1 Reyes 8:1-46

¹Agine, Rey-Salomón Jerusalén-neggweburgi, e-asabin dagmalaga wemarse gochad: Israel-dulemar-nug-nikamaladse, dulemar-sogambe-gakabogwad-e-idumaladse (12), Israel-dulemar-e-neguya-e-dummaganse gochad. Rey-Salomón we-dummaganse gochad, adi, Bab-Jehová-Dadganbo-Igar-Mesisad-Ulu, David-neggwebur-Sión-nugadgi-siidi, Bab-Jehováʼse-goled-negse sedamalagar.

²A-ulale, nii-walagugled-Etanimʼye-nugad-nagunonigu (7), itoakwaa-onoleged-ibagi, bela-Israel-dulemar, Rey-Salomón-asabin gwisgunonimalad.

³Israel-dulemar-nuga-nikamalad nonimargu, dule-irwa-Bab-Dummadse-gormalad Bab-Jehová-Ulu onakwismalad.

⁴Geb agi, Bab-Jehová-Ulu sesmalad. David-ega-dordoneg-sobsad sesmarbalid. Aginbali, a-dordonegyaba e-ibmar-ebulemalad-islidikid-bukwad sesmarbalid. We-ibmarmar dule-irwa-Bab-Dummadse-gormalad semamai gusad. Levita-dulemar bendaksamarmogad.

⁵Rey-Salomón, degi, bela Israel-dulemar-ese-nonimalad, Bab-Jehová-Dadganbo-Igar-Mesisad-Ulu-asabin ambikunonimalad. Agine, amar Bab-Jehováʼga sibad-wawaad ogumakar-uknanai gualid, moli-bebe-nikamalad ogumakar-uknanai guarbalid. Doggus-merguedba geg ebislegusad.

⁶A-sorba, dule-irwa-Bab-Dummadse-gormalad Bab-Jehová-Ulu Bab-Dummadse-Goled-Neg-Ise-Islidikid-siidse sesmalad. Geb baliwitur-dummagan-querubin-e-sakan-urba sismalad.

⁷Baliwitur-dummagan-querubin, Bab-Dummadse-Goled-Neg-Ise-Islidikid-siidgi sakan-aasaa bukwamalad. Deyob Bab-Jehová-Dadganbo-Igar-Mesisad-Ulu, degi, e-suarmar egi yoyoi sigisad.

⁸Bab-Jehová-Ulu-e-suarmar-yoyoid mullusursoggu, Neg-Islidikidgi-gwichir, e-dukumar magasar-dakleged. Magaba-gwichirdi akudakleged. Neg-Islidikidde, Neg-Ise-Islidikid-idu siid. We-garda emi-narmaklenaise deyob amba siid.

⁹Bab-Jehová-Dadganbo-Igar-Mesisad-Ulu-yagi, unnila akwa-matargwagwadgi-Bab-Jehová-e-Igar-narmaksad maid. We-akwa-matar, Moisés, Horeb-yar-siidgi-gudigu, mesis gusad. Israel-dulemar-Egipto-yargi-nosmalad-sorba, Bab-Jehová, Horeb-yargine, Israel-dulemarbo igar-mesnai gusad.

¹⁰Dule-irwa-Bab-Dummadse-gormalad Bab-Dummadse-Goled-Neg-Islidikidgi-nodmargua, neg waa-ena sigisad.

¹¹Ar Bab-Dummadse-goled-neg waa-ena-sigissoggu, dule-irwa-Bab-Dummadse-gormalad, Bab-Dummadse-goled-neggi Bab-Dummadga geg bar ibmar-imake gusmalad. Ar ade, Bab-Jehová-e-gangued-yeerdakleged bela neg-gasa nagusad.

¹²Agine, Salomón sogded: “Bab-Jehová, be sogsa gusad: ‘An mogir-sichid-imbaba gudii guoye.’

¹³Bab-Jehová, degi-inigwele, an bega neg-bur-birigined sobsad. A-neggi degisadegu be gudii guegar.”

¹⁴Rey-Salomón, Israel-dulemar-bela-gwigwismaladse aibirided. Geb Israel-dulemargi nued-binsasad.

