1Tozi va bakalia sa Maqomaqo Hope sapu koari na rane mae hiroi si kote ta luarae sari kaiqa pa dia rinaṉeraṉe koe Karisito, meke kote va tabei rini sari na maqomaqo kokohadi, meke kote luli rini sari na vina tumatumae tadi na maqomaqo kaleadi.
2Sari na vina tumatumae kokohadi hire, si mae guadi koari na tie sekesekeidi. Lopu tumae nia rini sa tinoṉoto, sina sari dia binalabala pude vizatia gua sapu leana meke kaleana, si guana keketoṉa sapu ele tava uqu pa aeana lerana.
3Tozia rini koari na dia vina tumatumae, pude lopu varihaba, meke lopu gani si kaiqa ginani, gua. Ba taveti Tamasa sari na ginani hire, pude ta hena pa korapa zinama leana, pa vinaravara koari na tie pu va hinokaria se Zisu Karisito, meke gilania sa hinokara.
4Sari doduru pu taveti Tamasa si leadi beto, namu loketoṉa si pada pude ta kilu, be zama leana ni gita koe Tamasa pa vinaravara meke tiqe henai.
5Sina ele tava madidi si arini koasa zinama te Tamasa, meke pa vinaravara.
6Be va tumatumae ni goi koari kasa tamatasi koe Karisito sari na tiṉitoṉa hire, si kote na Nana nabulu leamu si goi, gua sapu ele tava tumatumae nia goi pa mua rinaṉeraṉe na vina tumatumae hinokara sapu lulia goi.
7Mu lopu avosi sari na vivinei hoborodi na kokohadi, saripu loke guguadi pa vinahesina sa Tamasa, ba mamu va podepodekae pude luli valeania sa pinamaṉana sa Tamasa.
8Sa vina podepodekae pude koa ṉiṉira pa tini si koadia tugo kaiqa nana lineana, ba pude keha lulia sa tinoa toṉotona gugua te Tamasa si leana hola pa doduruna sa tinoa, sina ponini gita Sa sa tinoa kamahire, meke sa tinoa vugo repere.
9Hinokara sapu gua asa, meke garo tugo pude va hinokaria ri doduru tie.
10Kalavarae si gita koasa Tamasa toa holana sapu sa Hinarupu tadi doduru tie, ba sa ṉatina si tadi na tie mo pu va hinokara. Gua asa ke tavetavete va ṉiṉira, meke voriti sisigiti si gita.
11Mu va tumatumae ni koari na tie te Karisito sari na qua zinama hire.
12Mamu lopu va malumi sarini pude doṉo va gore igo sina na tie vaqura si goi. Ba mu koa na kineha leamu koari pu va hinokara, pa mua kinokoa, pa zinama, pa tataru, pa rinaṉeraṉe, meke pa tinoṉoto.
13Ke mamu lopu makudo tiroa, na tarae nia, na variva tumatumae nia koari na tie sa zinama hope te Tamasa, osolae kaqu atu kamo vasina si rau.
14Mu tavetavete nia sa mua vinariponi sapu poni nigo sa Maqomaqo Hope, gua sapu ele korokorotae nia rina palabatuna sa ekelesia pa totoso sapu va opo nigo limadia rini.
15Mamu koa na tie ṉaliṉali pa kinopudi rina tinavete sara, pude ta dogoro valeana koari na tie sa mua tinoqolo koasa ninabuluna sa Baṉara.
16Mu kopu pule nigo pa mua hahanana meke pa mua vina tumatumae, mu tavetavete va ṉiṉira, ura be gua asa si kote ta harupu si goi, meke gua tugo saripu avosigo.
