Text copied!
CopyCompare
Bible Ni Thothup - 1 Samuel

1 Samuel 15

Help us?
Click on verse(s) to share them!
1Me ga’ar Samuel ngak Saul, “I gag e en ke pi’eg SOMOL ni nggu gapgepnag lolugem ngam par ni kam mang pilung rok piyu Israel ni girdi’ rok. Ere mu telim ko thin nike yog SOMOL ni Gubin ma Rayag Rok.
2Bayi gechignag e girdi’ nu Amalek ni bochan e ra togopluwgad ngak piyu Israel ko fa ngiyal’nem ni chuw piyu Israel u Egypt.
3Mman ngam og ngak e pi Amalek, ngam kirebnag urngin ban’en ni bay rorad. Dariy ta’ ban’en ni ngam pag; mu thang e pogofan rok urngin e pumo’on, nge ppin, nge bitir, nge bitir ni kab ran, nge garbaw, nge saf, nge kamel, nge dongki.”
4Me ulunguy Saul e yu raba’ i salthaw rok nga Telem nge theegrad: ma 200,000 e salthaw nu Israel ma 10,000 u Judah.
5Ma aram miyad yan e salthaw rok ko fare binaw nu Amalek ngranod ra mithgad ngalan ba lul’ nike m’ay e ran riy ni ngar oggad ko pi Amalek.
6Me pi’ e thin nge yan ko pi Kenite ni ga’ar, “Mu chuwgad rok e pi Amalek nir nge dab mu’ned ngorad ko yam’. Ya um golgad ngak piyu Israel ko fa ngiyal’nem nra chuwgad u Egypt.” Ma aram me chuw e pi Kenite u fithik’ e pi Amalek.
7Me gel Saul ngak e pi Amalek, ni cham u Havilah nge mada’ nga Shur, ni bay ko ngek u Egypt;
8me fek Agag ni Pilung ko pi Amalek nde li’ ngem’, me li’ urngin e girdi’.
9Ma de thang Saul nge salthaw rok e fan rok Agag, ma dar li’ed e tin th’abi fel’ e saf, nge garbaw, nge tin th’abi fel’ u pifak e garbaw, nge pifak e saf, nge tin ni bfel’ ban’en; machane ra kireb niged urngin e tin gathi rib fel’ nge tin ndariy fan.
10Me ga’ar SOMOL ngak Samuel,
11“Kug kolngan’ug ni gu turguy Saul ni nge mang pilung; ya ke pi’ keru’ ngog daki fol ko tin gog ngak ni nge rin’.” Me par Samuel ni kari kireban’ ma ke damumuw, me par e re nep’ i n’em ni polo’ ni be wenig ngak SOMOL.
12Ma reb e rran riy nri kakadbul me yan ni be changarnag Saul. Me rung’ag nike yan Saul ko fare binaw nu Karmel, ma ke ubung e malang u rom ni ban’en ni nge guy e girdi’ miyad leamnag Saul, ke mu’ ma ke yan nga Gilgal.
13Me yan Samuel ngak Saul, me ga’ar Saul ngak, “Samuel, i SOMOL e ngi i tow’ath nagem! Kug fol ko tin ni yog ngog ni nggu rin’.”
14Me fith Samuel ngak ni ga’ar, “Ere mangfan ni gu be rung’ag laman e garbaw ni be tolul nge laman e saf ni be non?”
15Me fulweg Saul ni ga’ar, “Salthaw rog e kar feked rok e pi Amalek. Kar ted e tin th’abi fel’ e saf nge garbaw ni ngar pi’ed ni maligach ngak SOMOL ni Got rom, ma tin ke magey e go’ kug li’ed.”
16Me ga’ar Samuel, “Mu tal, nggu weliy ngom e tin keyog SOMOL ngog fowngan.” Me ga’ar Saul, “Mu weliy ngog.”
17Me fulweg Samuel ngak ni ga’ar, “Yugu er rogon ni ga be leamnag ndariy rogom, ya gur e pilung ko pi ganong nu Israel. I SOMOL e ke gapgep nagem ni gur e pilung nu Israel,
18me pi’em ni ngam man mu thang owchen e pi Amalek ni bogi girdi’ ni kireb. I yog ngom ni ngam cham nge mada’ ko ngiyal’ ni kam thang owcherad ni yad gubin.

