1 HANUA PAVAPAVADIA 8:1-46

¹Bena Solomon ese Israel tau-badadia bona iduhu lohiadia iboudiai bona Israel taudia edia ruma biagudia na e haboudia, Ierusalem ai bae hebou King Solomon vairanai, Iehova ena taravatu mauana na David ena hanua ladana Siona amo bae daelaia totona.

²Hua ihahituna, ladana Etanimi, ariana negana ai, Israel tataudia iboudiai na King Solomon dekenai e hebou.

³Israel tau-badadia iboudiai ema; bena hahelaḡa taudia ese maua helaḡana e abia isi,

⁴Iehova ena maua helaḡana bona hebou kalagana bona ḡau helaḡadia kalaga lalonai e miava iboudiai na hahelaḡa taudia bona Levi taudia ese e daelaidia.

⁵Bena King Solomon bona Israel hegogona idoinai, ia vairanai vada e hebou taudia, na ia ida maua helaḡana vairanai e gini, mamoe bona boromakau mamaruanedia momo herea na e hahelaḡadia, ihagaudia eiava iduahidia na tau ta asi dibana.

⁶Bena hahelaḡa taudia ese Iehova ena taravatu mauana na e mailaia, ena gabu ai e atoa, dubu ena laloma daiutuna helaḡana lalonai, helaḡa herea gabuna ai, kerubi hanidia henudiai.

⁷Badina be kerubi ese hanidia e toidia roro, maua helaḡana ena gabu daenai; taunabunai kerubi ese maua helaḡana mai madunana audia ida e ḡovadia.

⁸Hari maduna audia na lalata heherea dainai, dududia na laloma daiutuna helaḡana vairana kahana ai dubu irutahunana amo e heitava; a dubu murimurina amo na asie heitava. Unu e mia tomamu ema bona ina dina.

⁹Asi ḡau ta maua helaḡana lalonai, hari huro-nadidia palakadia ruaosi, Horeb ai Mose ese e udadia ḡaudia mo; una na vanegai Iehova ese Israel taudia taravadia e atu gabuna, Aigupto tanona amo e raka lasiva negana ai.

¹⁰Bena hahelaḡa taudia na gabu helaḡana amo e raka lasi negana ai, ori ta ese Iehova ena dubu e hahonua.

¹¹Taunabunai, hahelaga taudia na hesiai karadia ikaradia totona asie gini diba, una ori dainai; badina be Iehova hairaina ese ena dubu e hahonua.

¹²Bena Solomon eto, Iehova ese dina na guba ai vada e atoa; a ia be dibura masemase lalonai baine noho e tomamu.

¹³Lau ese ruma hereadaena vada na hadaia oiemu, emu noho gabuna ai bainela, ela bona hanaihanai.

¹⁴Bena Israel hebou taudia do ginidia ai, hanua pavapavana na e gini kerehai, bena una hebou idoinai e hanamoa.

¹⁵Ia eto, Iehova, Israel Diravana, aita hanamoa. Ia ese ia imana amo ena gwauhamata vada e hamomokania, ia uduna amo tamagu David e hamaorolaia ḡauna, eto

¹⁶“Egu bese Israel na Aigupto amo na hakaua lasi dinana amo ema, hanua ta Israel iduhudia iboudiai lalodiai asina abia hidi, lau ladagu baine noholaia rumana auta baine gini gabuna; a David na abia hidi, egu bese Israel baine biagua”.

¹⁷Tamagu David ena lalo-hadai be Iehova, Israel Diravana, ena dubu auta baine haginia eto.

¹⁸A Iehova ese tamagu David e hamaoroa, eto “Emu lalo-hadai be lau ladagu dubuna auta ba haginia, bona unu o laloa tomamu be namo;

¹⁹ḡau tamona oi na dubu basio haginia, a natumu, do baine vara merona, ese lau ladagu dubuna baine haginia”.

²⁰Harihari Iehova ese ena gwauhamata vada e hamomokania; badina be lau vada na tore isi, tamagu David gabuna ai, bona Israel teronona ai na helaimu, Iehova ena gwauhamata heḡereḡerena, bona dubu vada na haginia, Iehova, Israel Diravana, ladana ena.

²¹Unuseni ai maua helaḡana gabuna vada na lailaia; ia lalonai Iehova ena taravatu, Aigupto tanona amo e hakaudia lasi negana ai seneda e henidia ḡauna, na e heudamu.

²²Bena Solomon na Iehova ena ihaboulaina patana vairanai e gini, Israel hebouna idoinai vairanai; bena imana na e toi roro, guba e dudui heni;

²³bena eto, Iehova e, Israel Diravana, asi Dirava ta oi heḡereḡeremu, guba atai ai eiava tanobada henu ai; emu gwauhamata o badinaiamu bona emu hebogahisi o hahedinaraiamu emu hesiai taudia, oi vairamu ai e rakamu mai lalodia idoidiai taudia, ediai.

²⁴Oi ese emu hesiai tauna lau tamagu David o hamaorolaia herevana vada o badinaia; oibe, udumu amo o gwauraia bona imamu amo vada o hamomokania hari ina dina ai.

²⁵Taunabunai, Iehova e, Israel Diravana, emu hesiai tauna David o gwau henia hamata ḡauna na ba badinaia, oto “Natumu na edia dala nahuadia bema toho, bona lau vairagu ai bema raka, oi ese lau vairagu ai vada o raka heḡereḡerena, oi garamu ta basine moru, Israel teronona ihelai-kauna ai.”

