1Na'ankure nafuheta, Nagrama nentahuana, antahi ama hnazegu nehue, korapara tagehe'za hampomofo agorga'a nevu'za, hagerina takahe'naze.
2E'i ana zamo'a mika vahe'mo'za mono ti freankna hampompine hagerimpina nehu'za, Mosese avariri'nazana,
3ana mika'mo'za ana hukna avamupi ne'za nene'za,
4ana mika'mo'za anahukna hu'za avamupi ti ne'naze. Na'ankure zamagrama tima ne'nazana, zamagranema ne-ea avamupi havereti ne'nazankino, ana havea Kraisi'e. (Eks-Uti 17:6, Nam-Ham 20:11)
5Hu'neanagi rama'amo'za Anumzamo'a muse osiaza hute'za, ka'ma mopafina ufri efri hu'naze.
6E'inahu zama zamagripima fore'ma hu'neazamo'a, tagritera avame'za me'neno huraverina, e'inahu kefo avu'ava'zana kerasane osugahune.
7Tamagra mago'a vahe'mo'za hu'nazaza hutma havige anumzante monora huonteho. Amanage huno Anumzamofo avontafepina krente'ne, havige anumzante mono hunente'za, ne'zane tine nene'za, oti'za monko avu'avaza hu'naze. (Eks-Uti 32:6)
8Mago'amo'za monko avu'avaza nehu'za, ana zagefinke 23 tauseni'a vahe fri'nazankna hu'zanku, tagra monko avu'ava'zana osanune.
9Ramofoma rehe'nazankna huta tagra reheta onkesune, mago'amo'za anahu kna hzageno, ha osifave'mo zmahe fri'ne.
10Ke hakare hu'nazankna osnune, mago'amo'zama anahu kna hzageno, vahe'ma zmahefri ankeromo zamahe fri'ne.
11Ama ana zantmima zmagrite fore'ma hu'neazamo'a, tagri rempi huramiza me'neno tazeri fatgo hanigu krente'ne. Ama vgare knafima ehnatisia zanku hu'ne.
12Kagrama oti hanaveti'noe hunka nentahisunka, traka hu'zanku kva huo!
13Antahio! revatga zama ne-eana kagritekera nome, hakare'a vahete neankna huno ne-e. Anumzamo'a Agra knare hu'neankino atresigeno, ana revatgazamo'a hanavetino kazeri otregahie. Revatgaza ne-enkeno'a katresigenka evuoramigahananki, kana kaverina oti hanavetinka manigahane.
14E'ina hu'negu knare rone'nimota havige anumzantetira manigneta maniho.
15Nagra kema nehuana knare antahi'zane vahe'motma neramasamue. Tamagra refko hutma nagra nehua kea antahigahaze.
16Tagrama kapufinti tima nenakura, Anumzamofo susu hunteteta nenone. E'i ana kapufinti tima erifko'ma nehunana, Kraisi korana omne'nefi? Tagra bretima korita, erifko huta nenonana, e'i Kraisi avufga omne'nefi?
17Hianagi magoke breti me'negu, ana maka'mota hakare mani'none nehunanagi, magoke tavufga me'ne. Na'ankure mago bretireti refko huta nenone.
18Israeli vahe'mo'za hu'naza zanku tamagesa antahiho, kresramna vu itaretira refko hu'za ne'zana nonazafi? I'o nenaze.
19Hagi nagra na'anku nehue? Havige anumzantaminte kresramna vunentaza zana amnezane, havi anumzana amnezane hu'na nehue.
20I'o hue! Fegi'a vahe'mo'za anankavera Anumzamofontera kre sramna vunontazanki, havi avamutaminte kresramna vunentaze. Nagri'ma nave'nesiana havi avamutaminte tragoteta omnihogu nehue.
21Tamagra havi hankromofo kapufinti tagitma nenetma, ete Ramofo kapufinti enena tagitma onegahaze. Havi hankromofo tafepinti nenetma, ete Ramofo tafepintira onegahaze.
22Tagra Ramofo azeri asivazinaku nehumpi? E'ina'ma hanunana tagri hanavemo'a, Ramofo hankavea agetere'ne nehumpi? I'o.
23Tagra mika'zana amne hugahunanagi, ana mika'zamo'a taza osugahie. Tagra mika'zana amne hugahaze huta hugahunanagi, ana mika'zamo'a, tazeri hanave otigahie.
24Tagri'ma tazeri knare huzankukera ontahisunanki, tva'ontire'ma nemnizamokizmi zmazeri knare'ma hanunazanku antahisune.
25Amne ana miko ame'ama zgore'ma atresazana mizaseta negahazanagi, ana ame'a agura igati eri'naze hutma zmantahiogeho. Ru tmagu tamagesa eri haviza hugahie.
26Na'ankure mopane anamiko zama agu'afima me'neazana, Ramofozanke me'ne. (Sam-Zga 24:1)
27Mago amentinti osu vahe'mo'ma kagi hanigenka vanunka, afu ame'ama kamisiazana nenenka antahige' antahagera osuo, ru antahintahi ka'a eri savri hugahane.
28Hianagi mago'mo kasamino, havi anumzante kresramna vunte'nea afu ame'e hanigenka onegahane. Na'ankure ana kamisimofo knare'zanku hunka onegeno, anama kamisimo'a kefozane huno antahigahie.
29Kagrika'a antahintahizankura nosuanagi, rumofo antahintahizanku nehue. Inankna hu'za nagra navesite'ma huazana refko antahintahifina nehaze?
30Hanki nagra Anumzamofo susu huntete'na ne'zama noazankura, na'anku haviza nehie hutma nehaze?
31Hanki, kave nesano tinesano inankna'zama hanunka, Anumzamofo agi erisaga hu'zanke huo.
32Mago'mofone hunka Jiu vahepino, Griki vahepino, Anumzamofo vahepinena, zmazeri tanafa hu havegnara osiho.
33Nagranena anahukna hu'na maka'zama huazampina, maka vahe'mo'zama muse hanazaza nehu'na, nagra knare'zankura nosuanagi, hakare vahe'mokizmi knare'zanku nehanugeno, rama'amokizmia Anumzamo zamagu'vazigahie.
