1Cá'anqueze dxal-la' nézele lu zra bze̱be ni' gaca na ste̱be chee̱ bénneache.
2Bénneache ca' xelaque̱': Benne' xelezrí'ize cuina, ne xelezrí'ine̱' dumí. Xulucá'ana szren cuine̱', ne xulucá'ana cuine̱' ca benne' blau ca'. Xelenné̱' schanni' chee̱ Dios, ne quebe xuluzúe̱' dizra' chee̱ xra xrne̱'e̱. Xelaque̱' benne' quebe dxelezí le̱, ne benne' quebe dxelapa ba lá'ana Dios.
3Quebe xelaque̱' zri'i lazre', ne quebe xelexexache lazre̱' ljwezre̱'. Xelenné̱' chee̱ ljwezre̱', ne quebe xelenná be'e cuine̱'. Xelaque̱' benne' snia ca', ne xuluzúe̱' chalá'ala da naca xrlátaje.
4Quebe xelaque̱' li lazre' nen ljwezre̱'. Xelaque̱' benne' dxelexube. Xeléquene̱' zaj naque̱' benne' szrente̱. Xelexezaca ba lázredxene̱' da ca' dxeledánene̱' quézcala da naca chee̱ Dios.
5Lácala xululé'e cuine̱' ca benne' zaj naque̱' chee̱ Dios, quebe súale̱ le̱' xel-la waca chee̱ Dios. Quebe gunu' tu zrén benne' ca'.
6Ca zaj naca benne' caní zaj naca benne' ca' zjaque̱' tu tu xu'u, ne dxelezí xe̱'e̱ nu'ula quebe zaj zie̱' du lazre', ne zaj zua da dxagu na zria lázrdawe̱' da naca chee̱ xtul-le'. Xel-la dxelezá lazre' chee̱ nu'ula caní nazrube xu na le̱'.
7Lácala tu dxulusé̱dezqueze̱' chee̱ xel-la li, cabata' dxeléajni'iquezne̱' na.
8Ca belún Janes ne Jambres, benne' wazrá' ca', benne' ca' guledábague̱' Moisés, cá'anqueze dxelún benne' caní, dxeledábague̱' xel-la li. Zaj nazrinnaj xichaj lázrdawe̱', ne belexecuase̱' lu xel-la dxeajlí lazre' chee̱ Dios.
9Quebe bi xelezrué'e benne' caní, lawe' da xeleque bé'equeze xúgute̱ bénneache zaj naque̱' benne' xálaze, ca gulaca benne' chupa ca' guledábague̱' Moisés.
10Ba benu': Ca da bzéajni'ida' bénneache, ne blé'equeznu' ca bé̱nqueza'. Nézenu' da dxaca lazra' guna', ne ca dxeajlí lazra' Cristo. Bchaga lawa' da guzxaca', ne nazrí'ida' xúgute̱ bénneache. Nézenu' ca naca xel-la zren lazre' chia'.
11Blé'enu' ca guláu zi' xuzre̱' neda', ne ca gudéa' xel-la zi'. Nézenu' xúgute̱ da guzraca' lu xe̱zre Antioquía, ne xe̱zre Iconio, ne xe̱zre Listra. Guláu zi' xuzre benne' ca' neda', na' Xránadxu bselé̱' neda' lu xúgute̱ da ca'.
12Xúgute̱ benne' ca', benne' dxelaca lazre̱' xelúnqueze̱' ca da dxenná Jesucristo, weláu zi' xúzrequeze bénneache le̱'.
13Benne' ca' dxelune̱' da cale̱la, ne benne' dxelezí xe̱'e̱ welúndxaqueze̱' da cale̱la. Xelezí xe̱'e̱ bénneache, na' benne' xula xelezí xe̱'e̱ benne' caní.
14Lue', guzé̱ chacha ca da ba naxéajni'inu', da na' nuxrén lazru'. Nézqueznu' nu bse̱de lue',
15na' ne nácateu' bídau'te̱ ba núnbe'u da dxenná lu xiche lá'azxa, da dxezeque na guzéajni'i na lue', chee̱ lau' lawe' da dxeajlí lazru' Jesucristo.
16Xúgute̱ da naxúaj na lu xiche lá'azxa naca na da bzéajni'i Dios benne' ca' zaj naque̱' bi chee̱ Le̱', ne naca na da dxuzéajni'i na dxi'u, ne da dxedil-la na benne' dxelune̱' da cale̱la, ne da dxusizre na dxi'u, ne da dxulé'e na dxi'u ca dxal-la' gundxu da xrlátaje,
17chee̱ gaca du lazre' bi chee̱ Dios, na' gácabe' bi naze̱de xanne chee̱ gunbe' xúgute̱ da xrlátaje.
