1Ibeg ko, eneng-enengen niyo tepad te menge kemonaan tadon gebii, sìyan timaking ki Moises doton te kebigtilan. Nesempengan se kedita dan te labon impedoma te Timanem diyà kandan, aw yan se tinekingan dan. Minokit se kedita dan diyà te dalan ininang te Timanem kandan kidoen te tengà-tengà te dagat iningedanan Dagat Melalag.
2Pineokit te pegtaking dan te labon aw peg-okit dan timalà te dagat, iling te binonyagan se kedita dan kidoen, so nelobos se pedowan dan timaking ki Moises.
3Kimaen se kedita dan te pan imbegay te Timanem kandan.
4Mininem se kedita dan te wayeg imbegay te Timanem kandan, so impetebol iyan i Cristo lekat te bato, aw sikandin se nenabang kandan pengkey kenan dan pesalo.
5Meneng pengkey mèpiya se tabang te Timanem kandan, pilabok olò se timaking te ibeg te Timanem. Yan neopal se Timanem kandan, aw impelumun dan. Medita se nematay doton te kebigtilan inokitan dan.
6Na, se kedita te neinang te kemonaan tadon, yan se gegonan tadon amon eked kidon taking te medaet ibeg te pedowan tadon iling kandan.
7Yan ikà niyo egsimba te kenà benal timanem, iling te ininang te medita doma dan. Doen kagi te Timanem insolat te kelikit te pegsimba dan te kenà benal timanem, gayed dan kimaen aw mininem, aw penga niyan simayaw dan.
8Eked kepakay aw lomayok kidon te kenà kenitadon esawa, iling te ininang te medita doma dan, so yan se doun te impelumun dan te Timanem, aw kelowan teg telo melalan se otaw negelà te sebad olò se aldaw.
9Eked heman kepakay aw tendaen tadon se Pengolo pineokit te peg-inang tadon te kenà ibeg din, so doen menge kemonaan tadon migtandà te Pengolo, aw yan impetongkà din dan te memokan aw nematay dan.
10Eked heman kepakay aw megbelisì kidon te medaet tepad te Timanem, so doen kemonaan tadon migbelisì, aw yan se inimetayan te anghil insogò lekat te langit.
11Neinang se kedita niyan te kemonaan tadon amon ketegahan tadon te metoman kidon ipelumun aw meg-inang kidon te medaet. Nesolat iyan amon eked kidon peg-iling kandan, so agpet den se temanan te keneyonan.
12Yan aw doen otaw eg-aneng-aneng te mèpiya se eg-inangen din, yan se otaw keilangan megpekeahà amon eked sikandin keboyo i Satanas megpekesalà.
13Se tandà neokitan niyo, onawa iyan te tandà egkeokitan te menge doma otaw. Meneng egkeseligan se Timanem, so eked kaw din peokiti te tandà i Satanas eked niyo kebatog. Aw tendaen kaw, doen dalan inangen te Timanem amon mekelowà kaw, aw begayan kaw din heman te eneg amon meketayod kaw kenyan.
14Na, menge kedowa ko egkedekelan ko te pedowan, ikà niyo eg-inabut diyà te pegsimba te kenà benal timanem.
15Doen inenengen niyo, aw yan mikagi a kenyo te eneng-enengi niyo aw benal se intoladà ko.
16Seini se mèpiya inangen tadon aw metipon kidon, amon eneng-enengen tadon se pegkematay i Cristo kenitadon. Aw minem kidon te tabò, onà kidon megtawal-tawal diyà te Timanem aw megpesiontong kidon diyà kandin kenyan. Aw minem kidon diyà te tabò sìyan, yan ipetaga-taga tadon te migsebad kidon den ki Cristo pineokit te dipanog din te pegkematay din doton te kros. Aw komaen kidon te pan binelà-belà, yan ipetaga-taga tadon heman te migsebad kidon den ki Cristo pineokit te lawa din nematay doton te kros.
17So doen olò sebad pan, yan ketegahan tadon te pengkey medita kidon egpemenal, meneng sebad se neekopan tadon, so sebad olò se pan iteped diyà te kedita tadon.
