1Oli Sipitisa dokome panao lao pituu yuu gii maitakao ipatamo dupanya endakali mendapuame masoo miningi doko yakinatala enjele koo minakasingi dupanya pii dupa sakamaiyowapi, enjele koo dupanya mana pii lapae dupa nyoo minawapi pitami.
2Dupanya masingi yukuoo nyepae dupame sambo mana watao minatala sambo pii latami.
3Dupame endakalipa nyala nayalapa, nee mendapua nala nayalapa lao daa lao katatami. Goteme baanya kiningi pii lapae doko masokondape pyoo masoo miningi endakali dupame yaka pilino lao nena lao wapuiyamo dupa sambo lenge endakali dupame daa lao nee nyoo katatami.
4Goteme wapuiyamo dupa pitaka epe lamo. Mende daa lao nepala nayapenge. Dupa pitaka yaka pilino lao nyepenge.
5Doko, Goteme wapuiyamo dupa pitaka baanya pii lapae dokopa loma singi dokopa dolapome etete epe injisingi.
6Embame pii dutupa naimanya masoo miningi kaiminingi dupa lamaiyoo katateno dokome emba Kataisa Jisasanya kalai pyakamaingi akali epe joo katate. Embame masoo miningi dokonya pii lapae dupapi, mana pii epe lapae nyoo minao payapino dupapi, dutupa minao pupu lao katate.
7Embame yuunya mee tindi pii enda wambake dupame lengema dupa nasoo waka katape. Embame Gote minao payalanya mana nyoo makande peta peta pyoo pyoaka katape.
8Yonge doko pupu lasoo mana nyoo makande pingi dokome naima kuki nisingiaka doko, Gote minao paenge dokome naima upa pitakanya nisingi. Dokome naima indupa kalyamano doko auu pyoo katao, dee tanga tangapi katatamano dokonya auu pyoaka katatamana lapae silyamo.
9Pii dopa lapae silyamo doko etete kiningina lao masoo minapenge lamo.
10Naimame ongonyaka kalai pyoo katao lekeleke telyamano. Doko, naimame Gote lete katenge doko lao masoo malisoo kalyamano. Baa endakali dupa pitakanya Pyoo Nyingi Gote. Baa lao masoo minilyamino endakali dupa baame etete pyoo nyingi.
11Embame mana dutupa watao minina lao mana lamaiyoo katape.
12Endakali mendeme emba patange lamo lao kilya kanja naenalena, embame pii latepi, mana minatepi, endakali auu kayatepi, masoo minao payatepi, tolao pyoo katatepi dutupame masoo miningi endakali dupa makande minao maipi.
13Embame endakali dupa Gotenya pii doko itaki pyao lamaiyowapi, dupanya mona sakatasakamaiyowapi, mana lamaiyowapi pyoo katao namba ipato gii dokonya tuu lape.
14Wamba isingi akali mendapuame Gotenya pii mendapua latala embame Gotenya kalai pitina lao aiyomba minani pyekeaminopa epe mee nyiino doko aopyoo latala mee sina kayate.
15Embame kalai dutupa makande pyoo pima-pima pyoo pyoo patenopa endakali pitakame kandena lao embame kalai dutupanya etete mona maitae katao pyokondape pyoo pipi.
16Embame emba tange kandao katape. Mana lateno dupa embame masoo lape. Embame kalai dupa pyoaka katape. Dopa pitino kandao doko, embame emba tange pyoo nyoo, dee embanya pii soo kalyamino endakali dupa pyoo nyoaka piti.
