Text copied!
CopyCompare
Luda yã takada kũ Bisã yão - 1 TIMƆTI

1 TIMƆTI 6

Help us?
Click on verse(s) to share them!
1Gbɛ̃ kũ ò de zↄ̀ ũnↄ ń dikirinↄ ditɛ gbɛ̃ bɛ̀ɛrɛdenↄ ũ ò mì natɛńnɛ a sĩnda pínki gũn, de òsun Luda tↄ́ kũ yã kũ odì dańnɛo vãni boro yãi.
2Gbɛ̃ kũ ń dikirinↄ de Yesu náanikɛri ũnↄ sún dↄkɛ kũńwo kũ ò de kↄ̃ gbɛ̃nↄ ũ yãiro. Ò zↄ̀ bleńnɛ manamana, zaakũ gbɛ̃ kũ òtɛni ń zĩ àre blenↄ bi Yesu náanikɛrinↄmɛ, ń gbɛ̃ yenyĩdenↄmɛ. Ǹ yã pìnↄ dańnɛ, ǹ lɛ́ daoḿma.
3Tó gbɛ̃ke tɛn yã pãnde dańnɛ, akũsↄ̃ adi zɛ kũ ó Dikiri Yesu Kirisi yãzɛdeo kũ ó zɛ́ yãdannɛnaaoro,
4ĩadãriimɛ, à yãke dↄ̃ro, lɛ́kpakↄ̃ana kori kũ yãgwana lakanasario a kũ̀ gyã ũ. Yã birenↄ dì tó gbɛ̃nↄ nɛ̀sɛgↄ̃ba kpá, ò fìti kɛ, ò kↄ̃ sↄ̃sↄ̃, ò laasun vãni lɛ́ kũ kↄ̃o,
5ògↄ̃ ĩni kũ kↄ̃o. Gbɛ̃ pìnↄ laasun kotina, yãpura ń kɛ̃, òdigↄ̃ da donyĩkɛna bi ↄgↄwɛtɛzɛmɛ.
6Donyĩkɛnaa àre zↄ̃kↄ̃ yãpura, tó gbɛ̃ zɛ̀ kũ pↄ́ kũ à vĩo.
7Zaakũ ódi su kũ pↄ́keo andunia gũn laro, óni tá kũ pↄ́keo sↄ̃ro.
8Tó ó pↄ́ble kũ pↄ́kasanↄo vĩ, abirekũ mↄ̀ lɛ.
9Gbɛ̃ kũ ò ye ò gↄ̃ aruzɛkɛde ũnↄ dì ń zĩda da yↄ̃ogwana tankutɛn. Pↄ́nidɛna mìsari karii dì gɛ̃ńgu à ń kpá kisira kũ kakatɛnaaooi.
10Yena ↄgↄi mɛ́ à de yã vãni sĩnda pínki zĩni ũ. Gbɛ̃kenↄ a kↄ̃dɛ kɛ̀ ari ò kɛ̃̀ ó donyĩzɛa ò wãwã zↄ̃kↄ̃ↄ kpà ń zĩdai.
11Zaakũ Luda gbɛ̃mɛ n ũ, ǹ bàa sí yã pìnↄnɛ, ǹ tó yã mana gↄ̃ donnɛ arɛ kũ yãkɛna a zɛ́aao kũ ludanaanikɛnaao kũ yenyĩo kũ mɛnao kũ busɛkɛnaao.
12Ǹ ó donyĩzɛ ↄsi mana ká, ǹ wɛ̃̀ndi kũ àdi lákaro sí, zaakũ abirekũn Luda n sisia gↄrↄ kũ n lɛ́ mana sɛ̀nɛ pari wára.
13Ma nannɛ Luda kũ àdi wɛ̃̀ndi kpá pↄ́ sĩnda pínkiaai kũ Kirisi Yesu kũ à yã mana ò Pↄntiu Pilatinɛɛo,
14ǹgↄ̃ yã kũ ò dìtɛnnɛ kũna gbãsĩ sari taari sari ari ó Dikiri Yesu Kirisi sugↄrↄ zĩ.
15Gbãnade mɛ̀n do Arubarikade, kínanↄ Kína, dikirinↄ Dikiri mɛ́ ani Kirisi pì bo gupuraa a gↄrↄa.
16Àkũ mɛ́ àdi garo ado, àdigↄ̃ kú gupura kũ òdi fↄ̃ ò nairo gũn. Gbɛ̃ke dí wɛ́ sialɛro, oni fↄ̃ sero. Àkũ mɛ́ à gakuri kũ gbãnao vĩ gↄrↄ sĩnda pínki, aami.
17Ǹ o andunia tera díkĩna aruzɛkɛdenↄnɛ, òsun ĩa dãro. Òsun gbãna le ↄgↄda náanisariaro, ò gbãna le Luda kũ àdi pↄ́ sĩnda pínki kpáwá zↄ̃kↄ̃ ò pↄnna kɛooa.
18Ǹ ońnɛ ò a mana kɛ, ò nna kɛńnɛ, ò ↄ porońnɛ, ògↄ̃ gbɛ̃kɛ vĩ.

19Lán abirekũ bà oni zàna mana di ń zĩdanɛ aruzenna pↄ́ ũ, oni wɛ̃̀ndi kũ à de wɛ̃̀ndi ũ yãpura le.
20Timↄti, ǹ yã kũ Luda nànnɛ n ↄĩ kũ gbãna. Ǹ mì kɛ̃ ludayãdanasari yã pãpã onaaa kũ yãlɛkpɛrɛ'ona kũ òdi pi dↄ̃naao.
21Gbɛ̃kenↄ zɛ̀o, akũ ò pã̀ ó donyĩzɛnɛ. Luda gbɛ̃kɛ kɛárɛ.