1Ba Saul wai namai ba ana rabobona i damaninei. Kona maranai bi tupaketowana kaikapona i tupuwa bigeruwana biyisi ereonowasi kurisi, Jerusalem kamonai, ba si kasi bibuburanisi ku Judea ba Samaria kupurisi si nae ba apostle wata si sumarisi.
2Ba Jew biyisi mutusi God te bokuwayei wai kosi Stephen si dogui ba kairavina si tou saburere.
3Saba Saul ana waina bigeruwana biyisi iti goyonisi wai i nenae yove nunusi yai, bibaine ba sebasebare i titaina seserisi ku patuma yovena i tereterisi.
4Ba iyabosi wata si kasi bibuburanisi wai memena wata si nae wai Bada wonana si raumamarei.
5Ba Philip i gakira ku Samaria kupurina ba Iesu wonana pipiya kurisi namai i bisisiyei.
6Maranai koroto kaikapona Philip ana sisiya si nonori ba matakira si kinana i wose wai, awaika i bisisiyei wai si tainabaenega kabitam.
7Ba pipiya pesarisi kanuma goyogoyosi kamosi yai si mamana i kaotuneyisi wai ere rasarasasi si kasibau, pipiya sini raoboraobosi, ba sikesikenisi ereonowasi i yawasisi.
8Kata kona meyagina kamonai wai nuwagaire i rakata saki.
9Ba niko mara veoromina, sebare kana waba Simon, Samaria kamonai i bikairapu wai si biwareyei, ba ikesina i kaobigegaena meyei kata kona pipiya kaikapona.
10Ba pipiya marimariyisi ba moyamoyakisi ereonowasi kona wata si nonora kabikabitamni. Ba si wona, “Niko sebare wai te wonawona kona ana maragata kaidamonai i gakira wai e wosewosei bage kona god.”
11Ba ana bikairapu tepanai wai, niko mara veoromina pipiya si kibikibi ba si biwareyei.
12Saba maranai Philip, God ana basileiya warana gairena ba Iesu Keriso kana wabai i rumamara wai, si geruwei. Kona kairavina sebasebare ba bibaine ereonowasi si babataito.
13Ba Simon yabata i geruwana wai i babataito. Ba Philip kiyakiyaya i wosewose i kinakinana wai i biwareyei ba memena wata i nenae wai i kibikibi.
14Ba maranai apostle Jerusalem kamonai wara si nonori kata, Samaria biyisi Bada si yauni, ba asi yawasa si berena wai, Peter ba John si poraisi sita nae kurisi.
15Ba maranai si verakasibau wai, kairavisi si rupari kata Kanuma Kaobaisiyena sita yauni,
16basuna kosi Kanuma Kaobaisiyena wai kega kurisi i riu, saba kosi wai Iesu kana wabai si babataito mom.
17Peter ba John yarosi si terei ku tepasi wai Kanuma Kaobaisiyena si yauni.
18Maranai Simon i kinani kata apostle yarosi pipiya ku tepasi si tereterei ba Kanuma Kaobaisiyena i saibisaibira wai mane i beyisi.
19Ba i wona, “Rubarubana niko maragata kota beriku wai yauku yebo ata borubaisi wai Kanuma Kaobaisiyena sita yuyauni.”
20Saba Peter i kaobeyei, i wona, “Kom ba am mane yabata ko nesaira, kom ku nosi bage God ana puyo wai mane yai sita gimogimoni.
21Ba God ana saibira kamonai wai kega kesana kom am gawara kona kam koda e mamana, kairavina nuwanuwam wai kega totorina God ku matana.
22Nikosi am wose goyogoyosi, ke tombubau taveyana ba ke rupari Bada kurina, kata am nuwasuya goyogoyosi, ke nuwanuwa suyana wai ina notataveyisi.
23Ba a kinanim wai kom nuwa badobado ba piragagoyo i bonuvim.”
24Damanina Simon i kaobeyisi, i wona, “Ko rupari kairaviku Bada kurina kata, awaika ko wonei wai kega kesana goyona ina tupuwa kuriku.”
25Ba maranai Peter ba John, Iesu kairavina awaika si kuiri si sisiyei i kakaba wai si veramaga, ba Bada wonana Samaria kupurina meyagisi ai si rumamarei yepo ku Jerusalem si verakasibau.
26Bada ana aneya i sisiya Philip kurina i wona, “Ke bomsiri kuna nae keta ku yawara mena, ba kupura momna ketana ku Jerusalem e gaigakira ku Gaza.”
27Damanina i tauya, i nae wai, keta dobonai chariot kamonai Ethiopia sebare i kinani. Jerusalem yai i bopepeta yepo i botubotu. Ba kona wai Ethiopia kana taupauma wasike, Candace gaburinai ana mane kana aba potapota,
28ba sebarena namai i veraveramaga wai ana chariot tepanai i makira ba peroveta Isaiah ana buka i baibaiyawa manei.
29Ba Kanuma Kaobaisiyena Philip i wonei, “Ke nae chariot parinai kuna mana.”
30Damanina ba Philip i vera i gae chariot ku parina, ba i nonori peroveta Isaiah ana buka i baibaiyawi. Damanina i toirubai, “Ke baibaiyavi wai basuna ke kuikuiri kona?”
31Ba kona i kaobeyei, “Mekabage ana kuiri, kesana kotoi ina kaobibeyebeyiku wai ana kuiri.” Damanina Philip i babai wai i geru ana ku chariot ba yabata si makira.
32Ba wona Isaiah kamonai, i baibaiyavi wai nikasike: ‘Si naovei nanakasike sheep rutaina kasibunuina kairavina, ba sheep wotuna rutainina gamona kega, sini korokorona te tomtomni wai e ma guguba.
33Si kaobibisakei, ba si kaobigoyoni, ba kega kesana kotoi murinai i msiri. Ba kega kesana kotoi ana rakaraka ini sisiyisi, basuna kona wai ana yawasa dobonai si kasiyaragi.’
34Damanina ba Ethiopia sebare Philip i toirubai, “Ke woniku, niko peroveta kotoi e bisisiyei, ikesina ebi bisisiyena meyei kona pipiya bauna e bisisiyei?”
35Damanina Philip kona wonana tepanai i msiri wai Iesu warana gairena i sisiyei sebarena kurina.
36Ba sirinai ketai si gaikira wai si botu ku okowa mena. Ba sebarena i wona, “Ke kinani, okowa wai nina ba ata babataito kona?”
38Damanina i kaotuneisi wai chariot si yotei ba si sukira, ba asi ruwamo si gakira si nae ku okowa kamona ba Philip i babataitoi.
39Ba maranai si gae ku tepa wai, Bada kanumina Philip i yauni taveyei wai kega i kinana meyei saba kona ere nuwagairena i nae.
40Ba Philip i botu ku Azotus, ba kamonai i yewo neubuwa, meyaga nunusi yai Bada wonana i raumamarei yepo i verakasibau ku Caesarea.
