1Ŋoŋe sindaŋ â burec wiac â eeatuc â iiŋguuŋ â gupe micko âkec i hetara‐fârenʒepieŋ.
2Hetararâ naru motec ɋiene susure ejareekac iŋuc jaha ŋoŋe maŋ qâqâtâc‐ŋeŋicte susu biaŋ irec eŋarezejec. I nâhuc mitio soka pupuŋ enʒepieŋ.
3Wofuŋ jauŋ‐ticne moc mana aŋac embiŋko iŋuc enʒepieŋ.
4Ŋoŋe Wofuŋ, qânâ jujune hâcne, ŋiczi hone suŋgiŋkehapie Anutuzi maname fekicne eme bâwosâewec, erao âtesiŋkeniŋ.
5Ehuc qânâ jujunea efârerâ ʒuhuckeme ʒuhuc doma doma fehuc Mârore ufuŋ enʒepieŋ. Erâ wâc tiri taha bapa guru erâ maŋzi Anutu taha bâzi ecnenʒepieŋ. I Jesu Kristore erâ maname biaŋkeocmu.
6Miti papiao dâŋ ʒiŋuc hâcne fokac: “Manakic, no Zioŋko qânâ moc hekopac, qânâ wâtuŋ bâwosâekicne furi sâko. Ŋic moczi erao roweckeocmu e mi qurutuaocmu.”
7Irec erao roweckeeŋgopieŋ ŋoŋerao wiac furi sâko ekac. Â mamanasiŋ tâmiric jaŋere ʒiŋuc mukicne: “Ficbapa jaŋe qânâ surehuc behembiŋ, izi hâcne qânâ wâtuŋ ewec domakac.”
8Erâ wâc “Qânâ ira kike‐jeŋic hepirickeniŋmu â buse ira heariweniŋmu.” Ŋic miti qikiŋnehuc ira heariweniŋte mukicnere iŋuc hâcne eeŋgopieŋ.
9Ŋoŋe ine bâwosâecfâc‐ticne â taha bapa ŋicbomboŋfâc‐ticne â tiri ŋicgurufâc‐ticne â fuŋfuŋ gurufâc‐ticne. Iŋucne ŋoŋe dapâckonec bawefuc‐ŋoparâ tatamac jaŋgeŋ‐ticnao râec‐ŋopawec ere mâsi sâkore biŋedâŋ muropiepie haŋ bazejec.
10Ŋoŋe mârâc jaha ruc hurâ jumbiŋ, ʒi ine Anuture ŋicfâc embiŋ juŋgopieŋ; mârâc jaha qarâ suŋgiŋne jumbiŋ, ʒi ine uruc jauŋko juŋgopieŋ.
11Âgo biaŋfâc‐nane, no ŋazape mananiŋ, ŋoŋe mâreŋko jaba â ŋicmanac jueŋgopieŋzi sasec, maŋ qâqâtâc‐ŋeŋicte râsi hâcne, i getâckenʒepieŋ.
12Ehuc qâpuc jaŋere ŋondeŋko juju tiŋne junʒepieŋ. Iŋuc jupie qâpuc jaŋe fuŋne‐ŋeŋic hone mana tarac erâ, sâqocne bapa muŋareeŋgopieŋ, i beherâ juku Anuture iiqic dameŋko eehâmo gie‐ŋeŋicte erâ Anutu muteŋkenkenʒepieŋ.
13Ŋiczi sâcmutâc fuŋne râekicne i ŋoŋe Wofuŋte erâ reŋke‐fârenʒepieŋ. Ŋicwofuŋ, femicne juekac, ere mecne,
14â kia gawaman râec‐jopawec jaŋere mumupaŋ mecne, mâmâc reŋkenʒepieŋ; jaŋe hâcne sâqocne bapa okacne jareniŋte, â sâcne jueŋgopieŋ jaŋe mumbiaŋ‐jopaniŋte mujarekicne.
15Ŋoŋe eehâmo gie bahuc ŋic mutucne, mumusifuc bâfuaeŋgopieŋ jaŋere dâŋ bâniniŋkeniŋte Anutuzi muŋareekac hâcne.
16Ŋoŋe goroŋ‐ŋopakicnere rambaŋ juŋgopieŋ, erâ juju izi sâqocnere tapa mi ezejec, rambaŋ juhuc Anuture kiŋaŋ qanʒepieŋ.
17Ŋoŋe ŋic ʒeŋgoma sâsec‐jopanʒepieŋ, âgofâc‐ŋeŋic maŋjauŋ ejarenʒepieŋ, Anutu araŋ bacnenʒepieŋ, ŋicwofuŋ sâsenʒepieŋ.
18Kiŋaŋ qaqa ŋoŋe bomboŋfâc‐ŋeŋic araŋ bajarehuc micjeŋic reŋkenʒepieŋ, i bomboŋ urucne â mâteŋne jaŋe sawa mâcne, ʒâʒâicne jaŋe mâmâc iŋuc ejarenʒepieŋ.
19Jaŋe maŋgâŋ bahac tâmiricko bâʒâic‐ŋopapie Anuture manasuhuc rârâŋgeŋ tâmiric jupie maname biaŋkeocmu.
20Â bahac bâfuarâ ʒika kihuc rârâŋgeŋ tâmiric jupie mozi maname biaŋkeocmu? Tiŋne juhuc ʒika kirâ rârâŋgeŋ tâmiric jupie ine Anutuzi maname biaŋkeocmu.
21Ŋoŋe iŋuc eniŋte hâcne muŋarekicne. Kristo e iŋuc jaha ŋoŋere erâ ʒâic manahuc bânie‐ŋarewec, eme ŋoŋe kike hata‐ticne honehuc ijaha âte ranʒepieŋ.
22E bahac mi bâfuawec, â sioc micticnaonec mi fuawec.
23E musâqorepie okacne mi musâqorec‐jopawec, bâʒâickepie okacnere dâŋ mi jazawec. E dâŋ mumutara gie fârine baekac ere biŋe qawec.
24Nâŋâcne sâqocnezi ere sahacko feme maripoŋko bafewec, i sâqocne hâmocnehuc tiŋkerâ junaŋte ewec. Ere wiczi ŋoŋere wic bâsomiewec hâcne.
25Ŋoŋe lama iŋucne qâsoc bâsoriehuc jumbiŋ. Ʒi ine maŋ qâqâtâc‐ŋeŋicte rusoŋaŋzi hefârec‐ŋopame erao fisimbiŋ.
