Acts 25

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Festus i verakasibau ku Caesarea ana saibira wauna i yauni ba, kao tonu murinai wai i nae ku Jerusalem,

²ba namai priest kaikaiwabosi ba Jew babadisi yabata si kesanisi. Ba asi bikunumaka sisiyina Paul kairavina, Festus kurina si terei.

³Festus si baba tupetupeni kata asi waina ita wosei, Paul ita kukuwa sirei ku Jerusalem, kairavina bibune yai si bobunaga, kata keta dobonai sita kasibunui.

⁴Saba Festus i kaobeyisi, i wona, “Paul kona Caesarea patuma yovenai te botawani ba mara yoginaikei, ikesiku mom ana veramaga nakai.

⁵Ami babada mutusi yabata kana nae ba asi bikunumaka, sisiyisi sebarena kurina sina terei, kata awaika kesana goyona i wosei kona kega.”

⁶Festus kao 8 kona 10 nanakasike yabata si mana, ba i gakira ku Caesarea ba mara i tom mena wai bibuibuiya yovenai i makira ba i kaotuneisi kata Paul sita urabai sita riu.

⁷Ba Paul i verakasibau wai, Jew biyisi Jerusalem yai si botu wai si msi bibiri, ba asi bikunumaka kwarukwarumisi pesarisi si terei saba, ereonowana wai kega bisuwona.

⁸Saba Paul ikesina i papara meyei i wona, “Yauku kega kesana Jew biyisi asi kairuwana ai kasikotobi, kona God ana yove a kaobigoyoni, kona Caesar kurina awaika goyona a wosei.”

⁹Festus ana waina Jew biyisi iti nuwagairenisi wai, Paul kurina i wona, “Kom am waina kuna gae ku Jerusalem, ba namai ani buibuiyim kona?”

¹⁰Paul i kaobeya i wona, “Yauku karaku Caesar ana bibuibuiya gawarinai a bimsiri, ba nimai siti buibuiyiku. Kom ku kuira kabitamni kata kega kesana awaika goyona Jew biyisi kurisi a wosei.

¹¹Saba memena bage goyona a wosei ba sarobina wai rabobo wai yauku, kega rabobo a bisinikikiyei. Saba Jew biyisi tebi kunumakiku wai, kega bisuwona ba kega kesana kotoi ana maragata e mamana kata ina berena taveyiku. Au waina Caesar ini buibuiyiku!”

¹²Festus ana kao bainuwaterena biyisi yabata si sisiya murinai, i kaobeyei, “Caesar kairavina kui baba wai, Caesar kurina kuna nae!”

¹³Kao kega pesarina si kakaba murinai Taupauma Agripa ba Bernice si verakasibau ku Caesarea, Festus sita rugenari ba siti kaikaivi.

¹⁴Ba namai si mamana wai, Festus taupauma kurina Paul kairavina i sisiya i wona, “Sebare kesana patupatumina nina Felix i sumarei.

¹⁵A nae ku Jerusalem wai Jew priest kaikaiwabosi, ba Jew babadisi ana saroba kairavina si bababaiku.

¹⁶A wonisi, kata Rome biyisi asi dudura wai kega pipiya saroba sina bere kwatamei, ba bikunumaka biyisi yabata si nimsiri, ba ana potu ina ravi ba ina kaobeyisi.

¹⁷Ba bikunumaka biyisi si botu maranai, kega ai potapota saba, mara i tom wai bibuibuiya kairavina wai, a kaotuneisi kata sebarena sita yauni sita botu.

¹⁸Ba bikunumaka biyisi si bomsiri siti sisiya maranai, ana goyona a nosinosi wai kega, nanakasike si kunumakei.

¹⁹Saba kosi asi bikawapata mutusi bausi si wosewose. Asi bigeruwana kairavina ba sebare raoboraobona kana waba Iesu, saba Paul i wona kata kona yawayawasina.

²⁰Saba kega a kuiri mekabage sisiya damana ata yauni wai, Paul ai babai kata ana waina ita nae ku Jerusalem ba namai ana goyona siti buibuiyei.

²¹Paul i baba kata ana waina Caesar naonai iti msiri, ba kona iti buibuiyei, wai a kaotuneisi kata si botawani yepo ani porai ina nae Caesar kurina.”

²²Damanina ba Agripa Festus kurina i wona, “Au waina niko sebare ikesiku mom ana nonori.” I kaobeyei i wona, “Maram kuni tainabaenegei.”

²³Mara i tom wai Agripa ba Bernice si botu wai ere kaukau bunagisi ba ere ne tagegeyisi. Abiya babadisi ba meyaga babadisi yabata si deri si rui ku bibuibuiya yovena. Ba Festus i kaotuneisi wai Paul si urabai si riu.

²⁴Festus i wona, “Taupauma Agripa, ba iyabomi wata nina wai, niko sebare ko kinani! Kona wai Jew biyisi ereonowasi Jerusalem ba Caesarea kamonai, si gwinigwini ba si parapara, kata ana goyona kairavina ita rabobo.

²⁵Ba a panani kata kona kega kesana goyona i wosei, ba ita rabobo, ba i baba ana waina ina nae ku Rome.

²⁶Karinai kega kesana bikunumaka kabitam a panani, kata Caesar kurina ata kirumi. Kona kairavina a botuwei ereonowami kurimi, ba kom Taupauma Agripa naomi yai awaika kesana ana panani wai ana kirumi.

²⁷Kairavina a nosinosi kata kega i gaire ba patupatumina, kega kesana ana goyona a panani ba ati porai ita nae Caesar kurina.”