1 ጴፂሮሳ ኪታ 2

1

2

3

4

5

¹ሄዋ ዲራው፥ ሂንቴፔ ኢታቴꬃ ኡባ፥ ጪሚያዋ ኡባ፥ ሎዓ ማላቲያ ኢታቴꬃ፥ ቃናቲያኔ ዚጊርሳ ኡባ ዲጊቴ።

²ጎዳይ ኬካ ጊዴዳዋ ሂንቴ ዴዑዋን ቤዔዳዋ ጊዶፔ፥ ሃዒ ዬሌቴዳ ጋጪኖ ናናቱዋዳን፥ ኡሺዴ ዲጫናዉኔ ኣታናው ፂሎ ጊዴዳ ኣያና ማꬃ ላሞቲቴ።

⁴ጎዳኮ ዴዖ ሹቻኮ ሺቂቴ። ኣሳይ ኣ ኢፄዳ፤ ሺን ፆሳ ማታን ኢ ዶሬቴዳ ኣልዖ።

⁵ሂንቴካ ቃሲ ዴዖ ሹቻዳን፥ ጌሻ ቄሳ ጊዲዴ፥ ዬሱሲ ኪሪስቶሳ ባጋና ፆሳ ናሼቺያ ኣያና ያርሹዋ ፆሳው ያርሻናው፥ ሂንቴ ሂንቴ ሁጴው ኣያና ኬꬃዳን ኬፄቲቴ።

⁶ኣዪሲ ጎፔ፥ ፆሳ ማፃፋይ፥ «ቤዒቴ፥ ታኒ ፂዮኔ ጊያ ካታማን ጎሊያ ጎዳ ፃጱዋ ሚኒሲያ፥ ዶሬቴዳ፥ ኣልዖ ሹቻ ዎꬃይ፤ ኣኒ ኣማኒያ ኦኒኔ ዬላቴና» ያጌ።

⁷ሄዋ ዲራው፥ ሃ ሹቻይ ሂንቴንቶ ኣማኒያዋንቶ ዳሮ ኣልዓ፤ ሺን ኣማኔናዋንቶ፥ «ጊምቢያዋንቱ ካꬌዳ ሹቻይ ጎዳ ፃጱዋ ሚኒሲያ፥ ኡባፔ ኣꬊያ ሹቻ ጊዴዳ» ያጌ።

⁸ቃሲካ፥ «ሃ ሹቻይ ኣሳ ꬉቢያ ሹቻኔ ኣሳ ኩንዲሲያ ዛላ» ያጌ፤ ኡንቱንቱ ፆሳ ቃላ ኣማኔና ዲራው፥ ኡንቱንቶ ካሴና ቆፌቴዳዋዳን ꬉቤቴዲኖ።

⁹ሺን ፆሳይ ꬉማፔ ማላሊሲያ ባሬ ፖዖ ሂንቴና ፄሴዳ፤ ሂንቴ ኣ ኦራꬃ ኦሱዋ ኦዳናው ዶሬቴዳ ዛሬ፤ ሂንቴ ካቲያ ቄሳቱዋ፤ ጌሻ ኣሳኔ ፆሳሲ ቡዞ ኣሳ።

¹⁰ሂንቴ ካሴ ፆሳ ኣሳ ጊዲኪታ፤ ሺን ሃዒ ሂንቴ ኣ ኣሳ፤ ሂንቴ ካሴ ማሮቴꬃ ኣኪቤይኪታ፤ ሺን ሃዒ ማሮቴꬃ ኣኬዲታ።

¹¹ታ ዳባቶ፥ ሂንቴ ሃ ሳዓን ኢማꬃኔ ቤቴ ጊዲዴ ዴዒያዋንታ ጊዴዳዋዳን፥ ኡባ ዎዴ ሂንቴ ሼምፑዋና ኦሌቲያ ኣሳቴꬃ ኣሙዋፔ ሂንቴ ሃካና ማላ፥ ታኒ ሂንቴና ዎሳይ።