¹⁵Geb sogded: “Bab-Jehová-e-nug odummolesun. Bab-Jehová, Israel-dulemar-e-Bab-Dummadid. An-bab-Davidʼga ibmar-imakoye-sogsagusad, sogedba imaksad. Deun, an-bab-Davidʼga weyob sogsa gusad:

¹⁶‘An Egipto-yargi Israel-dulemar-ononaigusad-akale, dulemar-dadgan-warambe-gakabogwad-danar-bukwad-abargi (12), e-neggwebur-gwensak anga-neg-sobega, an sussulid. Unnila an-Israel-dulemar-iduega, an Davidʼbi sunonikid.’

¹⁷”An-bab-David, Israel-e-Bab-Dummad-Jehováʼga neg-nue-sobbi gusanad.

¹⁸Degi-inigwele, Bab-Jehová an-bab-Davidʼga sogsad: ‘Anga be anse-goled-neg-sobbiedi, nued be binsaenad.

¹⁹Degi-inigwele, be anga anse-goled-neg sobosulid. Be-machi-nikuoedi, a-dule, anga anse-goled-neg sobnonikoed.’

²⁰”Degisoggu, Bab-Jehová ibmar-imakoye-sogsagusad, sogedba imaksad. Ani, Salomón, an-bab-David-sorba an yar-ganonikid. Bab-Jehová-sogsagusadba an Israel-dulemar-e-rey-gangi signonikid. An Israel-e-Bab-Dummad-Jehováʼga an neg-sobnonikid.

²¹A-negyagine, Bab-Jehová-Dadganbo-Igar-Mesisad-Uluga an neg-sobsabalid. A-uluyagi Bab-Jehová anmar-dadgan-ebogwa Igar-Mesisad sabolemaid. Bab-Jehová we-igar-mesis gusad, deunni, anmar-dadgan Egipto-yargi-ononai gusgu.”

²²Agi, Salomón, Israel-dulemar-onmakbukwad-wagab, Bab-Jehová-ibmar-ogumakar-ukleged-e-aila-asabin gwisgusad. Geb Salomón, e-argan-niba-onakdegu,

²³sogded: “Bab-Jehováʼye, be Israel-dulemar-e-Bab-Dummad gued. Nibneggi, napneggi Bab-Dummad-baid beyobid sulid. ”Dule-be-nug-odummodimaladga be-igar-mesisad be imaked. Be-nug-odummodimalad, be-sogedba-gudimalad, be nue-sabed.

²⁴”An-bab-David-be-nug-odummodigusadga, be ibmar-imakoye-sogsad, be imaksad. ”Emi-iba, ega be ibmar-sogsagusad be-ganguedba be imaksad.

²⁵”Emisgi, Israel-e-Bab-Dummad-Jehováʼye, an-bab-Davidʼga be ibmar-sogsabalid be imakbali. ”Deun, ega be sognaigusgu: ‘Be-wagan, an-asabin, be-gudigusadyob nued damalale, anba ibsamalale, an-asabin, be-wagan rey-gangi-siged Israel-dulemar-e-idumalaga surguosulid.’

²⁶Israel-e-Bab-Dummad-Jehováʼye, degisoggu, an-bab-David-be-maiga be ibmar-imakoye-sogsa-gusad, emisgi be imake.

²⁷”Degi-inigwele, we-napneggi be megegala, ¿sunna we-napnegde bega unniguosi? Ar nibneg-naidbela, billimar-nibneg-nanaidbela, unnisulid. Degite, be-nug-odummoleged-neg an-bega-sobsad-bursunna, ¿sunna unniguosi?

²⁸Degi-inigwele, an-ibmar-sognaid be itoge, an bese ibmar-egisnaid be itobali. An-Bab-Dummad-Jehováʼye an bese-gornaid be itoge.

²⁹”Bese-goled-neg-soblesadgi be nakuledii guoed. Aginbali, be sogsagusbalid: ‘An we-neggi gudii guoye.’ Degisoggu, we-neggi an bega sunmakder, be an-itogoed.

³⁰We-neggi an bese gollalile, be an-itogoed. Israel-dulemar bese gollarmogale, nibneggi-mai be itogoed. Be anmarga anmar-isgued obeloge.

³¹”Dule-gwensak e-gwenadgi yolesdibe, we-dulega soglesdibe, bese-goled-neg-dummadse nonikoye, agi Bab-Dummad-e-aila-asabin ise-sogar-sogdibe, an egi yolessurye,

³²nibneg-akale be itogoed, be-sogedba be igar nudakoed. Be-dulamarga be igar nudako. Dule-yoledimalad na e-ibmar-imaksadba be sabsur-odurdakoed, e-ibmar-imaksadba ega be igar nabogoed. Dulemar-akar-ibmar-imaksasurmaladgardina, ega be igar nudakoed, e-ibmar-nued-imaksadba egi be sogoed, gwen be ibmar oakalossurye.

