1 KINANƆ 22:3-28 - Luda yã takada kũ Bisã yão

1 KINANƆ 22:3-28

Click on verse(s) to share them!

³Isarailanↄ kína pì a gbɛ̃nↄnɛ: Á dↄ̃ kũ Ramↄ Giliada bi ó pↄ́mɛ yãroo? Ama ódi a sina Siria kínaa yã kɛkɛro.

⁴Akũ à Yosafata là à pì: Ĩni gɛ́ kũmao zĩ̀ ká kũ Ramↄ Giliadadenↄroo? Akũ Yosafata wèa à pì: Pↄ́ dokↄ̃nↄmɛ ó ũ, ma gbɛ̃nↄ bi n gbɛ̃nↄmɛ. Ma sↄ̃nↄ bi n sↄ̃nↄmɛ.

⁵Akũ à ɛ̀ra à pìnɛ: Ǹ Dikiri gbɛka ǹ ma gĩa.

⁶Akũ Isarailanↄ kína annabinↄ kàkara lán gbɛ̃nↄn wàa pla bà, akũ à ń lá à pì: Mà gɛ́ zĩ̀ ká kũ Ramↄ Giliadadenↄon yá, ke màsun gɛ́ro? Akũ ò wèa ò pì: Ǹ gɛ́! Dikiri ni ń nannɛ n ↄĩ.

⁷Akũ Yosafata pì: Dikiri annabi ke kú la ò a laroo?

⁸Akũ Isarailanↄ kína wèa à pì: Gↄ̃gbɛ̃ ke kun dↄ, a tↄ́n Mikaya, Imlã nɛ́mɛ. Ani fↄ̃ à yã gbɛkawɛrɛ Dikiria, ama má yeiro, zaakũ àdi yã mana omɛnɛ zikiro, séde a vãni. Akũ Yosafata pì: Ǹsun o lɛro kína!

⁹Akũ Isarailanↄ kína a ìbanↄ doke sìsi à pìnɛ: Ǹ gɛ́ ǹ Imlã nɛ́ Mikaya sísi à su likalika.

¹⁰Isarailanↄ kína kũ Yudanↄ kína Yosafatao baadi a kíble'uta dana, ò vutɛna ń kíblegbaaa pↄ́wɛgbɛ̃ki kũ à kú Samaria bĩnilɛa, akũ annabii pìnↄn tɛn annabikɛyã o ń arɛ ń pínki.

¹¹Kenana nɛ́ Zedekia mↄ̀si pì lán bɛ̃nɛ bà à pì: Dikiri pì bɛ̃nɛ dínↄn ĩni Sirianↄ zↄ̃zↄ̃o ǹ ń dɛdɛ ń pínki.

¹²Akũ annabii pìnↄn tɛn yã dokↄ̃nↄ o ń pínki òtɛn pi: Ǹ gɛ́ lɛ́tɛ Ramↄ Giliadaa, ĩni fuaro. Dikiri ni ń nánnɛ n ↄĩ.

¹³Gbɛ̃ kũ à gɛ̀ɛ Mikaya sísi pìnɛ: N annabi dakenↄ lɛ́ kɛ̀ dokↄ̃nↄn yee! Yã nnan òtɛn o kínanɛ. Ǹ yã dokↄ̃nↄ pì o se ǹ yã nna onɛ.

¹⁴Akũ Mikaya pì: Ma sì kũ Dikiri kunnaao, yã kũ Dikiri òmɛnɛn mani o kínanɛ.

¹⁵Kũ à kà, akũ kína a là à pì: Mikaya, ò gɛ́ zĩ̀ ká kũ Ramↄ Giliadadenↄon yá, ke òsun gɛ́ro? Akũ à wèa à pì: Ǹ gɛ́ lɛ́tɛḿma! Ĩni fuaro. Dikiri ni ń nánnɛ n ↄĩ.

¹⁶Akũ kína pìnɛ: Gɛ̃̀n ũgban mani n da ǹ sí kũ Dikirio kũ yãpuran ĩni omɛnɛɛ?

¹⁷Akũ Mikaya pì: Ma Isarailanↄ è fãkↄ̃ana sĩ̀sĩnↄ kpadoa lán sã kũ ò dã̀ri vĩronↄ bà. Akũ Dikiri pìmɛnɛ, gbɛ̃ pìnↄn don'arɛde vĩro. Ń baadi tá a bɛa aafia.

¹⁸Akũ Isarailanↄ kína pì Yosafatanɛ: Ńdi ma gweroo? Mádi onnɛ kũ àdi yã nna omɛnɛ zikiro, séde a vãni?

¹⁹Akũ Mikaya ɛ̀ra à pì: Ǹ Dikiri yã ma! Ma Dikiri è vutɛna a kpatan, ludambɛ zĩ̀karinↄ zɛzɛ a sarɛ ń pínki ↄplai kũ ↄzɛo.

²⁰Akũ Dikiri pì: Dí mɛ́ ani ↄ̃ndↄ̃ kɛmɛnɛ Ahabunɛ à gɛ́ lɛ́tɛ Ramↄ Giliadaa de à ga gwee? Akũ gbɛ̃ke pì la, gbɛ̃ke pì la dↄ.

²¹Akũ nini ke bò à sù à zɛ̀ Dikiri arɛ à pì: Makũ mɛ́ mani gɛ́ ↄ̃ndↄ̃ kɛnɛ. Akũ Dikiri a là à pì: Ĩni kɛ deramɛɛ?

²²Akũ à wèa à pì: Mani gɛ́ mà kɛ nini ɛ́kɛde ũ mà yã sóso mà ká a annabinↄnɛ ń lɛ́n. Akũ Dikiri pì: Ĩni ↄ̃ndↄ̃ kɛnɛ, ĩni fuaro. Ǹ gɛ́ kɛ lɛ.

²³Lɛn Dikiri tò nini ɛ́kɛde pì yã sòso à kà n annabi dínↄnɛ ń lɛ́n lɛ ń pínki. Sunyĩn Dikiri kpànyĩ.

²⁴Akũ Kenana nɛ́ Zedekia gɛ̀ɛ à Mikaya sãn kɛ̀ à pì: Bↄrɛn Dikiri Nini bòma à gɛ̀ɛ à yã ònnɛɛ?

²⁵Akũ Mikaya wèa à pì: Ĩni dↄ̃ zĩ kũ n bàa lɛ̀ n gɛ utɛ kpɛ́nɛn.

²⁶Akũ Isarailanↄ kína pì: À Mikaya kũ à tá kãao wɛ̃tɛ kína Amↄ kũ ma nɛ́ Yoasio kĩnaa,

²⁷á ońnɛ ma pì ò a da kpɛ́siran, ògↄ̃ burodi kpáa kũ ío fítifiti ari mà gɛ́ suo aafia.

²⁸Akũ Mikaya pì: Tó n gɛ n su aafia, séde adi kɛ Dikiri mɛ́ à yã ò ma gãiro. Akũ Mikaya ɛ̀ra à pì: Asa á baadi pínki ma yã pìi màa?