1Cha bitalla Jesucristo giti, cha gerule ba ulita ole, cha takalin ba ulita tachke boidu che enusulian unsuialin ole giti, che enusulian unsuialin jo siere nga Egiptoge gire Chube bogakwa gbu ama ulita jonlla dbe, bogakwa e jo che enusulian unsuialin dbe ble kada Mar Rojoske tangle, ulita jo tangle seradi.
2Che enusulian unsuialin ulita Moisés gau mo chugagwallale, ama ulita chegu ule Moisés ole, ama ulita chagedu ule Moisés ole baini kaire bogakwa jo ama jonlla dbe, ene bogakwa ama jonlla du bleske tangle, ama ulita jo tangle seradi ule Moisés ole, Chube che enusulian unsuialin ulita chudabo ene.
3Kaire Chube bligda dregaitre alin kagu che enusulian unsuialin ulita alin gutadale, bligda e chiu nga ngaña giti, che enusulian unsuialin ulita bligda e gutu.
4Che enusulian unsuialin chagedu chi me jwiage, nga ege chi me ama alin jadale, Chube chi gbu chie kege kwian alin jadale, ulita chi e jau, chi ama kira gbu. Che enusulian unsuialin me toidu chi e alin giti, me ene, Cristo agedu no ama alin diali, che enusulian unsuialin me ñadu gwage Cristodi agwa Cristo kledu ama ole diali, Cristo ama ulita manadu baini kaire ama jo ngwadi ene ama ñadu toi.
5Cristo che enusulian unsuialin chudabo tanre agwa ama ulita me mo ta gbu age no Chube takalin kare, che enusulian unsuialin ngle agedu me no Chube gwage malen Chube ama chugu ngwadi jogeda nga gballage kledu chage ngwadi.
6Boidu ene che enusulian unsuialin ulita ole ama agedu me no gdale, che ulita tachkedale e giti ene suge chege che me mo ta gbale mo chuge ngwadi age me no che enusulian unsuialin agedu kare.
7Cha gerule ba ulita ole, ba me lle oña dodaba mo kodi ollade, ba me agedale che enusulian unsuialin gweale agedu kare, Chube gerua degaba unsuialin gerule che enusulian agedu giti, chada e gerule: “Ama mo litu ule chui ollade blire lle jai, bligda kdeale ama ulita skwendu gdate tanre lle oña dodaba mo kodi gai mo chubeale ollade, kaire onbrenu muirenu tanre mo chugu ke giti.” Chube gerua degaba unsuialin gerule ene che enusulian unsuialin agedu giti, ba ulita me lle oña olladale ama agedu kare.
8Kaire che ulita onbre muire me mo chugadale ke giti che enusulian unsuialin gweale agedu kare, che enusulian unsuialin agedu tanre me no, e giti Chube ji gbu ama alin, kwian veintitres mil jokeda chui gbaitre alin.
9Che me mo ta gbadale mo chuge Chube ole tañachuge che ñage age tanre me no Chube me tallade e giti Chube no che ole malen Chube mi ji gbe che alin che age tanre me no ene gdale, che me mo ta gbale age ene Chube dollale. Che enusulian unsuialin gweale tañachugu ene age tanre me no, ama tañachugu Chube no Chube me ji gbe ama alin, agwa age me no ene giti Chube ji gbu kwian ene ulita alin, kwian tanre lentigu jorisige, ama ulita jokeda.
10Ba me gerudale kwian Chube gerua dbanga baskedi Chube gerua dbanga dollale, ama ba ulita Chubenu chugagwalla Chube geruadi, ba gerule amadi ama dollale Chube be ji gbe ba alin. Boidu ene che enusulian unsuialin ole, ama gweale gerudu ene chugagwalladi ama chugagwalla dollale, age me no ene giti Chube lle boanga mo alin nga ngaña giti kagu ji gbe kwian ene ulita alin, lle boanga Chube alin kwian ene ulita guda.
11Boidu ene ulita che enusulian ole unsuialin, e jo degaba che alin che kle toi nege tangle chui bdagli ngnagu alin, ene chke uñale che ulitage chada jo degaba boidu ene enusulian oña ole giti, sugedale chege che me mo ta gbadale age che enusulian unsuialin agedu kare.
