1Mâro e qanaŋ ʒiŋuc mujaŋgeŋkerâ muekac: Juku ʒâhec ŋic tucnezi miti beherâ maŋ bâsifuc bâbâfua jaŋere eeatuc dâŋko â demoŋ jaŋere burecdâŋko qohotaniŋmu.
2Ine burecŋiczi maŋjeŋic ʒukiwic bakicnere ŋic eatuc‐jopahuc ʒiŋuc jazaeŋgopieŋ:
3“Ŋokac mi rohuc ŋicʒeŋoŋ juzo â nânâ gâcne mi nâhuc irec sowa juzo.” Nânâ i Anutuzi râe‐fârewec, erâ mamanasiŋhec juhuc dâŋfâri mana maŋ embeŋzi daŋge âzâcnehuc nanaŋte muwec.
4Anuturaonec wiac fuakicne i biaŋne sasawa. Erâ daŋge âzâcnehuc nâ bac eeŋgopeneŋko qaqatarene mi fokac.
5I Anuture dâŋzi â nunumuzi jambuŋkekicne hâcne.
6Go opâ ruac dâŋ i jaza qâmoc ecmu, ine Jesu Kristore kiŋaŋŋic dâŋ rereŋhec jucmu, ehuc mamanasiŋte dâŋ â mitire dâŋfuŋne fârine mana rereŋ ewaremeŋ izi maŋgere nâqiŋ eha jucmu.
7Â qeŋokac qizec dâŋ wose murarane ine qikiŋnezemec. Go Wofuŋ manasiŋkehuc jucmurâ maŋzi aafec bazemec.
8Sahacte aafec gie bapa izi fâfârine, â maŋ baafeckehuc Wofuŋ manariŋ qâriŋ eecne ine fârine. Izi ʒira mâreŋko â juku sambâŋko juju bâfua‐nâreocte mukicne.
9Dâŋ i fârine jâmbâŋ â mâmâc sâko ro maŋ eenere sâc.
10Irec fârine hâcne ronaŋte gie amec fâfâuc baeŋgopeneŋ, ine mumusoriŋzi fai‐nâŋecko feipieha Anutu jujune ere mamanacko juhuc eeŋgopeneŋ. E hâcne mâreŋ sâc ŋic jaŋere bâbâpiaŋ juekaczi mamanasiŋhec nâŋâcne ejâmbâŋkeekac.
11Dâŋ mukopac sasawa i jaza mutâc ezemec.
12Go motec ɋâri jukic irec ŋic jaŋe gore manapie wawahane mi ezejec. Go maŋjauŋhec â mamanasiŋhec â maŋɋaɋachec jutec miti mumugezi â juju bapagezi opâ ruac guru hata jowatuzejec.
13Woŋec‐nane juhuc miti wose qazuc â jaza qâmoc ehuc juzemec.
14Micne bapa jaŋe Mâroraonec dâŋ mufuahuc mejeŋic qizecgao râehuc jambuŋgumbiŋ, jambuŋ irec fârine sifucke‐garezacte bâiŋ basawec ezemec.
15Go irec mana mezac ehuc giege baʒihuc batec fârine fuarâ fua ehuc fome hone‐fârenʒepieŋ.
16Gahacne maŋ sahac soŋaŋkehuc mitire dâŋfuŋne furu mimic foŋareocte mâmâc soŋaŋkezemec. Go i hâcne paŋʒâic bajuzemec. Iŋuc ecmuo ine dâŋge manaeŋgopieŋ jaŋe mecne â go gahacne mâmâc juju biaŋko fisiniŋmu.
