1Maduna henunai hesiai taudia iboudiai na lalodia bae hadai maoro, biagudia bae matauraidia, Dirava ladana bona iseda hahediba herevadia bae hadika na garina.
2Haida biagudia be Iesu ibadinana taudia; to imatauraidia basie hamaraḡia idia na varavara dainai. A isiaidia bae lao heni mai goadadia ida, badina be edia kara namo ese e hanamodiamu taudia na Iesu ibadinana taudia bona edia lalokau. Unu ba hadibadia toma bona unu ba hagoadadia toma.
3A baine hahediba kerere, eda Lohiabada Iesu Keriso ena hereva maoromaorodia bona Dirava ibadinana herevadia heḡereḡeredia basine gwaurai,
4tauna na hekokoroku tauna. Ia na ḡau ta asi dibana; henanadai bona hepapahuahu mo e ura heni kavamu. To unu amo e varamu ḡaudia bini: vaḡege, heai, ere-dika, lalo-hadai dikadia,
5bona lalodia e kereremu bena hereva momokani vada e rakatanimu taudia edia hepapahuahu asi anidia. Idia banava e tomu Dirava ibadinana na kohu idavarina dala.
6Momokani, Dirava ibadinana mai lalo-uamona be kohu badana ta.
7Badina be ḡau ta tanobada ai asita mailaia, ḡau ta danu basita laohaia.
8Taunabunai, malamala bona hahedoki baita davari, unu hari laloda ese bae moalelai na namo.
9A taḡa e ura heniamu taudia na hedibaḡani ese e butudia taomu, bona ura kavakavadia bona ura dikadia, idoa na heheto, ese e abidiamu. Taunimanima ihabua-taridia ḡaudia bunu, mase hanaihanai ai e hadonodia masemu.
10Badina be moni iura-henina na dika idoinai ramuna; bona e ura henia bada taudia haida ese Iesu ibadinana vada e rakatania, bona hisihisi momo amo sibodia vada e hedai uru.
11A oi, Dirava ena hesiai taumu e, unu ḡau iboudiai ba heautani; kara maoromaoro, Dirava ibadinana, kamonai, lalokau, haheauka, lalo-manau, ba ḡava.
12Kamonai ena tuari namona ba tuarilaia. Mauri hanaihanai iabina totona vada e boirimu, bona mauri hanaihanai harina namona vada o gwauraia hedinarai, dibadia taudia hutuma vairadiai; benaini, vada bavabia tao.
13Ḡau iboudiai edia mauri e henidiamu Diravana vairanai, bona Keriso Iesu, hereva namona Pontio Pilato vairanai e gwauraia Tauna, vairanai, na haduamumu:
14ina haheḡani ba badinaia, asi toutouna bona asi ihabadelaina, ela bona eda Lohiabada Iesu Keriso baine hedinarai.
15Nega namona ai Ḡaubada namo-hereana ese baine hahedinaraia; ia mo sibona Ḡaubada; pavapava edia Pavapava; lohia edia Lohia;
16ia sibona e noho hanaihanaimu, asi iraka-kahikahina diarina ai e nohomu; ta ese asine itaia, bona ta ese basine itaia diba. Hemataurai bona siahu ienai bae mia hanaihanai. Amen.
17Taḡa taudia ina tanobada ai ba haduadia, basie hekokoroku, asie mia daudaumu kohudia na basie laro, a Mauri Diravana mo bae laroa. Ia ese ihamoaleda ḡaudia iboudiai e henida dudukaumu.
18Ba haduadia danu, kara namodia bae kara, edia taḡa ḡaudia bunu. Edia kohu bae hariharilai, heabi-dae taudia ai baela.
19Unu amo edia badi namona bae abia heḡaeḡae, vairada dinadia ena, bena mauri korikori bae abia tao.
20Timoteo e, vada e henimu ḡauna ba gimaia; hereva dikadia bona kavakava herevadia bona aonega koikoidia hepapahuahudia amo ba raka oho.
21Unu na haida ese vada e abi dae, bena Iesu ibadinana vada e reaia. Harihari-bada emu ai baine mia.
