1 Utaáchich Kuraka 22:3-28

³Kuraksha Israelchich ichingaroo wipunashee tushaneeyaru, tsiyatarangu, Siy ichingarus yasaktamsa. Yakat Romot, Galaad iyatamcha tsapuni. Itaru, Sírushuch urkar anush pshturangiya. Ashiriya, ¿siy anoo amaksa? ¿Maya mangishis chinaksa? ¿Ndusha kurakaa Sírushchee itutsimaam waritak? tárangiya.

⁴Kurakaatssha Josafata: ¿Shiy amaksha? ¿Nda nuwapa ipuneeruni yakat Romot Galaadash tsap pshtuyaruni, pachamaam zandkish? tárangu, kuraksha Josafat, Nuwaana, misha sundarurpati ichingaruni kapaachpatatam shiyapa sundarurish washunand ipunchinipa.

⁵Itaru, ndatuma tapazip naaruni, ichtaru Apanlleetsima yasayani, tárangiya.

⁶Ashiriya, kuraksha Israelchich apanllpanee urkar 400 tushaneeyaru, masharangiya. ¿Siy amaksa? ¿Yakat Romotash tsap Galaadash pshtuyareezini pachachinee? ¿Nduniya ashiru watstazuwa? tárangu, uwshtisin ichingarusin, Waratashinints. Uru Apanll shiyaam istakachu, siyamari kasitssa, táranganaya.

⁷Itaru, kuraksha Josafat, ¿Ndusha nish min apanllpan urkar taar? ¿Waapasha yasayaruni, naamaama? tárangiya.

⁸Kuraksha Israelchich Josafataa, Nish Mikayas Imlárini wip táriya. Anoo yasamaam waritaritamcha. Itaru, nuw anoo kuk nda kaapa mazinamaam zandkina, watam tsiyatssee nda wanasir kamanimaam yasariya. Yutarit tushiychu anootsimari kamankiya, tárangu, Josafatsha, Nduni amb tárinllpa, tárangiya.

⁹Anuritam kurak Israelchich sundaroo kuruzeeru, Mikayas Imlárini wip yamashini. Mikeeru naatampa, táyaru kamachtarangiya.

¹⁰Ashiriya, kurak Israelchich, misha kurak Utaáshuch Josafat ashirusin, tapazip naamaam yareersin, yakat Samariyanung shítungash waanamuntaritssin uxinash kuxinataranll ashiranganaya. Anush apanllpanshitisin urkar aranginasha pamazuta, pamazuta ashirangsin, tsiyatssee kamanimantar ashiranganaya.

¹¹Sedekiyassha Kenaanarini wip ngusamb wakar wits ashiru zapan tinayaru, anootssha yáyaru kapung tsiyatarangu, Apanll ateeja: Uru nish puu puu tákchus, siyamari tpuxtakachus, ashparita kachingeerus, kasatssa, Apanll átcha, tárangiya.

¹²Ashiriya, ichingarusin apanllpan urkar ashimanandari tsiyataranganaya. Naayarus, pachashinints. Yakat Romota Galaadshuchee uru siyamari kasitssa. Ashkachus, Apanllsha anoo tsap siyaam panachiya, táranganaya.

¹³Yuwaatssha tsiyatssipanee zanganirangana ansha Mikayasaa, Piyartach ichingarusin apanllpan urkar yuwaa kurak masharangu anoo wanasir kamaniranganaya. Ashirucha, anoom shiyangaz kurak yamashini, táyaru, yamakaturi kusarangina. Shiysha anush kuseerush, tsiyatsis wanasir kamaningcha kurakaatsi, tárangu,

¹⁴Mikayassha, Zurampatari Apanll paritam, yuwaatsimari waana Apanll kamachtaku, anootsimari kamanimaam waritakina, tárangiya.

¹⁵Ashiriya, kurakashsha kusarangu, Ajabsha; Mikayasaa, ¿yakat Romotash Galaadshuchpa waratkachuni, iyamaritaja kasichinee? ¿Nduneezuwa kasichiniwa? tárangu, Mikayassha, Naayarus waratangints. Uru siyamari kasitssa. Ashkachus, Apanll waana anoo yakat shiyaam panachiya, tárangu,

¹⁶Kuraksha, ¿Wanipaja shiy tsiyatkush ambiri átish? Itaru, na zurampatarisha Apanll waana paritam itsinsampatari kamaningcha, tárangiya.

