1Iwe, ätekewe ir amanau repwe fokun asamolu ar kewe masta, pun iei pwüngün mine repwe föri ngeniir, pwe esap wor eman epwe kapasingau usun iten Kot pwal usun ach afalafal.
2Nge ekewe amanau mi nom fän nemenien ekewe masta mi souläng resap turunufasei ar kewe masta pokiten ir pwiir souläng. Nge repwe alapala ar achocho le angang ngeniir, pun chokewe mi feiöch seni ar angang, ir chon lükü Kraist ra chen me rer. Ikei ekewe kapas kopwe aiti ngeni ekewe souläng o pese ngeniir pwe repwe aleasochis ngeni.
3Nge are eman a asukula och sokun kapas, esap pwal tipeeu ngeni ewe kapas enlet än ach Samol me ewe kapasen kait lon ach lamalam,
4i a uren lamalamtekia o esap silei och. A chök mochen akanini o afitikoko won kapas mi afisätä lolowo, tipefesen, turunufas me ekiekingau,
5pwal fitikoko lefilen aramas. Än ekei aramas ekiek a fokun ngau, resap silei mine a let, ra ekieki pwe ach souläng a awora ngenikich ach win.
6Ewer, ach souläng eu win mi lapalap are a wor rech menemenöch.
7Pun esap wor och mettoch sia uwalong lon fanüfan, esap pwal wor och mine sipwe uwawu me lon.
8Iei mine are a wor anach me üfach sipwe menemenöch ren.
9Nge chokewe mi mochen ar repwe pisekisek ra tolong lon sosot o ra tup lon eu särin chomong sokun mochenia mi umwes me afeiengau, ra atururelong lon feiengau me pöütüla.
10Pun mochenian moni iei popun sokopaten ngau meinisin. Ekoch mi ekieki ar repwe pisekisek ra mwalech seni ar lükülük o ra püsin aworato wor chomong riaföü mi fokun aweires.
11Nge en nöün Kot aramas, kopwe sü seni ekei mettoch meinisin. Kopwe fokun achocho ngeni om kopwe eäni pwüng, soulängöch, lükülük, chen, likitü me kirikiröch.
12Kopwe eäni ewe maunen lükülük mi fokun mürina, iwe, kopwe angei ewe manau esemüch, pun iei met Kot a köruk ngeni, lupwen ka pwora le pwärätä om lükülük mwen mesen chomong chon pwärätä.
13Üa allük ngonuk mwen mesen Kot mi fang manau ngeni mettoch meinisin, pwal mwen mesen Kraist Jesus mi pwora le pwärätä an lükülük mwen mesen Pontius Pilatus,
14pwe kopwe aleasochisi ekei allük fän allükülük, pwe esap wor eman epwe tongeni atipisuk tori ewe rän lupwen ach Samol Jesus Kraist epwe wareto.
15An wareto epwe fis lon ewe otun Kot a filätä. Kot i ewe eman chök Sounemenem sipwe mwareiti, i ewe King mi lapalap seni king meinisin, pwal i ewe Samol mi lapalap seni samol meinisin.
16I chök ewe eman esap tongeni mäla, a nom lon eu leni mi fokun saram, pwe esap wor eman a tongeni arap ngeni. Esap wor eman a piin küna, esap pwal fokun wor eman epwe tongeni küna i. I epwe angei iteüöch me nemenem tori feilfeilachök! Amen.
17Kopwe allük ngeni ekewe mi pisekisek lon mettochun ei fanüfan pwe resap lamalamtekia. Resap pwal anomu ar apilükülük won wöür epwe morola, nge repwe apilükülükü Kot mi fangesom ngenikich mettoch meinisin pwe sipwe feiöch ren.
18Kopwe allük ngeniir, pwe repwe föri mine a mürina, pwe repwe pisekisek lon ar föför mürina, repwe kichiöch o mochen alisi aramas.
19Ren ei repwe iseis fän iter och wöü epwe eu longolong mi nükünük fän iten ewe fansoun epwe feito. Mürin repwe angei ewe manau, iei ewe enletin manau.
20Iwe, en Timoty, kopwe tümwünü met Kot a lükü ngonuk. Kosap aüseling ngeni kapas mi ngau me ekewe kapasen anini mi lomotongau, ekoch aramas ra aita ngeni “silelap”, nge a mwäl rer.
21Pun ekoch ra apasa pwe ra eäni ei silelap, iei mine ra tokola seni ar lükülük. Än Kot ümöümöch epwe nonom remi meinisin.