18Eneng-enengi niyo heman se ketanem te menge Judiyo. Aw egsimba dan, egduyun dan te Timanem pineokit te pegpengimatay dan te ayam-ayam ipegpemegay, aw se otaw egpengaen te pengelapen egteniyen, yan se otaw egpeakop diyà te pegduyun dan te Timanem.
19Iling heman kenyan se otaw memegay te kànen diyà te inotaw, so megpeakop dan heman diyà te pegduyun te kenà benal timanem. Meneng ibeg ko, ketegahan niyo te wedad palos ontong dan kenyan. Eked heman ketebangi se otaw egsimba te inotaw.
20Aw doen kànen ibegay te otaw kenà egsimba te Timanem, se ontò dan begayan te kànen, yan se menge bosaw. Kenà Timanem se iduyun dan. Eked a keibeg aw mesakop kaw te bosaw.
21Eked kepakay aw minem kaw kidoen te tabò impunù te Pengolo amon iduyun sikandin, aw penga niyan minem kaw heman kidoen te tabò egtewal-tewalan dan te bosaw. Eked heman kepakay aw komaen kaw te pan impunù te Pengolo, aw penga niyan komaen kaw heman diyà te kènanan te otaw egduyun te bosaw.
22Aw iling kenyan se eg-inangan niyo, meopal se Pengolo kenyo. Eked kaw pekelowà te pegpelumun din kenyo.
23Pengkey mepakay aw inangen ko se kedita mepakay diyà te Timanem, meneng eked a, so wedad ontong te kedita niyan. Pengkey doen mepakay tadon inangen, meneng eked tadon iyan inangi, so eked tadon ketebangi se menge doma otaw egpemenal.
24Pengkey eden se inangen te otaw, kolang se tod din aw olò sikandin se mekeontong, meneng keilangan mekeontong heman se doma otaw.
25Na, aw doen pengelapen ibeligyà doton te pedyanan, mepakay aw kànen niyo iyan, pengkey eden. Aw mengabat kaw, ikà niyo den eg-insà aw eden pengelepeni se inabat niyo, amon wedad keeneng-enengan niyo.
26Mepakay aw kànen niyo iyan, so doen kagi te Timanem insolat, “Lekat te Pengolo se kedita dini te keneyonan, so sikandin se mig-inang te kedita.”
27Na, aw tewalen kaw komaen doton te balay te otaw kenà egsalig ki Cristo, aw doen ibeg niyo domoton, mepakay iyan. Pengkey eden se ipekaen din kenyo, mepakay iyan kànen. Ikà niyo den eg-insà aw eden se ipekaen kenyo, amon wedad keeneng-enengan niyo.
28Meneng aw doen otaw mikagi diyà kenyo te tapay iyan imbegay diyà te inotaw, ikà niyo egpengaen kenyan amon wedad keeneng-enengan te otaw simabi kenyo, so pengkey eked pegkedaet se kenyo aneng-aneng, meneng megkedaet beling se kandin aneng-aneng. Pengkey komaen a aw eked, wedad otaw mekesila kanak pengkey wedà peg-onawa se aneng-aneng day,
30so aw megpesiontong a te kànen ko, eked kepakay aw silahen a tandà te pegkaen ko te pinesiontongan ko diyà te Timanem.
31Nayan, pengkey eden se inangen tadon, pengkey komaen kidon, aw pengkey minem kidon, keilangan iduyun tadon se Timanem pineokit te kedita te inangen tadon.
32Keilangan mèpiya se kedita te eg-inangen niyo amon eked pegkedaet se pedowan te doma otaw, pengkey Judiyo aw kenà Judiyo, pengkey otaw egpemenal te Timanem.
33Peg-iling kaw kanak, so ibeg ko ketebangan se kedita te otaw. Kenà olò kenaken kèpiyaan se eg-eneng-enengen ko, meneng eg-eneng-enengen ko heman se kèpiyaan te kedita te doma otaw, so ibeg ko mekelowà dan lekat te salà.