¹²ኣሜኔና ኣሳይ ሂንቴና ኢታባ ኦꬂያዋንቱዳን ዚጊሪያ ዎዴ፥ ኪሪስቶሲ ዪያ ጋላሲ ሂንቴ ሎዖ ኦሱዋ ኡንቱንቱ ኣኬኪዴ፥ ፆሳ ጋላታና ማላ፥ ሂንቴ ዴዑዋ ኡንቱንቱ ጊዶን ሎይꬂ ናጊቴ።

¹³ጎዳ ዲራው፥ ኣሳ ሂጊያ ኡባው ሞዴቲቴ፤ ካቲካ ኡባፔ ቦላ ጊዲያ ዲራው፥ ኣው ሞዴቲቴ።

¹⁴ቃሲ ጋዲያ ሞዲያዋንቶካ ሞዴቲቴ። ኣዪሲ ጎፔ፥ ኡንቱንቱ ኢታባ ኦꬂያዋንታ ሙራናዉኔ ሎዖባ ኦꬂያዋንታ ጋላታናው ካቲያፔ ኪቴቴዲኖ።

¹⁵ኣዪሲ ጎፔ፥ ፆሳይ ሂንቴ ሂንቴ ሎዖ ኦሱዋን ካꬊያ ኤያ ኣሳቱዋ ሃሳያ ጮዑ ኡዳናዋ ኮዬ።

¹⁶ኣይሌቴꬃፔ ኬሲዴ፥ ፆሳ ኣዪሊያዳን ዴዒቴፔ ኣቲን፥ ሄ ኣዪሌቴꬃፔ ኬሴዳዋ ኢታቴꬃ ጌንꬂያዋ ኦꬆፒቴ።

¹⁷ኣሳ ኡባ ቦንቺቴ። ሂንቴ ኢሻቱዋ ሲቂቴ። ፆሳው ያዪቴ። ካቲያ ቦንቺቴ።

¹⁸ኣይላቶ፥ ሂንቴ ሎዖ ጎዳቱዋ ፃላላዉኔ ኣሺኬ ጎዳቱዋ ፃላላው ጊዴናን፥ ኢታቶካ ዳሮ ያዪዴ ሞዴቲቴ።

¹⁹ኣዪሲ ጎፔ፥ ኣሳይ ናቂያ ዎዴ ዋዬቲያ ኡራይ ፆሳ ቆፒዴ፥ ኦጌ ባይናን ናቄቶፔ ፆሳይ ኣ ኣንጃና።

²⁰ኣዪሲ ጎፔ፥ ሂንቴ ናጋራ ኦꬂና፥ ሂንቴና ዴቺያ ዎዴ፥ ሂንቴ ዳንዳዮፔ፥ ሂንቴንቶ ኣይ ጋላታይ ዴዒ? ሺን ሎዖባ ኦꬂዴ ዋዪያ ሂንቴ ዳንዳዮፔ፥ ፆሳይ ሂንቴና ሄዎ ኣንጃና።

²¹ፆሳይ ሂንቴና ፄሴዳዌ ሄዋ ዲራሳ፤ ኣዪሲ ጎፔ፥ ኪሪስቶሲ ሂንቴንቶ ዋዬቴ፤ ሂንቴ ኣ ቃታማ ካላና ማላ፥ ሂንቴንቶ ሌሚሱዋ ጊዴዳ።

²²ናጋራ ኢ ኦꬂቤና፤ ባሬ ዶናፔ ዎርዱዋ ሃሳዪቤና።

²³ኣሳይ ባሬና ቦሪያ ዎዴ፥ ዛሪዴ ቦሪቤና፤ ዋዬቲያ ዎዴካ ማንዲቤና። ሺን ፂሉዋ ፒርዲያ ፆሳው ባሬና ኣꬂዴ ኢሜዳ።

²⁴ኑኒ ናጋራው ሃዪቂዴ፥ ፂሎቴꬃው ዴዓና ማላ፥ ኪሪስቶሲ ባሬ ሁጴው ባሬ ኣሹዋን ኑ ናጋራ ማስቃሊያን ቶኬዳ፤ ሂንቴ ኣ ማይꬃን ፓፄዲታ።

²⁵ኣዪሲ ጎፔ፥ ሂንቴ ኦጊ ባሌዳ ዶርሳ ማላ፤ ሺን ሃዒ ሂንቴ ሼምፑዋ ሄሚያዋኮኔ ናጊያዋኮ ሲሜዲታ።