12Ba gweale tañachuge ai kare mo giti: “Cha kwian no trate, cha kle age no trate diali ulita, cha me kle age me no sidri.” Ba kle tañachuge ene mo giti ba chagedale ta giti, ba kwian, kwian ulita ñage mo ta gbe age me no ba enusulian unsuialin agedu kare, malen ba mo ta gbadale chage ta giti me mo chuge ngwadi age gweale me no.
13Ba tale suge age gweale me no ba tachkedale ai giti: Kle boi ene kaire daba na ulita ole, daba ulita ta suge ba ta suge kare. Ba talla ene molen ba tachkedale Chube giti, Chube kle ba ole diali, ama ba chudaboi ba kira gbe ene ba me age me no ba ta agekalin kare. Ba tale ba ta agekalin gweale me no ba Chube chuge ngwadi ba chudaboi, ene Chube be ba ta gbe joge siere talla enege ene ba mi age me no ba takalin kare.
14Cha daballa cha ibotea Jesucristo giti, cha no no ba ulita ole, uñale chage Chube kle ba ole ba chudaboi, malen cha gerule trate ba ulita ole, ba mo ta gbadale chege sugekare lle oña kwian kle gai mo chubealege.
15Cha kle gerule ba kwian ulita chuga molen ta molen ole, cha kle gerule kare giti ba ñage tañachuge e giti cha kle gerule ulia o me.
16Che Chubenu kle mo lite ule tachkedale Cristo jokeda giti che ulita kle pan gute uva chia jai. Che kle uva chia jai, ngeru che gerule no Chube ole uva chia giti gire che e jai, uva chia jai giti che kle mo ta gbe tachke Cristo bea giti. Kaire che kle pan gute, ngeru che gerule no Chube ole pan giti gire che e gute, pan gute giti che kle mo ta gbe tachke Cristo jaba giti. Che pan gute uva chia jai ule daba na Cristo jokeda ganga ulia ole e gerule che kle mo ta gbe ule Cristo ole kaire daba na Cristo ganga ulia ulita ole.
17Che Chubenu kwian ngle, agwa pan gute ule modi giti che ta suge che kwian gdaitre alin kare.
18Ba tachkedale kwian israelita ulita giti, ama mo lite samla guge samla gugangwa giti u gerungwa Chube olege, gire ama samla e gweale gute ule, ama age ene ama kle mo ta gbe ule daba na ole Chube olladale, ene ama ulita kle Chube gai mo Chubeale.
19Ene kaire kwian chudalla na me israelita kle lle oña dodaba mo kodi gai mo chubeale, lle oña ngwale ege ama bligda kaite gire ama ulita bligda ene gweale gute, ama age ene ama kle mo ta gbe ule lle oña e gai mo chubeale. Kwian ene kle lle oña e gai lle oña gwade kare tañachuge lle oña kle bligda gbe ma no ama alin gutadale, agwa che Chubenuge uñale e me ulia, che alin lle oña e ngwale me ñage age bligda ole.
20Kwian bligda kaite lle oñage, kwian ene me Chube ulianu, ama kle lle oña gai mo chubeale, ama kle bligda kaite lle oñage, ama me kle age Chube ulia alin agwa ama kle age che dolla Satanás alin kaire Satanás chudaboangalla ulita alin. Cha takalin ba chege sugekare age enege, cha me takalin ba mo ta gbe ule kwian ene ole age che dolla Satanás ule Satanás chudaboangalla ulita alin.
21Ba me ñage mo ta gbe mo lite ule daba Chubenu ole pan gute uva chia jai tachkedale Jesucristo giti gire kaire mo ta gbe mo lite ule kwian me Chubenu ole bligda kaitaba lle oña ngwalege gute lle oña gai mo chubeale. Ba me ñage ta boke gai age Chube alin kaire dolla Satanás ule Satanás chudaboangalla ulita alin.
22Chube takalin che ulita Chube alin gai mo Chubeale, che lle na gai mo chubeale Chube skochie, Chube me takalin che lle na gai mo chubeale. Chube skochie chedi age ene giti Chube ji gbe mno che mi ña jage e kote.
