1Vašoda odčhiven tumendar savori choľi, savore pľetki, dojekh klamišagos the zavisť a ma aven dujemujengere.
2Sar o čhavore, save mekča akana uľile (pes narodzinde), mangen tumenge o žužo duchovno thud, hoj lestar te baron a te aven zachraňimen,
3te imar koštoľinďan oda, hoj o Raj hino lačho.
4Aven ke leste, ko džido Bar, saves o manuša odčhide, ale hin avrikidlo the igen vzacno anglo Del.
5The tumen, sar o džide bara, den pes te ačhavel andro duchovno kher, hoj te aven o sentno rašajipen a te anen o duchovne obeti, so hin pre dzeka le Devleske prekal o Ježiš Kristus.
6Vašoda hin pisimen andro Lav le Devleskero: “Thovav pro Sion o hlavno bar, o avrikidlo the igen vzacno bar; oda, ko andre leste pačal, na ladžala pes.”
7Oda bar hino vzacno tumenge, save pačan, ale olenge, save na pačan: “O bar, so odčhide o murara, ačhiľa pre stavba hlavno,
8o bar, pre savo pes demen, the e skala, pre savi peren.” Ola, save na šunen oda lav, peren pre oda bar, bo o Del oda avke kamelas.
9Ale tumen san o avrikidle manuša, o kraľišagos le rašajengero a o sentno narodos, hoj te vakeren avri ola bare veci, so kerel o Del – ov, ko tumen vičinďa avri andral o kaľipen andre peskero igen šukar svetlos.
10Varekana na sanas narodos, no akana san o manuša le Devleskere; varekana na prindžarenas o lačhipen le Devleskero, ale akana les chudľan.
11Phralale mire, phenav tumenge sar olenge, so nane khere kade pre phuv a save ča pal kadi phuv predžan: Zľikeren tumen le ťelesne žadoscendar, so pes maren la dušaha!
12Dživen mištes tumaro dživipen maškar ola, save na pačan – choc te pre tumende namištes vakeren sar pro živaňa – hoj te dikhen tumare lačhe skutki a te lašaren le Devles andre oda Džives, sar avela.
13O Raj kamel, hoj tumen te podden savorenge, save hine ačhade le manušendar: Či le kraľiske sar le nekbaredereske,
14abo le vladarenge. Bo ov len bičhavel te marel olen, so namištes keren, a te lašarel olen, so keren mištes.
15Bo kada hin oda, so o Del kamel: Te keren o lačhipen a oleha te phanden o muja le nagoďaver manušenge, save na džanen, so vakeren.
16Dživen sar o slobodne, ale ma zagaruven tumaro nalačhipen la slobodaha; dživen sar o sluhi le Devleskere.
17Savoren den pačiv: Le phralen kamen, le Devlestar daran the le kraľis den pačiv.
18A tumen, o sluhi, podden tumen tumare rajenge a šunen len andre savoreste. Ale ma podden tumen ča le lačhenge the le jileskerenge, ale the le nalačhenge.
19Bo o Del žehňinela oles, ko zľidžal o pharipen vaš oda, hoj kerel pal leskeri voľa a cerpinel, choc ňič nalačho na kerďa.
20Bo so hin olestar, hoj ľikeren avri, sar tumen dukhaven, te tumen keren o bini? Ale te mištes keren a the avke cerpinen bi e vina a ľikeren avri, kada hin le Devleske pre dzeka.
21Se pre oda sanas le Devlestar vičinde, bo the o Ježiš cerpinelas vaš tumenge a sikaďa tumenge sar te dživel, hoj te keren avke sar ov.
22Ov šoha (ňikda) na kerďa binos, aňi o klamišagos šoha na sas andre leskero muj.
23Sar les košenas, na košelas pale, a sar cerpinelas, na daravelas avri, ale mukelas pes pre oda, ko čačipnaha sudzinel.
24Ov korkoro ľigenďa amare bini peskere ťeloha pro kerestos, hoj te meras le binenge a te dživas le čačipnaske. Prekal leskere rani san avrisasťarde.
25Bo sanas sar o bakrore, save na džanenas, kaj džan, ale akana san visarde ko Pasťjeris the ke Oda, savo pes starinel pal tumare duši.