²⁶Taunabunai, Israel Diravana e, emu hereva, emu hesiai tauna lau tamagu David o hamaorolaia herevana, na ba hamomokania.

²⁷A Dirava na momokani tanobada ai baine noho a? A itaia, guba atai doriva-dorivana na se heḡereḡere emu noho gabuna; matona, ina lau ese vada na haginia dubuna na ede baine heḡereḡere toma?

²⁸Ḡau tamona, emu hesiai tauna egu ḡuriḡuri bona egu noinoi bavabi dae; Iehova e, egu Dirava, emu hesiai tauna egu taitai bona egu ḡuriḡuri hari ina dina ai e dae vasimu ba hakala henidia;

²⁹hanuaboi ai bona dina ai ina dubu, vada o herevalaia oto “Lau ladagu na eneseni ai baine noho” gabuna, ba haḡerea, emu hesiai tauna egu ḡuriḡuri ina gabu enai na gwauraiamu na ba hakala henia totona.

³⁰Emu hesiai tauna bona emu bese Israel na emai ḡuriḡuri ai na ina gabu baia vaira henia negadia ai na emai noinoi ba kamonai; oibe, emu noho gabuna guba ai ba kamonai; bona ba kamonai negana ai emai dika ba gwau tao.

³¹Tau ta ese ia dekena tauna bema kara dika henia, bena bema haduaia baine gwau hamata, bona ena gwauhamata na ina dubu lalonai emu ihaboulaina patana vairanai bema gwauraia,

³²oi ese guba ai ba kamonai, bona karana ba karaia; emu hesiai taudia ba hahemaoro henidia, kerere tauna na ba revaia, ena kara na ia sihona kwarana ai ba haloua, bona kara maoromaoro tauna na maorona ba gwauraia, ena kara maoromaoro heḡereḡerena davana do ba henia.

³³Emu bese Israel na inaidia vairadiai bae darere, oiemu ai vada e kara dika dainai, negadia ai na bema lou henimu, bona oi ladamu bema matauraia, bona ina dubu ai bema ḡurimu bona bema noi henimu,

³⁴oi ese guba ai ba kamonai, bena emu bese Israel edia dika ba gwau tao, bona ba loulaidia, senedia o henidia tanona lalonai.

³⁵Emu ai bae kara dika dainai guba baine hekou bona medu basine diho negadia ai, ina gabu enai bema ḡuriḡuri, bona oi ladamu bema matauraia, bona ba hahisihisidia negadia ai edia kara dika bema rakatanidia,

³⁶oi ese guba ai ba kamonai, bena emu hesiai taudia, emu bese Israel, edia dika ba gwau tao, bona bae rakalaia dalana namona ba hadibalaidia; bona emu tano, emu bese taudia vada o henidia bae ḡaunaia tanona, latanai medu ba hadihoa.

³⁷Tano ai doe bema vara, eiava dai-hanai gorerena, eiava hogohogo eiava valavala eiava kwadi eiava rautunu, eiava inaidia na edia hanua ta ai bema koudia heḡeḡe; edena dai-hanai gorerena eiava edena hisihisi bema vara;

³⁸bena edena ḡuriḡuri eiava edena noinoi tau ta ese eiava emu bese Israel taudia iboudiai ese, bae henimu, ta ta sibona sibona lalodia hisihisidia ihaerodia ai bona imadia ina dubu bae toi roro henia ai,

³⁹oi ese emu noho gabuna guba ai ba kamonai bona edia dika ba gwau tao, bona ba kara henidia, ena kara ena kara heḡereḡerena ba henidia, badina be oi sibomu ese taunimanima natudia iboudiai lalodia o dibadiamu.

⁴⁰Taunabunai idia ese oi ganmu bae gari, senedia o henidia tanona ai bae noho dinadia iboudiai lalodiai.

⁴¹Unuhetomana danu idau tauna ta, dia emu bese Israel tauna ta, na oi ladamu bagunai tano daudauna amo bainema,

⁴²(badina be idia ese oi ladamu herea-daena bona oi imamu goadana bona imamu hetoi-rorona haridia bae kamonai), bena ina dubu baine vaira henia, baine ḡuriḡuri,

⁴³una negana ai emu noho gabuna guba ai ba kamonai, idau tauna ena noinoi gaudia iboudiai ba henia; unu amo tanobada besedia iboudiai ese oi ladamu bae diba bona oi garimu bae gari, emu bese Israel heḡereḡeredia, bona bae diba danu ina lau ese vada na haginia dubuna na oi ladamu vada e hahenemailaia.

⁴⁴Emu orea taudia ese inaidia bema tuari henidia, oi ese borna siaidia dalana ta amo, bena oi ese vada o abia hidi hanuana bema vaira henia bona oi ladamu dainai vada na haginia dubuna danu bema vaira henia, bena Iehova bema ḡuria,

⁴⁵oi ese guba ai edia ḡuriḡuri bona edia noinoi ba kamonaidia, bona edia namo ba hamiaia.

⁴⁶Oiemu ai kara dika bema kara, (badina be dika se karamu tauna ta lasi), bena boma badu henidia, bona inaidia irnadia ai boma atodia, bena mai iguidia ida inaidia edia tano bema laohaidia, gabu daudau eiava kahikahi,