Text copied!
CopyCompare
Dónbeenì páaníi fĩnle vũahṹ - Timɔtee ɲun níi

Timɔtee ɲun níi 3

Help us?
Click on verse(s) to share them!
1Zũń mu, le ká mu bìo ɓúenɓúen véró khíi wà ɓueé dã, á le lònbee á à kɛń làa sòobɛ́ɛ.
2Lé bìo mu pã̀ahṹ ká ɓa nùpua wé è cà mí kùrú bìo mí dòn. Ɓa à wań le wárí á à poń mu bìo ɓúenɓúen. Ɓa wé è khòoní míten, á à yòoní míten. Ɓa wé è bío hã bín-kora á à lɛɛ́ le Dónbeenì yi. Ɓa zàwa máa wé è ɲí mín nùwã bíoní. Ɓa nùpua á à wé ɓa bè-yízũńlowà. Bìo lé le Dónbeenì bìo á ɓa máa wé è dé kɔ̃̀nbii yi.
3Ɓa máa wań mín nùpua. Ɓa máa wé è zũń nùpue màkárí. Ɓa wé è yáa ɓa nùpua yènnáa. Ɓa máa wé è dàń míten máa ɓua yi, ɓa à wé ɓa nì-sũmáa, bìo se á ɓa máa wań.
4Bìa làa ba lé le ɲii á ɓa wé è lé mɔ́n. Ɓa máa wé è le mí yiwa máa wéráa mu bìo. Ɓa à wé ɓa khònlowà, ɓa à wań mí sĩa bìo á à poń le Dónbeenì.
5Ɓa wé è ɓua míten lè ɓa wee wé bìo sĩ le Dónbeenì yi, à le pànká ɓa ɲɔǹ yí tà bìo. Bán nùpua so á ũ khɛ̀nnáa.
6Ɓa nùpua mu tĩ́ahṹ ɓa ɓúi wé è lé yi á à zo hã zĩní, á zoó khà ɓa hã́awa ɓúi na sĩadéró yí fárá yí tĩna, á sú lè mu bè-kora, à ɓa yèrèmá bè ɓa bíoní yi. Ɓa hã́awa mu sĩa wee vá mu bìo na yí se lè mí sìíwà wéró yi.
7Ɓa wee kení míten fɛ́ɛɛ ká ɓa màhã́ yí dàńna yí zũna ho tũ̀iá poni.
8Bán nùpua so yí tà ho tũ̀iá poni bìo làa bìo ó o Zanɛɛsi là a Zãnbɛrɛɛsi hĩ́a yí tàráa o *Mɔyiize bìo bìo síi. Ɓa yilera yí se, ɓa yí dó mí sĩa sese le Dónbeenì yi.
9Ɛ̀ɛ ká ɓa bìo màhã́ máa va làa yahó lé bìo ɓa nùpua ɓúenɓúen zũ le ɓa vṹnun làa bìo ó o Zanɛɛsi là a Zãnbɛrɛɛsi vĩ́ló bìo hĩ́a zũnanáa bìo síi.
10Ɛ̀ɛ ká ũnɛ́n wón zũ bìo á ĩ wee kàrán lè ɓa nùpua, á zũ bìo á ĩ wee ɓua lè ĩten. Fo zũ ĩ tonló ɲúhṹ, á zũ bìo á ĩ dóráa ĩ sĩi le Dónbeenì yi. Fo mún zũ bìo á ĩ wee hĩ̀náa ĩ sĩi làa bìo á ĩ waráa ɓa nùpua. Fo zũ bìo á ĩ wee ɲìnáa ĩ yi.
11Bìo ɓa nùpua ɲíiníanáa ĩ sãnía, á beéra ĩ lò ho Ãntiosi lè ho Ikoniyuumu, lè ho Lisitere lórá yi, á fo zũ. Mu bon, ɓa ɓɛ̀ntĩ́n beéra ĩ lò làa sòobɛ́ɛ. Ɛ̀ɛ ká wa Ɲúhṹso màhã́ kã̀nía mi mu ɓúenɓúen yi.
12Bìa ɓúenɓúen na wi ɓa ɓua míten à héha làa bìo le Dónbeenì sĩi vá yi wa páaníló là a Yeesu *Krista bìo yi, bán ɓa à beé lò.
13Ká ɓa nì-sũmáa lè ɓa sabín-fũ̀aalowa, bán sũnsũmámu lè ɓa sabíoní wé è dé wán ká mu wà. Ɓa à vĩ́iní ɓa nùpua, á ɓa nùpua mún ǹ vĩ́iní ɓarɛ́n.
14Ká ũnɛ́n, bánbá à ũ wé bè bìo á fo kenía yi, à tà mu yi lè ũ sĩi ɓúenɓúen. Ũnɛ́n ũ bɛɛre zũ bìa kenía mu làa fo.
15Le Dónbeenì bíonì vũahṹ á fo zũ bìo hàrí ũ háyónmu yi. Lé lerɛ́n dà à na mu bè-zũńminì binbirì foǹ, bìo á fo dà à bè yi á à déráa ũ sĩi o Yeesu Krista yi á à kã̀nínáa.
16Le Dónbeenì bíonì vũahṹ á túara lè lerɛ́n mí bɛɛre Hácírí pànká. Le bíonì mu bìo ɲúhṹ wi làa sòobɛ́ɛ. Lé lerɛ́n wee kàrán o nùpue, á wee wé ò o pĩ́ bìo yí bon, lé lerɛ́n wee bé o nùpue, le mún wee wé ò o wé wé bìo térénna.
17Lé bṹn ǹ na ká le Dónbeenì nùpue á à dàń wé è wé hã wárá na se.