1A kum tistising, a nemi sur mot in nuk pas a kum tumtubun dat, ra det wan tagitong o Ijip. Det rop det wan utuntudu ina du bakut, ma det rop det wan kutus a Merek na Tasi.
2I elar nami ra di baptaiso det una du bakut ma a tasi, ma i upuaso i lena det a taro anun o Moses.
3Det rop det wangon tagun ara utna na Nion kut,
4ma det inum tagun ara danim na Nion kut, uni det inum tagun a wat na Nion, ra i wan tomo nam det. Ma a wat na Nion ra, i o Karisito.
5Ikut a susut doko tagun det, o God ke gas nam det. Ra det mat nanan ma a kum minatin det, det inep ororos kut una nubual kalako taro uni.
6Ma a kum utna ri i wanpat sur in utumarong dat, sur gong a balandat i nemnem sur a kum sakino, elar nama balandet i nemnem suri.
7Gong mot lotu torom a kum torotoro na god elar nama ramano taro tagun det. Elar nami ra di sa tumus tari una Buk Tabu lenri, “A taro det kis sur det in nangon ma det in inum, ma det tur melet sur det in wap oros mukut nama pinindet.”
8Gong dat pam a kum petutna na pamuk, elar nama ramano taro tagun det, det pami. Ra, un ara bung kut, aru noino ma tulu arip na taro tagun det, det mat.
9Gong dat lar a Labino, elar nam ara taro tagun det, det pami, ma a kum sui det karot doko det.
10Gong mot ururai, elar nam ara taro tagun det, det ururai, ma a ensel ra i ser um doko a taro i um doko rop ru det.
11A kum utna ra, i wanpat un det, sur in utumarong dat. Ma di sa tumus tari sur a etowo torom dat, ra dat laun una kum ururop na bung ri.
12Ra taio i nuki lena i tur dekdek, in tumarong, sako in puku taru una sakino petutna.
13A kum ululam ra mot sa etorom tari, awu sur mot kut mot etoromi, awu, a susut na taro kai det etoromi. Ra o God ken madek ru mot sur tu ululam in nanpat torom mot, ra in labo taun a dekdeki mot. Ra tu ululam in nanpat, o God ut in waninar pas tu kisapi, sur mot in nan gisen gusuni ma mot in winim pasi. Ma asau ra o God i watungi in pam soti.
14I mo ra a kum wakak na paspasang, gong mot lotu torom a kum torotoro na god, mot in kalabor gusuni.
15A wasiso torom mot elar nami ra a wasiso torom a taro ra det sa mananos. Ma mot ut mot in warkurai wakak anung a wasiso ri.
16Ra dat inum tagun a kap ra di sa watung wakak pas uni torom o God, dat takai mukut nam o Karisito, una gapino. Ma ra dat wangon tagun a beret ra dat tibiki, dat takai mukut nam o Karisito, una pinino.
17Teken beret kut. Dat susut, ikut, dat ara pinindat uni dat wangon tagun in teken beret kut.
18Dat in tama a taro Israel. Ra det wan a wewegua ra di sa etabor taru nami torom o God una kabulu na tuntun etabor, i dat tomo det nam o God.
19Asau a kukurai ina nung a wasiso? A utna ra di etabor taru nami torom a torotoro na god, katu utna i gas uni, ma a torotoro na god ra di etabor toromi, i kai katu utna i gas uni.
20A watungi tamot lena a kum utna ra a taro ra ka det nurnur det etabor nami, det etabor nami torom a kum laulau na nion, ma awu sur torom o God. Ma ka nemi sur mot in lason tomo nama kum laulau na nion.
21Ka mot in pet lar pasi sur mot in inum tagun a kap anun a Labino, ma tagun a kap kai anun a kum laulau na nion. Ma ka mot in pet lar pasi sur mot in nangon tagun a kabulu na inangon anun a Labino, ma tagun a kabulu na inangon kai anun a kum laulau na nion.
22Pepetlai, dat nemi sur dat in ungangos a Labino, sur a nuknukino in laulau torom dat? Pepetlai, a dekdekin dat i labo taun a dekdekino?
23Sako taio in watungi lena, “A kum utna rop i wakak kut sur dat in pami,” ikut, awu sur a kum utna rop in warut dat. “A kum utna rop i wakak kut sur dat in pami,” ikut, awu sur a kum utna rop in udekdek dat.
24Gong taio i uwakak pasi ut, in uwakak pas a taro gisen.
25A kum wewegua ra di siuru i una rumu na siuru, mot in nani. Ma gong mot iting lena, di sa etabor taru nami torom a torotoro na god o awu, sur gong a nuknuki mot in takun mot lena mot pam a sakino.
26Uni a Buk Tabu i watungi lenri, “A rakrakon bual ma a kum utna rop ra det kis uni, anun a Labino.”
27Ra taio tagun det ra ka det nurnur i saring mot, sur mot in nangon tomo nami, ma mot nemi ut, mot in nan kut. Ma a kum utna rop ra di tabor mot nami, mot in nani kut, ma gong mot iting uni, sur gong a nuknuki mot in takun mot.
28Ikut, ra taio in watungi tamot lena, “A utna ri di sa etabor taru nami torom a kum torotoro na god,” gong mot wani, sur gong mot ban laulau a nuknukin o naro ra i inanos mot nami.
29Awu sur a wasiso una nuknuki mot, awu. A wasiso un o naro ra i inanos mot ma i nuki lena mot pam a sakino. A sa langolango. Sur asau ra a nuknukin taio in warkurai iau?
30Ra a watung wakak pas torom o God una nga utna na inangon, sur asau ra taio in takun iau una utna ra a wani ra a sa watung wakak pas uni?
31Lenra, ra mot wangon, o mot inum, o tu ngas na utna kai mot pami, mot in pami sur mot in ulabo pas o God nami.
32Gong mot pam tu utna ra in upuku taio tagun a taro Juda, o tagun a taro ra awu sur a taro Juda, o tagun a taro na lotu anun o God.
33A nemi sur an ugasgas a taro rop una kum utna rop ra a ser pami. Ka pam tu utna sur in uwakak iau, awu, a pam a kum utna sur in uwakak lako susut na taro, sur o God in ulaun pas det.
