1Afa isug gafugag el eso Godum olug onigig eso ehengel heafgelni misog elim lahlafeni afa gafugag lahlafei eso afwambanai el esi Godna unehlag mi afa bigelni mog mom wagfunag mi amtakwalig mo faif.
2Afa misog el eba Godna el fegba masa isug gafugag el enaig esof, “Afa misog el kana nilite lofeg” eso ehe mas ehena lahlag gafugafei. Amo, ehengel so hugna ehenge pusug. Eso ehengel Godna elim kweagfugim afa enaig elim membenig. So na ohuna mom wagfunugum afa sihinuge.
3Afa aman el eso enmuna mo wagfunag afa mas Ainiyag Sisas Kraisna inim moi afa mo lahlag nihe minam wagfug eso enam kusiba,
4afa enaig el eba tutonbusug el feg afa ehe anwana eteti. Afa ehe membeg wesig mom esi eso hefum esim osum fiahgig afa moanagig. Afa enaig mo wa ohunaig onigig puguf elim filafeg, afa elim ismunagim waginig, afa elim amtakwalig mo sihinag, afa elim ismunagim sehinig,
5afa elim mas lahlag wangafi. Afa ehengelni onigig amtakwalig eso inim mo mas ehengelni goh mo. Afa ehengel enaig esogog, “Ka Godna mo wa ka fiba ka enaksag gawig wambug gofif.”
6Afa el Godna mo pahluku afa ehe enaig esog, “Mang gawig so ka feg eba kati yuhwafeg.” Afa enaig elbi mas tumeni ofenaiba enaksag gawigna el lofug feg.
7Afa mahim bigim afag fokwanaba mas big mang gawig kehla bona mo ohuna bite wa. Afa mahim bigim awahafiba big mas mang gawig wambukui.
8Afa big fane i afa lofug i fef eso big enaig esog mangwesei.
9Afa aman so hugna onigig og ka enaksag gawig wambu eso Satan ehem gihnagba eso ahanaig ahanaig amtakwalig onigig fegba eso ehem wegmosug fe fatig. Afa enaig onigig obu seahug afa ehem ati amtakwalig fatig.
10Afa kigim membeg nihe eba enaba mog feg eso ahanaig ahanaig amtakwalig onigig ehe nai yi fapukefeg. Afa mingnag el enaig onigig fig eso Godna mina eteti wahigim afa enaksag ahanaig kinig fig.
11Afa ne Godna el feg eso enaig nihem embem hilfuka. Eso neana nihe enaig suf eseg so na Godna sawieg pahlukui afa Godna nihe esei afa Godum olug oniginai afa elim membeni afa kinig ne pugunaiba eso ne kifuti goh afa elim afafnam fenugei. So na ohuna nihem hugna kehla.
12Afa el eso wagi kikini fakaf so na enaig ese Sisasim olug oniginam kikini enaig kaf eba nimbe higeg nofkenagag fafe. Afa mahim ne enaksag elni nof wa enaig sihifenaba kaba Godna el eso God nem gisfu wahiag eso ne enag nofkenagag fafe.
13Afa mungwali gawig eso nofkena feg God ehe mog enag nofkena faig. Afa Krais Sisas heafna lahlag mo Pontius Pailatim sihina. Afa eheningina nof wa ka nem enaig esona,
14Enag mo eso God nem faig eso ne enam lahlag gafugafe ese el enanai yi nuhwef mo nanguf. Eso ne enag gafugag kehla okwian eso Ainiyag Sisas Krais bof.
15Afa lahlag osuna God ehe ati gisfu wahiag eso Sisas ambagwa puguiba big nanguf. Afa God eba lahlag ehe mungwali gawigim nangwaghiageg, afa ehe mungwali misog elni misog feg, afa ehe Ainiyag mungwali ainiyagim nalig fenig.
16Afa ehe mas wahai afa ehe afwambusug nalig nafeg mas aman ika muhwa fenai. Mas aman ehem wesig ga mo nangug mo afa mas aman ika ehem gaba nangui. Afa heafna kigmog gwenaig higeg goh afa big so heafna unehlagim fingi fif. Ei, eba inim.
17Afa el enaksag bitenai gawig nafeg so na enaig elim enaig sihifeni og, nofeka tutonbusug el fi. Afa ese enaig onigifif ma kiafna gawig kam kweafuf, amo Godum mungo so na onigini eso ehe bigim mungwali gawig faig eso big enanai yi lahla augu fenam eso sifakalif.
18Afa so ehengelim sihini nihe lahlag fi afa enaksag lahlag gafugafi. Mingnagim kwegfwag onigig esenaf eso nimbiafgelni gawig enaksagna kwagani.
19Afa enag nihe eba mina eso ehengel hefum enaksag gawig agogluigim eso autunai wa wambuf. Eso nofkenagag fif afa enag nofkenagag eba inim nofkenagag.
20O Timoti, gafugag so God nem faig so na enam lahla fiafai. Afa mingnag mwakwalule el enaig esog kagelni anwana onigig eba lahlag afa enam mo bihigim so flafihiagigim afa amtakwalig mo sihig. So na enaig elni mom membifeni.
21Afa mingnag el enaig mom sihigim eso Godum olug onigig ena mina ati wahig. Sa ma God afoahlanam nengelim isug kwagani.
