1 Korin 1

1

2

3

4

5

6

7

8

9

10

11

12

13

14

15

16

¹Iau o Pol, ra o God i kabo pas iau, elar ut nam anun a nemnem sur an aposel anun o Karisito Iesu. Mir nam o Sostenes a tisindat, mir tumtumus

²torom mot a taro na lotu anun o God ra mot kis tiro o Korin. Mot ra o Karisito Iesu i gos talapor pas anumot a nilaun, ma i kabo pas mot sur mot a taro anun o God. Mot a taro anun o God tomo nama taro rop una kum tamon rop ra det lotu una risan anundat a Labino o Iesu Karisito, i ra a Labino anundet ma anundat kai.

³A marmaris ma a malmal tan o God a Tamandat ma a Labino o Iesu Karisito, in kis tomo nam mot.

⁴A ser watung wakak torom o God un mot, kibino una nun a marmaris ra i pitar tari torom mot un o Karisito Iesu.

⁵Uni una numot a kinkinis tomo nam o Karisito, o God i udan mot nama kum utna rop. I udan mot una numot a wasiso rop ma numot a mananos rop.

⁶I pami lenra uni anumet a wasiso talapor un o Karisito, i sa wanpat talapor una numot a nilaun.

⁷I mo ra ka mot in sibo sur tu etabor anun a Tokodos na Nion torom mot, ra mot ser kis langlang nama gasgas sur anundat a Labino o Iesu Karisito ra in nanpat puaso.

⁸I ut in udekdek mot tuk una ururop na bung, sur katu utna ra din takun mot nami una bung anun anundat a Labino o Iesu Karisito.

⁹Ma a utna ri ra o God i watungi in pami ut. Ra i kabo pas mot sur mot in lason tomo nam o Nutunu o Iesu Karisito anundat a Labino.

¹⁰A kum tistising, a saring mot nama risan anundat a Labino o Iesu Karisito, sur mot rop mot in tur tomo, ma gong mot taptapagol. Ma in takai kut a nuknuki mot, ma anumot a nemnem kai.

¹¹A kum tistising, ara taro ra det kis una rumu anun o Kloe, det inanos iau lena mot ser engaras etetalai.

¹²An palos a kukurai ina wasiso ri lena: Ara taro tagun mot det watungi lena, “A mur o Pol,” ara taro det watungi lena, “A mur o Apolos,” ara taro det watungi lena, “A mur o Pita,” ma ara taro kai det watungi lena, “A mur o Karisito.”

¹³Pepetlai, o Karisito i sa taptapagol? Pepetlai, di sak wat o Pol unin nanai kutus un mot? Pepetlai, di baptaiso mot nama risan o Pol?

¹⁴A watung wakak torom o God uni ka baptaiso tar taio tagun mot. O Krispus kut ma o Gaius ra a baptaiso der.

¹⁵I lenra, katutaio tagun mot in pet lari sur in watungi lena, di baptaiso i nama risang.

¹⁶A lingmulus, a baptaiso det kai ra det kis una rumu anun o Stepanas, ma ka tasmani, ra a sa baptaiso tar taio kai, o awu.

¹⁷Uni o Karisito ke tulu iau sur an baptaiso, awu. I tulu iau sur an warawai nama Wakak na Wasiso. Ma awu sur an warawai nama wasiso na mananos anun a taro, surko in lakro ru a dekdekin in nanai kutus anun o Karisito ra in utna oros kut.

¹⁸Uni a wasiso unin nanai kutus, a longlong na wasiso kut torom det ra det wan sur a iniru. Ikut, torom dat ra o God i ulaun dat, a wasiso unin nanai kutus, i a dekdekin o God.

¹⁹Uni o God i sa watung tari una Buk Tabu lenri, “An kamar ru a mananos anun a kum tene mananos, ma an upuku ru a wakak na nuknuk anundet ra det tastasman.”

²⁰Asau dat in watungi un tu tene mananos? Asau dat in watungi un tu tene mananos una kum Warkurai anun o Moses? Asau dat in watungi un tu tene mananos ra in balu rop pas a kum iting? O God i ese i lena, a mananos tagun a rakrakon bual i a longlong na mananos kut.

²¹Uni, una mananos anun o God, i pami sur a taro una rakrakon bual ka det in pet lari sur det in tasman o God una mananos anundeti ut. A wasiso ra met warawai nami, a taro det nuki lena a longlong na wasiso, ikut, una wasiso ra, o God i gas sur in ulaun det ra det nurnur.

²²A lingmulus, a taro Juda det nem na tama lako kum ukinalong, ma a taro Grik det sisio sur tu mananos.

²³Ikut met, met warawai kut un o Karisito, i ra di sak wati unin nanai kutus. A warawai ri, a taro Juda det ngeti, ma torom det, i elar nama wat ra det puku taru uni, ma i elar kut nama longlong na wasiso torom a taro ra awu sur a taro Juda.

²⁴Ikut, o Karisito a dekdekin o God, ma a mananos anun o God, torom a taro ra o God i kabo pas det. A taro ra, tagun a taro Juda ma tagun a taro Grik.

²⁵A mananos anun o God ra a taro det nuki lena a longlong na mananos kut, i ra i labo taun a mananos anun a taro. A dekdekin o God ra a taro det nuki lena ke dekdek, i ra i dekdek sakit taun a dekdekin a taro.

²⁶A kum tistising, mot in nuk pas mot lena mot asi na ngas na taro ra o God i kabo pas mot. Awu sur a susut tagun mot a kum tene mananos umatan a taro. Awu sur a susut tagun mot, mot utur ukai a dekdek sur mot in mugu a taro. Ma awu sur kai a susut tagun mot tagun a kum kabotaro ra det labo umatan a taro.

²⁷Ikut o God i pilok pas a utna ra a taro det nuki lena a longlong na utna sur in ban umaimai a kum tene mananos. Ma o God i pilok pasi kai a kum utna ra a taro det nuki lena ke dekdek sur in ban umaimai det ra det dekdek.

²⁸O God i pilok pas a kum utna ra a taro tagun a rakrakon bual det unatino pasi, ma a kum utna ra det ngeti, ma a kum utna ra det nuki lena a kum utna oros kut, sur a kum utna ra i labo torom det, in utna oros mukut.

²⁹I pami lenra sur gong taio i warango pasi ut umatan o God.

³⁰O God ut i sa pam tar a kisapi sur mot in laun tomo nam o Karisito Iesu, ma i pitar tari sur i a kimkibin anundat a mananos. Un o Karisito, o God i watung dat lena dat tokodos umatano, ma dat anun a taro. Ma una pinapam anun o Karisito, o God i kul langolango pas dat gusun anundat a kum sakino petutna.

³¹I mo ra dat in pami elar nami ra di sa tumus tari una Buk Tabu lena, “Osi ra i nemi sur in warango pasi, i wakak sur in warango pas a Labino.”