1E uwariꞌche yaꞌa kan alaq ronoje ri na utz taj: ri sokosoꞌnik, ri xa kebꞌ palaj alaq chiwach alaq, ri kuꞌan kꞌax kꞌuꞌx alaq chikij jujun chik y ri kanukꞌ alaq chꞌaꞌtem chikij jujun chik.
2Jelaꞌ pachaꞌ juna neꞌ kꞌakꞌ alaxinaq lik e karaj rutzꞌum ruchu; jekꞌuriꞌlaꞌ ralaq, e lik rayij alaq ri saqil Uchꞌaꞌtem ri Dios, chaꞌ ruma waꞌ, ri Dios kuya ri kꞌiyibꞌal alaq y kukolobꞌej kꞌu alaq chwach ronoje ri na utz taj.
3E ꞌana kꞌu alaq waꞌ ma naꞌom chi alaq ri rutzil ukꞌuꞌx ri Qanimajawal pa animaꞌ alaq.
4Qibꞌ kꞌu alaq riꞌ rukꞌ ri Qanimajawal Jesucristo. Rire e pachaꞌ jun abꞌaj kꞌaqital kan kuma ri winaq, ma chikiwach rike na jinta uchak; noꞌj chwach ri Dios e jun chomilaj abꞌaj kꞌaslik y chaꞌtalik, pa katikiꞌ wi lo ri ja kayakik. Yey juna abꞌaj na jinta ukꞌaslemal, noꞌj Rire kꞌaslik.
5Jekꞌuriꞌlaꞌ ralaq alaq pachaꞌ abꞌaj kꞌaslik tzꞌaqom bꞌi che ri ja katajin ri Dios che uyakik re kajeqiꞌ chupa. Rojertan raj chakunel xeniman pa Rocho Dios, ekꞌu woꞌora ri Dios uyaꞌom che ralaq kaniman alaq chwach Rire y ruma kꞌu ri Qanimajawal Jesucristo kaꞌan alaq ri kukꞌul ukꞌuꞌx Rire.
6E uwariꞌche jewaꞌ tzꞌibꞌital kan pa Ruchꞌaꞌtem ri Dios: Kankoj kꞌu chilaꞌ Sion ri jun chomilaj abꞌaj chaꞌtalik, chaꞌ puwi waꞌ katikiꞌ ri ja kanyako. China kꞌu ri kakubꞌiꞌ ukꞌuꞌx rukꞌ, riꞌ na kakꞌixbꞌesax taj ma kukꞌul na ri royeꞌem che Rire kachaꞌ.
7Che ralaq ri kojom alaq rubꞌiꞌ, Rire lik kꞌo uwach; noꞌj chike ri na kekojow ta re, e kuꞌana pachaꞌ ri tzꞌibꞌital kan pa Ruchꞌaꞌtem ri Dios: E rabꞌaj kꞌaqital kan kuma raj yakal ja, e abꞌaj riꞌ waꞌ xajawaxik chaꞌ katikiꞌ lo ri ja.
8Yey kubꞌiꞌij: Rire e ri jun abꞌaj kojotal chikiwach ri tikawex, yey lik e kꞌo ri kakichiq kibꞌ che, y lik ekꞌo ri ketzaq puwiꞌ kachaꞌ. Jekꞌulaꞌ xkikꞌulumaj rike, ma e pachaꞌ “kakichiq kibꞌ” chwi Ruchꞌaꞌtem ri Dios echiriꞌ na kakikoj taj.
9Noꞌj ekꞌu ralaq alaq chaꞌtal lo ruma ri Dios, alaq aj chakunel chwach ri Nimalaj Taqanel Dios, alaq jun tinamit yaꞌom ibꞌ alaq che uloqꞌnimaxik ri Dios y loqꞌotal alaq ruma ri Dios re kuꞌana alaq utinamit chaꞌ katzijoj alaq chike ri tikawex janipa taq ri uꞌanom ri Dios, ri xresaj lo alaq chupa ri qꞌequꞌm y xuya alaq chupa ri chomilaj Qꞌijsaq.
10Ralaq ojertan na alaq ta utinamit ri Dios, noꞌj woꞌora alaq chi utinamit Rire. Ma ojertan na xetaꞌmaj ta alaq puwi ri relej ukꞌuꞌx ri Dios; noꞌj woꞌora ri Dios ukꞌutum chi waꞌ che ralaq.
11Hermanos ri lik kꞌax kannaꞌ alaq, kꞌuna chikꞌuꞌx alaq, ralaq na alaq ta re ruwachulew, ma alaq xa ikꞌowel. E uwariꞌche kampixabꞌaj alaq, maya ibꞌ alaq che taq ri rayibꞌal re ri tiꞌjil alaq ma waꞌ kachꞌoꞌjin pa animaꞌ alaq chaꞌ kuyoj ri kꞌaslemal alaq.