¹⁷Ashiriya, Mikayassha, Nuw Israelshuchee ichingaroo tputs, opeejaa ksutamapan ndunar tamatarpari ashirusin, machish masarsin parangina. Ashiri anoo Apanll ateeja. Watam neem tputs ksutamapan ndunariwa. Waani yapitam káyashinana kanapchinllinpa, átcha Apanlli, tárangiya.

¹⁸Anootssha kurak Israelchich mazinarangu, Josafataatssha; Ashirucha, nuw shiyaa in tputs nda wanasir tsiyatssee kamanikpa. Mangutaritanda tamasingayaru tsiyatku, táranllshina, tárangiya.

¹⁹Yusur Mikayastam tsiyatarangu, Yuwamand shiy átish anumand nuw Apanllee chínash kamanchinllpa. Nuwsha Apanllee paranguri, uxinashimun kuxinaru, anoo wasundursha kanindpich mbutsanungich ashpatam, mbazinungichsha ashpatam ashirusin turipingarsin, zapan shaneersin parangina.

²⁰Anushsha Apanll masharangu; ¿Chakaja kurakap Ajabap naayaru, mangutari tamasingayarusin, pachamaam yakat Romotap Galaadshuchip naakchu, waanaatstatam pachachinllina? Apanll tárangu, wasundurursha anoo piyartachshitisin tsiyatkusin, mangutari piyarisha tsiyata, mishat tputs mangutaritam piyartatam tsiyata, ashiranganaya.

²¹Itaru, minumamari Apanll wasundurur anush kusarangu, Apanllee, Nuw amb ashimaam waritaktana, tárangu, Apanllsha, Ashiriya, ¿shiy tamayareezish amb ashtachish? tárangiya.

²²Ansha Apanll wasundurur, Ashiriya, nuw naayaruri, apanllpanee urkar ichingaroo wayangichirireem wayachima. Ashkachuri, uwshtisin mangutari ngichchinllinaya, tárangu, Apanllsha, Shiy amb ashimaam waritaktishcha. Yuwari táyarish anuri shishincha, Apanll tárangiya.

²³Ashirucha, na in Apanll waana nishuchee ichingaru apanllpan urkar mangutari tsiyatamaam wayarangu, mangutaritssin tamasingayarusin tsiyatkanaya, watam Apanll waana shiyaa tsipamaam wayaranguwa, Mikayas kurakaa tárangiya.

²⁴Anootsshat, Sedekiyas Kenaanarini wip mazinarangu, kapung tsiyantayaru, Mikayasaa wachush puwarangiya. Sheeru, ¿Mayaamsha ngutish ngichiksha? ¿Yapsha Apanll wasundurur shiyash kuseeru, tsiyataranga? tárangiya.

²⁵Mikayassha, Uru minush zar kundarareetsish punikush, kamungpi átush, suwayaranllush, pangusish tapishta, minushsha pangus tapishta shitarachus, anush uru yuwaa nuw táyanlli anoo chinachsha, tárangiya.

²⁶Ashiriya, kuraksha Israelchich, Natu Mikayasaa naturi putayarus, kurakap Amónap yakta ksutamapanip machingints. Sheerus, kurak Jowasapsha nuwap ipari machintstamtsa.

²⁷Anushsha kuseerus, kuraktanda Ajab kamachtayaru, tumanshishish tumanamaama, tángtsa, sheersin, watungasheemsha yuw pang' yutarita an kunguptamari panachinllinpa. Nuw tapazip wanasir matambshi kanapeechuri, anush tashitungachinipa, tárangiya.

²⁸Mikayassha yusur aranginasha tsiyatarangu; Wánariya shiy matambish kanapkachush, ashiri nuw ngichkuparina tsiyatarangina. Apanllee kuk nda kaapa itsinsaru kamanirangina, tárangiya.