2 Timoteo 3

1

2

3

4

¹Lik chirajawaxik kawetaꞌmaj waꞌ: Chupa taq ri kꞌisbꞌal qꞌij lik kꞌayew chi ri jeqelem che ruwachulew ruma ri kibꞌinik kisilabꞌik taq ri winaq.

²Ma e kꞌo ri xew kakitaqej ri kakaj rike, e kꞌo ri lik e rayinel re puaq, e kꞌo ri lik kakitakꞌabꞌaꞌ kiqꞌij, e kꞌo ri kakikꞌaq bꞌi kiqꞌij ri katz-kichaqꞌ, e kꞌo ri tzel kechꞌaꞌt chikij jujun chik, e kꞌo ri na kakikoj ta kitzij kichu-kiqaw, e kꞌo ri na jinta kakitioxij, e kꞌo ri na kakixiꞌij ta kibꞌ chwach ri Dios.

³E kꞌo ri na jinta kꞌana rutzil kꞌuꞌxaj kukꞌ, e kꞌo ri na jinta kꞌana kꞌaxnaꞌbꞌal kikꞌuꞌx, e kꞌo ri e aj molot, e kꞌo ri na kakichꞌij ta uqꞌatexik ri kirayibꞌal, e kꞌo ri lik e titzꞌitaq, e kꞌo ri tzel kakil ri utz.

⁴E kꞌo ri e kꞌayinel re katz-kichaqꞌ, e kꞌo ri na kakichꞌobꞌ tana raqan ri kakiꞌano, e kꞌo ri lik kakiꞌan nim che kibꞌ, e kꞌo ri xew kakitzukuj ruqusil ruwachulew y na e ta kakitzukuj ri Dios.

⁵E kꞌo ri kakiꞌan pachaꞌ lik utz kiꞌanom chwach ri Dios pero na kiyaꞌom ta luwar che ri Dios kujalkꞌatij ri kibꞌinik kisilabꞌik rukꞌ ruchuqꞌabꞌ Rire. Maꞌan awe kukꞌ ri kakiꞌan taq waꞌ.

⁶Kukꞌil rike e kꞌo ri kebꞌok pa taq ja y kekisok rixoqibꞌ lik kꞌo kimak ruma e kitaqem taq ri kirayibꞌal.

⁷Tobꞌ xaqi kakita taq kꞌutunik, na rukꞌ ta kꞌu riꞌ, na kakimaj ta kꞌana usukꞌ ri Qꞌijsaq.

⁸Ekꞌu waꞌ waꞌchijabꞌ e pachaꞌ ri aj qꞌijabꞌ Janes y Jambres, ri xeyakataj chirij ri Moisés ojertan, ma rike eyakatajinaq chirij ri Qꞌijsaq y sachinaq ri kinaꞌoj yey na kekꞌul ta ruma ri Dios ma rike na jinta kꞌana kubꞌulibꞌal kikꞌuꞌx rukꞌ Rire.

⁹Na kebꞌel ta kꞌu pan rukꞌ ri kakiꞌano jelaꞌ pachaꞌ ri xkikꞌulumaj ri xeyaktaj chirij ri Moisés, ma kaqꞌalajin chikiwach konoje, na jinta saqil naꞌoj kukꞌ rike.

¹⁰Noꞌj riꞌat e ataqem ri saqil nukꞌutunik, ri jusukꞌ nubꞌinik nusilabꞌik, ri kuaj kanꞌan rukꞌ ri nukꞌaslem, ri kubꞌulibꞌal nukꞌuꞌx, runimal nukꞌuꞌx, ri rutzil nukꞌuꞌx y ri nuchuqꞌabꞌ che uchꞌijik ronoje.

¹¹Awetaꞌam kꞌu riꞌ lik ꞌanom kꞌax chwe y lik nutijom kꞌaxkꞌobꞌik jelaꞌ pachaꞌ ri xinwikꞌowibꞌej chupa taq ri tinamit Antioquía, Iconio y Listra. Ukꞌiyal taq kꞌaxkꞌobꞌik xpe panuwiꞌ, pero ri Qanimajawal Jesucristo xinukolobꞌej che ronoje waꞌ.

¹²Y jelaꞌ konoje ri kakaj kebꞌin jusukꞌ chupa ri bꞌe re ri Qanimajawal Jesucristo, kakitij na kꞌax kuma jujun chik.

¹³Ekꞌu ri winaq itzel kikꞌuꞌx y ri e sokosoꞌnel, lik kakꞌiyar uwach ri kimak. Kesokosoꞌnik y kakisok kibꞌ chikibꞌil kibꞌ.

¹⁴Noꞌj kꞌu riꞌat e lik chachuqꞌubꞌej awibꞌ che ri saqil kꞌutunik amajom y pa ri ajikibꞌam wi awibꞌ. Ma awetaꞌam chi utz china taq ri xekꞌutuw waꞌ chawe.

¹⁵Ma chachꞌutiꞌnal xawetaꞌmaj lo ri Santowilaj Uchꞌaꞌtem ri Dios tzꞌibꞌital kanoq, yey e waꞌ ri kuya anaꞌoj chaꞌ kakꞌul ri kolobꞌetajik ruma ri kubꞌulibꞌal akꞌuꞌx rukꞌ ri Qanimajawal Jesucristo.

¹⁶Ronoje Rutzij Upixabꞌ ri Dios tzꞌibꞌital kanoq e ri Dios bꞌiꞌyom re; waꞌ e lik kꞌo uchak re kꞌutunik, re pixabꞌanik, re kuyijbꞌaꞌ ri na utz ta uꞌanom y re qꞌilonik chaꞌ kojbꞌin jusukꞌ chwach ri Dios;

¹⁷y jekꞌulaꞌ konoje ri kakinimaj ri Dios e tijotal chi utz che uꞌanik ronoje utzilaj chak, ma yaꞌtal chi chike janipa ri kajawaxik chaꞌ kakiꞌan waꞌ.