12Ri ꞌana alaq e kꞌutu alaq jun bꞌinik silabꞌik lik jusukꞌ chikiwach ri winaq na ketaꞌam ta uwach ri Dios. Jekꞌulaꞌ echiriꞌ kakꞌun tanchi ri Qanimajawal, rike kakiyak uqꞌij ri Dios ruma kilom ri chomilaj chak ꞌanom alaq, tobꞌ woꞌora kechꞌaꞌt chiꞌij alaq.
13Ruma kꞌu ri Qanimajawal, lik kojo alaq kitzij konoje ri yaꞌtal pakiqꞌabꞌ ketaqan che ruwachulew, e pachaꞌ ri nimalaj taqanel kꞌo pakiwi ukꞌiyal tinamit
14y taq ri e aj wach ekojotal ruma ri nimalaj taqanel re kekiya pa kꞌax ri kakiꞌan ri na utz taj y re kakiyak kiqꞌij ri kakiꞌan ri utz.
15Ma ri lik karaj ri Dios che alaq e kaꞌan alaq ri utz chaꞌ e kaqꞌatej alaq taq ri chꞌaꞌtibꞌenik kaꞌan chiꞌij alaq kuma ri tikawex na jinta kinaꞌoj.
16Paqꞌabꞌ alaq kꞌo wi saꞌ ri kaꞌan alaq; yey waꞌ na e ta re kaꞌan alaq ri na utz taj, ma e re kuꞌana alaq aj chakibꞌ re ri Dios y jekꞌulaꞌ e kaꞌan alaq ri karaj Rire.
17ꞌAna alaq chike konoje ri tikawex janipa ri taqal chike; makꞌaq bꞌi alaq uqꞌij junoq. Kꞌax chenaꞌa alaq ri hermanos. Kꞌola xiꞌin ibꞌ pa animaꞌ alaq chwach ri Dios. Loqꞌnimaj alaq ri rey.
18Ralaq alaq aj chakibꞌ, kojo alaq kitzij ri patrón alaq y yaꞌa ibꞌ alaq chitaqik kuma rike. Waꞌ na xew ta kaꞌan alaq kukꞌ ri lik utz kikꞌuꞌx ma jenelaꞌ ꞌana alaq kukꞌ ri lik na jinta kakuyuw ke.
19Ma e lik utz riꞌ we junoq ruma kunaꞌ chukꞌuꞌx e kuꞌan ri karaj ri Dios che, kuya ranimaꞌ kuchꞌij taq ri kꞌaxkꞌobꞌik kape puwiꞌ tobꞌ waꞌ na taqal ta che. ¡Yey ri Dios kuyak uqꞌij ri kaꞌanaw waꞌ!
20Noꞌj we e laꞌ lik chirij mak alaq xchꞌay kan alaq yey lik xkuy alaq waꞌ, ¿saꞌ kꞌu riꞌ ri yakbꞌal qꞌij alaq? ¡Na jintaj! Noꞌj we kakuy kꞌu alaq ri kꞌax kaꞌan che alaq ruma ri utz katajin alaq che uꞌanik, riꞌ lik kꞌo yakbꞌal qꞌij alaq chwach ri Dios.
21E ne ruma waꞌ xusikꞌij alaq ri Dios, ma ri Cristo xutij kꞌax quma riꞌoj; yey taq ri xuꞌano e kꞌutubꞌal chiqe riꞌoj chaꞌ kojbꞌin jelaꞌ pachaꞌ xbꞌin Rire.
22Ma jewaꞌ tzꞌibꞌital kan puwi ri Cristo pa Ruchꞌaꞌtem ri Dios: Rire na xmakun taj, y na jinta ne kꞌana sokosoꞌnik xel puchiꞌ kachaꞌ.
23Echiriꞌ ri winaq lik xkikꞌaq bꞌi uqꞌij rukꞌ itzelilaj chꞌaꞌtem, Rire na xukꞌul ta uwach rukꞌ itzelilaj chꞌaꞌtem. Yey echiriꞌ kiyaꞌom pa kꞌaxkꞌolil, Rire na xubꞌiꞌij taj kuꞌan ukꞌaxel chike ri kakiꞌan kꞌax che; ri xuꞌano, e xuya ronoje puqꞌabꞌ ri Dios, ri kuꞌan qꞌatbꞌal tzij chi jusukꞌ.
24Ekꞌu ri Cristo xukꞌam bꞌi ri qamak che rucuerpo echiriꞌ xkam chwa ri cruz. Xuꞌan kꞌu waꞌ chaꞌ jelaꞌ kaqaya kan ri mak y e kaqaya qibꞌ che ri jusukꞌ bꞌinik silabꞌik. Ma jewaꞌ tzꞌibꞌital kan pa Ruchꞌaꞌtem ri Dios: Ruma kꞌu ri kꞌax xutij Rire, xixkunutaj riꞌix kachaꞌ.
25Rojertan, alaq pachaꞌ bꞌexex e sachinaq; noꞌj woꞌora xtzelej lo alaq rukꞌ ri Cristo, ri Aj Kꞌamal Qawach y ri Chajinel re ri qakꞌaslemal chwach ri Dios.