19Ere mangfan nda mu fol ko tin ni yog? Mangfan ni mu gur nigem ko tin bay rorad ngam rin’ e tin nde m’agan’ SOMOL ngay?”
20Me ga’ar Saul, “Kug fol ko tin ni yog SOMOL ngog. Gu wan nrogon ni yog ngog, kug kol Agag ni Pilung kug fek i yib, ma kug li’ urngin e pi Amalek karm’ad.
21Machane salthaw rog e dar li’ed e tin th’abi fel’ e saf nge garbaw nra koled; kemus ni kar feked ngaray nga Gilgal ni ngan pi’ ni maligach ngak SOMOL ni Got rom.”
22Me ga’ar Samuel, “Mang e ba’adag SOMOL? Fol fa tin ni ngan pi’ ngak ara maligach? Kabfel’ ni ngan fol rok ko bin ni nga ni pi’ e bin th’abi fel’ e saf ngak ni maligach.
23Togopluw ni ngan tay ngak e ta’reb feni kireb nge pig, ma ufanthin nge tolngan’ e ba denen ni ta’reb rogon ko meybil ni yima tay ko liyos nma meybil boch e girdi’ ngay. Bochan e kam pi’ed keru’med ko tin ni yog SOMOL ngom ni ngam rin’, ma aram e ku er rogon ir nike n’igem ni aram e dab kum pilung.”
24Me ga’ar Saul, “Kug denen, ya da gu fol ko tin keyog SOMOL ngog nge tin mog ngog ni nggu rin’. Gu tamdag ngak e pi salthaw rog mu gu rin’ e tin nib magan’rad ngay.
25Machane wenig ngom, mu n’ag fan e denen rog ma gu’un ngog ngad sulow, nge yag ni gu liyor ngak SOMOL.”
26Me fulweg Samuel ni ga’ar, “Dab gu’un ngom ngdarow ya kam n’ag e tin ni yog SOMOL ngom ni ngam rin’, ma ke n’igem ni aram e dab kum mmang pilung nu Israel.”
27Me cheal Samuel ni nge yan, me thiy Saul pa’ ko mad rok, me mogchoth.
28Me ga’ar Samuel ngak, “I SOMOL e ke gochthiy ke fek e gagiyeg nu Israel u pa’am e daba’ ke pi’ ngak yugu be’ ni kabfel’ ngom.
29Got rok piyu Israel ni ir e th’abi tolang e der ma lifith l’ugun ara thiliyeg laniyan’. Gathi ir ba girdi’, ma der ma thiliyeg laniyan’.”
30Me ga’ar Saul, “Kug denen, machane mu tay fag u p’eowchen e pi’in yad ma yog e thin rok e girdi’ nu Israel ngu p’eowchen urngin piyu Israel. Mu un ngog ngad sulow nge yag ni gu liyor mu gu meybil ngak SOMOL ni Got rom.”
31Ma aram me un Samuel ngak ngar sulow, me liyor Saul ngak SOMOL.
32Me ga’ar Samuel, “Mfek Agag ni Pilung i yib ngog.” Me yib Agag ngak ni be t’on ko marus, ni be ga’ar u wan’, “Ra chugur e yam’ ma rib gel e kireban’ nma yib!”
33Me ga’ar Samuel, “Rogon nike gagiyegnag e saydon rom bo’or e matin karanod ra pired ndakuriy pifakrad, e aram rogon e en ni chitinam e chiney ni nge par ndakuriy fak.” Me th’eth’ab Agag ni nochiyang u m’on ko altar nu Gilgal.
34Me yan Samuel nga Ramah, me yan Saul ni Pilung nga tafen nga Gibeah.
35Ma daki mada’nag Samuel Saul ni Pilung u n’umngin nap’an e yafos rok; machane me par Samuel ni kari kireban’ ngak Saul. Ma SOMOL e kalngan’ ya ir e turguy Saul ni nge mang pilung nu Israel.