɑɑ Yesu hǝtɛ tike kɛ pɑɑ yɑɑwɑ nɑ pɑ́ sɔnɑ-wɛɣɛ Ɩsɔ lʋm. Ɩlɛ Feesuɣu Nɑŋŋtʋ tɑ tiitɑ pɑ tɑɑ nɔɣɔlʋ ɩ tɔɔ.

¹⁷Tǝnɑɣɑ Piyɛɛ nɑ Yohɑɑnɩ pɑ tǝnɑ niŋ kɛ pɑ tɔɔ. Ɩlɛnɑ pɑ́ hiki Ɩsɔ Feesuɣu Nɑŋŋtʋ.

¹⁸Wɑɑtʋ wei Simɔŋ nɑwɑ sɩ tillɑɑ tǝnɑ-wɛɣɛ niŋ nɑ pɑ́ hiki Feesuɣu Nɑŋŋtʋ tɔ, ɩ cɛlɑ-wɛɣɛ liɣitee,

¹⁹nɑ ɩ́ tɔ sɩ: Ɩ́ cɛlɛ mɑɣɑ mpʋ ɩnɩ pǝ lɑpʋ tɔtɔ, nɑ mɑ́ tǝnɑ wei kɛ́ niŋ, pʋntʋ hiki Feesuɣu Nɑŋŋtʋ kɛ mpʋ.

²⁰Tǝnɑɣɑ Piyɛɛ tɔmɑ sɩ: Ɩsǝnɑ mpi n hʋʋʋ sɩ pɑ pǝsǝɣɩ pɑ́ yɑ Ɩsɔ hɑtɛ nɑ liɣitee tɔ, nyɑ́ nɑ nyɑ́ liɣitee ɩ́ lɑ yem.

²¹N kɑɑ nɑ pʋlʋ cǝcǝkɑ. Pǝyele nyɑ́ pɑɑ mɑɣɑmɑɣɑ tɩɩ fɛɩ tǝnɛ ɩnɩ tǝ tɑɑ. Pǝ tɑɣɑ pʋlʋ, Ɩsɔ ɩsɛntɑɑ nyɑ́ lotu tɑ te.

²²Ɩlɛ lɔ nyɑ́ hʋwɛɛ ɑsɑɣɛɛ ɑnɩ, nɑ ń wiinɑ Tɑcɑɑ nɑ ɩ́ hʋlɩ-ŋ suulu nɑ ɩ́ tɑɣɑnɩ-ŋ nyɑ́ hʋwɛɛ ɑsɑɣɛɛ ɑnɩ.

²³Pǝ tɑɣɑ mpʋ, mɑ nɑɑkʋɣʋ-ŋ tɔ, nyɑ́ nɑ nyɑŋ kɛ́ ɩsɩɩ kɑkɑɣɑ. Ɩsɑɣɑtʋ lɑpʋ tɔkǝnɑ-ŋ tǝkem.

²⁴Ḿpʋ́ɣʋ́ Simɔŋ cɔ-wɛ sɩ: Mɩɩ wiinɑ-m nɑ Tɑcɑɑ, nɑ nti ɩ́ yɔɣɔtɑ mpʋ tɔ tǝ tɑɑ nɑtǝlɩ ɩ́ tɑɑ lɑ-m.