³³Bab-Jehováʼye, be-Israel-dulemar begi-yolesad-ular, e-isdarmalad-abin galakunonikile, agine, magar neg-itononimalale, degi, bese gannar-wilenonimalale, gannar be-nug-odummononimalale, bese-goled-neg-soblesadgi ise-wilesagwar bese gollarmalale, degi, bega na e-isgusad barsognanai guarmalale,

³⁴nibneggi-mai be itogoed. Israel-dulemar-e-isgued be osulogoed. Geb gannar Israel-dulemar yar-e-dadganga-uklesadse be senonikoed.

³⁵”Be-dulamar begi yolesad-ular, bar dii-wisuli be imakalile, deyob, be be-dulamar-sabsur-odurdaknai gualile, bese-goled-neggi bese ise-gollar imakarmalale, agine, e-isgusmaladgi bangudmalale, gannar be-nug odummonai guarmalale,

³⁶nibneggi-mai be itogoed. Be-Israel-dulemar-e-isgued be osulogoed. Be-igarba nabir nanamalaga, igar-nuedgi be odurdakoed. Geb be-dulamarga, yar-ega-be-uksadgi, be dii gannar owibaloed.

³⁷”Israel-dulemar-yar-naidgine, ukud-dummad nagunonidibe, bonimar noardibe, uka-aimaked noardibe, sesemar ainiardibe, sese-burwigan ainiarbardibe, aginbali, e-neggwebur-bukwadgine, e-isdarmalad ebiris ambikunonidibe, bela bonigan egi noardibe, uelleged egi nononibardibe, agine, Israel-dulemar magar e-nosad itononikile, bese ise gollar-imakdemalale, nibneggi-mai be itogoed.

³⁸”Deginbali, Israel-dule-gwensakgi boni yolenonikile, agine, na magar e-nosad itononikile, bese ise-gollar-imakdele, e-arganmar bese-goled-neg-siidse oyodbalile, degi, bela Israel-dulemar deyob imakdemarmogale,

³⁹nibneggi-mai be itogoed, degi, Israel-dulemar-e-isgued be osulogoed. War-wargwengi e-daedba ega be ibmar-imakoed, ade, bebi unnila dule-e-binsaed magar be daked.

⁴⁰We-yar-anmar-dadganga-be-uksadgi, deyobi, bela dulemar be-dobekwaa-nanadii gumaloed.

⁴¹”Israel-dulemarsulid, be-dulamarsulid, be-nug-dummarba-maid-itosadba dikasur-danimaladi, deyob be imakmogoed.

⁴²Degisoggu, dule-bamalad be-nug-dummarba-maid wisgunonimaloed, be-gargandik-maid wisgunonimarbaloed, be-gandik-maid wisgumarbaloed. We-Israel-dulemarsulid bese-goled-neggi bese gollalile,

⁴³nibneggi-mai be itogoed. Israel-dulemarsulid bese ibmar-egichialile, ega be sogedba ibmar-imakoed. Bela-dulemar-we-napneggi-bukwamalad, Israel-dulemaryob be-nug wisgunonimarmogoed, degi, be-dobee itononimaloed. Agi, an-bese-goled-neg-sobsadgi be-nug-odummolenaidi, magasar dakmaloed.

⁴⁴”Bab-Jehováʼye, be-Israel-dulemar e-isdarmaladgi bila-ononamalaga be barmisale, amar Jerusalén-neggwebur-na-be-susadsik-atakbukwa bese gotemalale, aginbali, an bega bese-goled-neg-sobsadsik-atakbukwa bese gotemalale,

⁴⁵nibneggi-mai be itogoed. Bab-Jehováʼye, amar ise-wilegar bese gornanaile, be bendaknonikoed.

⁴⁶”Ar dule we-napneggi begi noedbisoggu, Israel-dulemar begi yolenonimalale, geb egi be gwisgunonikoed, degidba be e-isdarmaladga urmakoed, yar-baid-dikasulidse seledmaloed, sulile, yar-baid-walikagwadse seledmaloed.