23Che ulita Chubenu mo ta gbadale age Chube alin Chube takalin kare diali, ene che be ñage mo ta gbe ma no Chube ole diali, kaire che be ñage daba na Chubenu chudaboi mo ta gbe ma no Chube ole. Che ulita ñage gerule mo alin: “Cha ñage age ulita cha takalin kare me tañachuge daba na giti.” Che ñage gerule ene agwa age ulita me no che alin, ulita me che ta gbe no Chube ole, kaire ulita me daba na chudaboi mo ta gbe Chube gai ma no Chube takalin kare.
24Che me ñage tañachuge mo giti alin age che takalin kare ulita no che alin, che me ñage tañachuge ene, agwa kaire no mo ta gbe tañachuge daba na ulita giti che kle age e no o me no daba na alin.
25Ba ulita joge samla gige samla chbadakle ngwadi, ba samla gige ba me geru kadadale samla e jo kaitaba o me jo kaitaba lle oña kwian kle gai chuberege, ene ba ñage samla e ulita gute me tañachuge samla giti.
26Chube nga ulita dodadu, Chube lle jigu gutadale kwian alin, che ñage lle e ulita gute, lle oña ngwale me ñage age e ole.
27Kwian me Chubenu ba gweale Chubenu kade blire ule, ba ta jogekalin ba ña joge kwian ene ngwadi blire, ba ulla bligdadi ba bligda gutadale kamne, ba me geru kadadale samla bligdalla giti: “¿Samla e me jo kaitaba lle oñage?” Ba me geru kadadale ene, ene kwian na gweale Chubenu kle eni me tañachuge samla bligdalla giti.
28Agwa daba na gweale Chubenu kle eni blire ule kaire, ama me geru gaba sbali, amage chke uñale kwian na giti samla e jo kaitaba lle oñage gire ama gerule ai kare ba ole: “Samla e jo kaitaba lle oña kwian kle gai chuberege, che kwian Chube ulianu me ñage samla e gute.” Daba ene ole ba me samla ene gutadale, daba ege tale suge me no samla ene gute, amage suge ama samla ene gute ama kle age me no Chube dollale, ba me samla ene gute ene ba me kle age daba ta suge dollale, ba mo ta gbadale age no daba ene alin me mo alin.
29Cha kle gerule ba ole kwian na me kle tañachuge ba kle tañachuge kare giti, ba tale suge ba ñage bligda ulita gute agwa daba na tale suge me ñage bligda jo kaitaba lle oñage gute, ama alin e me no. Ba gweale ñage geru kade e giti, ba gerule: “Cha tale suge cha ñage bligda ulita gute, ulita no cha alin, cha tale suge ene, ¿lledale cha tañachuge daba na giti mo ta gbe me age ama ta suge dollale?
30Cha blire, cha gerule no Chube ole bligda giti, cha bligda gute, e no cha alin, ¿lledale daba na me bligda ene gute be gerule me no chadi bligda giti? Daba me kle e gute.”
31Ba ulita tachkedale ai giti: Ba kle age ulita giti kaire blire giti chi jai giti mo ta gbale age no diali kwianske me tañachuge mo alin giti age ba takalin kare, ma no mo ta gbale age no ulita Chube takalin kare kwian ulitaske, ene kwian gwage badi suge amage Chube kle age no ba tale kle ba ta gbe age, ene kwian gwage badi gerule no no Chube giti.
32Kwian israelita gwa giti kwian me israelita gwa giti kaire kwian Chubenu ulita gwa giti ba mo ta gbadale age trate ene Chube takalin kare, ene ba mi kwian gdaite ta gbe age me no Chube dollale ba kle age giti.
33Cha kle gerule kare ba ulita ole cha kaire kle mo ta gbe age ene diali tañachuge ngeru no kwian na ulita alin, cha me tañachuge ngeru mo giti age mo alin cha takalin kare, me ene, cha kle mo ta gbe tañachuge kwian na giti. Cha kle age ene kwianske cha takalin kwian na tanre ñage mo ta gbe Cristo gai ulia cha giti.
