1Abire yãi à yã vãni sĩnda pínki tó kũ ɛ́kɛtona sĩnda pínkio kũ manafikio kũ nɛ̀sɛgↄ̃bao kũ kↄ̃yakanaao.
2Lákũ nɛ́kpãntɛ̃nↄ dìgↄ̃ yↄ̃'i ni dɛ nà, àgↄ̃ Luda yã kũ à de lán vĩ'ipu swáswa bà ni dɛ lɛ se, de à le à gbã á surabana zɛ́ gũn,
3tera sà kũ a dↄ̃̀ kũ Dikiri mana.
4À nai, àkũmɛ gbɛ̀ wɛ̃̀ndide kũ ò gìi ũ, ama Luda a sɛ̀ bɛ̀ɛrɛde ũ.
5Ákↄ̃nↄ sↄ̃ á gbɛ̀ wɛ̃̀ndide kũ Luda tɛni a kpɛ́ ɛ̃ boonↄ ũ. Ákↄ̃nↄmɛ a gbàgbarinↄ ũ, adì sa kũ àdi káagu o kũ a Nini gbãnao Yesu Kirisi gãi.
6Zaakũ ò kɛ̃̀ Luda yãn ò pì: Ǹ gwa, matɛn gbɛ̀ ditɛ Zaiↄ̃, ɛ̃pɛtɛna gbɛ̀ bɛ̀ɛrɛde kũ ma sɛ̀ ũ. Wé'i ni gbɛ̃ kũ àtɛni a náani kɛ kũro.
7À de gbɛ̀ bɛ̀ɛrɛde ũ ákↄ̃nↄ kũ átɛni a náani kɛnↄnɛ, ama à de lɛ gbɛ̃ kũ òtɛni a náani kɛronↄnɛro. Gbɛ̀ kũ kpɛ́borinↄ pã kpài mɛ́ à gↄ̃̀ kpɛ́ kusuru gbɛ̀ mìde ũ.
8Lɛn dↄ à de: Gbɛ̀ kũ òdi gɛ̃̀ sía ũ, gbɛ̀si kũ òdi kpáala ò lɛ́tɛ ũ. Ò gɛ̃̀ɛ sìa, kũ odi Luda yã daro yãi. Lɛn Luda dìtɛńnɛ lɛ.
9Ákↄ̃nↄmɛ buri kũ Luda ń sɛ́nↄ ũ, kínanↄ kũ sa'orinↄ ũ, a gbɛ̃ kũ ò kú adonanↄ ũ, de à Luda kũ à á sisi a bo gusiran, à gɛ̃̀ kãáo a gupura bonsarɛde gũn sáabu kpá.
10Á de Luda gbɛ̃nↄ ũ yãro, ama tera sà a gↄ̃ ń ũ. Luda dí sùru kɛ kãáo yãro, ama tera à kɛ̀ kãáo.
11Ma gbɛ̃ yenyĩdenↄ, lákũ á de nibↄ kũ bòasunↄ ũ nà andunia dí gũn, matɛn lɛ́ daáwa, à mì kɛ̃ á dà vãni kũ òdi zĩ̀ ká kãáonↄa.
12Àgↄ̃ kun gbɛ̃ bɛ̀ɛrɛdenↄ ũ kifirinↄ tɛ́. Lɛmɛ dↄ bee tó ò á dítɛ yãvãnikɛrinↄ ũ, tó ò yã mana kũ átɛn kɛnↄ è, oni Luda sáabu kpá gↄrↄ kũ ani suńyĩ.
13À mì natɛ ikode kũ bisãsiri dìtɛnↄnɛ ń pínki Dikiri yãi, kína kũ à gbãna vĩ deńlan yá,
14ke gbãnade kũ à dìtɛ à wɛ́ tã yãvãnikɛrinↄa à yãmanakɛrinↄ sáabu kpá.
15Luda pↄyenyĩnaan dí: Á yãmanakɛnaa gũn, áni yↄ̃nkↄ wɛ́siradenↄ lɛ́ yĩtɛńnɛ.
16Àgↄ̃ zĩdadenↄ ũ, ama àsun tó á gↄ̃na zĩdadenↄ ũ gↄ̃árɛ vãnikɛna zɛ́ ũro. Àgↄ̃ kun Luda zↄ̀blerinↄ ũ.
17À bɛ̀ɛrɛ li gbɛ̃ sĩnda pínkinɛ. Àgↄ̃ ye á Yesude dakenↄi. À vĩna kɛ Ludanɛ. À bɛ̀ɛrɛ lí kínanɛ.
18Zĩkɛrinↄ, à mì natɛ á dikirinↄnɛ, à zↄ̃kↄ̃kɛ dↄ̃ńnɛ yã sĩnda pínki gũn. Adi kɛ dikiri mana nɛ̀sɛdodenↄnɛ ńtɛ̃nɛnlo, ama kũ ń gbɛ̃ pãsĩnↄomɛ se.
19Tó ò wɛ́ tã̀áwa pã, tó a mɛna fↄ̃̀o Luda yãi, abirekũ sáabu vĩárɛ.
20Tó ò á gbɛ̃ á taari yãi, tó a mɛna fↄ̃̀o, abirekũ tↄ́ nna vĩ máa? Ama tó a wari kɛ̀ yã mana kũ a kɛ̀ yãi, tó a mɛna fↄ̃̀o, Luda ni á sáabu kpá.
21Abire yãin Luda á sisi à á sɛ́. Kirisi wari kɛ̀árɛ, à zɛ́ mↄ̀árɛ de àgↄ̃ tɛ́ a gɛ̀sɛgbɛɛi yãi.
22Adi durunna kɛro, odi ma à ɛ́kɛ tòro.
23Kũ ò a sↄ̃̀sↄ̃, adi yã síńlaro. Kũ à wari kɛ̀, adi yã pãsĩ ke ońnɛro, à zɛ̀ kũ Luda yãkpatɛkɛri manaomɛ.
24Àkũ mɛ́ à ó durunnanↄ dì a mìia, à gào lía, de ó bàka súngↄ̃ kú kũ durunnanↄ doro, ògↄ̃ kú yãmanakɛnaa gũn. A flã̀gbɛnↄ mɛ́ ò ó gbá aafia.
25Zaakũ a sãtɛ lán sãnↄ bà yã, akũ a arɛ dↄ̀ á Dã̀ri kũ á Dãkpãriiooa tera sà.
