1Malaka ruma ata nara ramahere neuꞌ Ramatua Yesus, sira muste fee hada-hormata neuꞌ malaka na, ela lahenda dea ra ta hapu enoꞌ fo dedea ramumulu Manetualain, ma ta radadae ita nanori na.
2aAta ruma malaka na namahere neuꞌ Ramatua Yesus, sona ata ra ta bole radadae sira malaka na, nana huu ana namahere neuꞌ Ramatua Yesus. Ara muste ralalau malaka na malole lena bali, nana huu sira sama-sama lahenda kamahereꞌ, de muste esa sue-lai esa.
2bTimotius! Manori-mafada lahenda kamahereꞌ ara basa ia ra, ma fufuꞌa-aali si, ela tao tuka basa sira.
3Ita nanori roo-tetu na dadi neteꞌ fo tao tuka Manetualain hihii-nanaun. Lahenda bea nanori-nafada fekeꞌ neme ia mai, sona ana ta sipoꞌ Ramatua Yesus Kristus nanori-nafada roo-tetu na.
4Lahenda rupa leo naꞌ a, koao na seli, tehuu pakanaꞌ na seli! Ria hedi na riꞌ, saka noi dedea lakaꞌ nalelena aoꞌ. Basa sira reni ete aoꞌ, nahuu-nalenaꞌ, namumulu-namamaeꞌ ma napaneneoꞌ.
5Lahenda rupa leo naꞌ, ta basa aadu-tatao musu-nasaꞌa. Duduꞌa-aafi nara tadaluꞌ a. Ara ta bubuluꞌ malole na riꞌ ubeaꞌ. Ara afi rae, maneniko sira makate tuka Manetualain hihii-nanaun, sona bisa ramasuꞌi.
6Memaꞌ kalu ita leleo-lalaꞌon tao laꞌe Manetualain dale na, sona bisa neni fee ita oonto bauinaꞌ.
7Mafarene matalolole! Tepoꞌ fo boki ita, ta teni hata esa leo dae-bafoꞌ ia mai boeꞌ. Ma fai fo ita mate, ta teni hata esa kalua neme dae-bafoꞌ ia mai boeꞌ.
8De, sadi hapu nanaaꞌ ma kakao-papakeꞌ, sona dai so!
9Tehuu lahenda fo rahiiꞌ ramasuꞌi, sona tuda rala sosoba rupaꞌ ara daleꞌ, ma hapu duduku-papauꞌ ii-onaꞌ nana huu ara duꞌa-afi noi hata-heto. Basa sira reni soe, ma tao ralulutuꞌ sira masodan.
10Huu fo basa tadalu rupaꞌ huu-okan nana riꞌ neme dale noi doi-tali. Lahenda ruma usi noi doi-tali, losa ara heo reme namahere matetuꞌ a mai. No ria na, ara tao ralulutuꞌ seluꞌ sira masoda nara.
11Timotius! O nana Manetualain nuuhuun. De dooꞌ a meme basa tadaluꞌ ara mai. Masoda no malalao-malalafuꞌ, tao mamahoꞌo Manetualain dale Na nai basa hihii-nanauꞌ, mamahere maroo neuꞌ Yesus Kristus, manenete nai susa-lela, ma balaroe-balanauꞌ mo basa lahenda.
12Malalaꞌo tebe-tebe basa nanoriꞌ fo ita tamahere. Manetualain fee o soda-moleꞌ manabasa taꞌa so, de bosoꞌ tuꞌu-karin. Ma o mafada namahere ma nai lahenda matan.
13Besaꞌ ia au hule o tao hehelu leo iaꞌ: tao tuka Ramatua Yesus pareta na katemaꞌ. Bosoꞌ malena laka pareta esa boe, ela lahenda ta hapu o sala ma. Tao tuka basa sira no matetuꞌ, losaꞌ fai fo ita Ramatuan Yesus Kristus natafali mai. Au hule o helu leo naꞌ nai Manetualain matan. Ria riꞌ fee ani hahaeꞌ neuꞌ basa-basan. Ma au hule o helu leo naꞌ nai Yesus Kristus matan. Ria riꞌ tuiꞌ neuꞌ loan nai gubernor Pontius Pilatus matan.
15Ramatua Yesus marela-masaꞌa, Ria riꞌ homu kuasa! Ria, Mane Bauinaꞌ nemeꞌ basa maneꞌ ara mai. Ma Ria, Malaka Bauinaꞌ neme basa malaka ra mai. Naraa no ledo-fain boe ma, Manetualain neuꞌ ko tao makaledo enoꞌ ia ra.
16Noi Ria riꞌ ta mopo-mate. Ana nasoda nai makaledoꞌ a daleꞌ, fo lahenda ta bisa relu Ni fa. Ta hapu lahenda esa bisa nita Ni boe. Basa-basan fee hada-hormata neuꞌ Ana. Basa kuasa a lalaꞌen nai Ria lima Na losaꞌ do-doo na neu! Noi ri naꞌ so! Amin!
17Mafarereneꞌ fee lahenda kamasuꞌi rai dae-bafoꞌ a, fo ara bosoꞌ koao ma bosoꞌ ramahena neuꞌ sira hata-heto nara. Huu fo hata-heto sira neuꞌ ko sapu-lalo. Malole lenaꞌ ara ramahena neuꞌ Manetualain masodaꞌ. Huu fo Ria riꞌ bati-pala fee ita basa-basan no namanoꞌu-namadaiꞌ, ela namahoꞌo-natadale nai ita dalen.
18Mafarereneꞌ fee si ela ara tao malole. Ma tulu-fali lahenda no namanoꞌu-namadaiꞌ neme ua-naleꞌ fo Manetualain fee si a.
19No ria na ara rabubua hata-heto fo neuꞌ ko dadi neteꞌ soaneuꞌ sodaꞌ fai manamaiꞌ nai nusatetu-ikutemaꞌ.
20Timotius! Manea matalolole basa-basan fo Manetualain peda si rai o lima dale ma so. Dooꞌ a meme dedea nakarorokoꞌ sosoa-raraa taꞌa. Bosoꞌ malelenaaoꞌ laꞌeneuꞌ hihii-nanauꞌ fo ta neni hada-horomata neuꞌ Manetualain. Mafarereneꞌ! Lahenda ruma tao ao nara reuꞌ lahenda malelaꞌ. Sekona te sira ‘malelaꞌ na’ neteꞌ taꞌa.
21Huu fo lahenda ruma ramahere nanori napuputaꞌ ara, losa heo reme namahereꞌ a mai. Au hule fo Manetualain natudu dale malole Na neuꞌ emi basa. Soda-moleꞌ, Paulus
