2a de Timoteo 3

1

2

3

4

¹Noka nkin ne lu kwaane: Re mbizh gwluzhtlaka gak tub mbizh nagan doo,

²nel snee gak re myet: to doo xaa yalxwa, zoblazh xaa demi, le xaa mod tub xaa non doo, nii nawent xaa re wechxinn xaa, nagont xaa xtizh xuz xaa nu xtizh xnaa xaa, nazaat xaa dixkix, nixa nazhebt xaa ne xaa Dios.

³Noka snee gak xaa: nakelat xaa wechxinn xaa, nixa nalest la xaa ne xaa re wechxinn xaa, nu gaazh xaa kwaan nawlit tich stub naz myet, nu nyent mod laa xaa le xaa rese kwaan nzhekla xkwerp xaa, naxinn doo gak xaa, yii xaa ne xaa re kwaan wen,

⁴kade xaa re xaa nyenn xaa, nu nazhebt xaa le xaa tub kwaan nawent, nu tubka to doo xaa yalxwa, nu masra kela xaa re kwaan yizhyo per nakelat xaa Dios,

⁵Mod xaa nzholl lo Dios nle xaa, per nzak xaa nyent mod le Dios kwaan gro. Bachii lo re xaa snee nle.

⁶Nel lo re xaa ne nzho xaa nya tub yoo nu stub yoo nu nkade xaa re ngwnaa, me tira nanagant kade xaa. Re me ne tubka nle xgab le me zyenra kwaan nawent, nu le me rese kwaan nzhekla xkwerp me.

⁷Nu nle me mod me nzhekla seed me kwaan wli, per nyent mod la kwaan wli yek me.

⁸Nel lee re xaa ne nayii ne kwaan wli modxa mle Janes nu Jambres, xaa nanzheklat gon re myet xtizh Ches. Nu nagont xaa kwaan wli nu tubka nle xaa xgab yalnaras, nu mlaa xaa ngwii xaa lo Jesucrist.

⁹Nalet xaa gan, nel ne re myet lee xaa nak tub xaa nachan, modxa ngok rop xaa nanzheklat gon re myet xtizh Ches.

¹⁰Timoteo, wen nreke lu tich rese kwaan mseed na lu, nu nela lu xomod nzhoo na, nu nela lu cho kwaan nzhekla na le na. Nela lu xomod ngwii na lo Jesucrist, nu xomod nyedoola na ne na re myet, nu xomod nkela na re xaa, nu xomod nyedoola na ndeed na bid.

¹¹Nela lu xomod mded doo na bid nu xomod mrenal re xaa na, nu xomod mdeed na bid yezh Antioquía nu yezh Iconio nu yezh Listra, nu xomod mrenal re xaa na. Per lee Xaa Nabeyy mkanap na lo re kwaan ba.

¹²Nu noka rese xaa kwaan nzhekla gak tub xaa nali lo re xcheen Jesucrist, telisa renal xaa xaa.

¹³Per lee re xaa nawent, xaa nle mod xaa non, masra tubka kale xaa kwaan nawent nu tubka kakade xaa zyen doo myet, per noka lee xaa yo xaa kade xaa.

¹⁴Per lu, tubka nali zo lo re kwaan mseed lu, nu tubka reke tich kwaan ba, nel nela lu cho lo mseed luya.

¹⁵Noka nela lu axta leezha chut lu, nlabeyy lu kwaan nkee lo Xkyech Dios. Nu leeya nzho mod lu lo lu, nen xomod le lu gan yalnaban kwaan tira, kwent cheen mod ngwii lu lo Jesucrist.

¹⁶Rese wdizh kwaan nkee lo Xkyech Dios nak kwaan mlu Dios lo re xaa mkeeya, nu nle xchiina: nseeda re myet, ngalnoya re myet, nluya re kwaan wen, ncheeya mod nak re myet, nu nzaaya kwent xomod zo nali xaa lo Dios.

¹⁷Zee lee re xaa Dios nzho mod ne xomod kee wen xaa xchiin Dios, nu nzho mod le xaa loka kwaan nzhekla Dios le xaa, leezha nkee xaa xchiin Dios.